অসমৰ বাবে সময় অনুকুল

• নৰেণ কলিতা

কেইদিনমান আগত বিশেষ কাম এটাৰ বাবে বাংগালোৰলৈ গৈছিলো। বাংগালোৰত স্থানীয় কানাড়া মানুহৰ লগতে যঠেষ্ট তামিল, তেলেগু, মালায়ালী, বঙালী আৰু উত্তৰ ভাৰতীয় লোক বাস কৰে। মোৰ এই এসপ্তাহ ভ্ৰমণ কালত বহু ৰাজ্যৰ মানুহ লগ পালো। এওঁলোকৰ বহুতৰে আছে ৰাজনীতিৰ প্ৰতি ৰুচি। সকলোৰে মুখত শুনিবলৈ পালো অসমৰ মুখ্যমন্ত্রীৰ জয়গান। বহুতে ড° শৰ্মাক x (টুইটাৰ) আৰু ফেচবুকতো follow কৰে। বিহাৰ, কেৰেলা আদিৰ মানুহে হেনো তেওঁলোকৰ ৰাজ্যতো শৰ্মাৰ নিচিনা দমদাৰ মুখ্যমন্ত্রী বিচাৰে। অসমৰ ৰাজনেতা এজনৰ এনে প্ৰশংসা শুনি অভিভূত হৈ পৰিলো। অবশ্যে বৰ্তমান বিজেপিৰ আন ৰাজ্যৰ দুৰ্বল মুখ্যমন্ত্রীসকলে শৰ্মাক এটা সুযোগ আনি দিছে।ভজনলাল শৰ্মা, ভুপেন্দ্ৰ পেটেল, মোহন যাদৱ আদিৰ নাম ৰাষ্ট্ৰীয় মিডিয়াত নাহেই। যোগী আদিত্যনাথো লোকসভা নিৰ্বাচনৰ ফলাফলৰ পিছত দুৰ্বল হ’ল। এতিয়া বিজেপিৰ মুখ্যমন্ত্রী সকলৰ সভা হ’লে মোদী-শ্বাহৰ ঠিক কাষতে বহি ফটো উঠে ড° হিমন্ত বিশ্ব শৰ্মা। মোদীয়ে একমাত্র ভৰষা কৰে অমিত শ্বাহক আৰু শ্বাহৰ প্ৰিয় ব্যক্তি হ’ল শৰ্মা। যিকোনো বিৰোধী দলৰ ব্যক্তিক গ্ৰেপ্তাৰ কৰিবলৈ হ’লে লাগে অসম পুলিছক। এক কথাত ক’বলৈ গ’লে এইখিনি অসমৰ বাবে সোণালী সময়। প্ৰথমবাৰৰ বাবে অসমৰ মুখ্যমন্ত্রী এজনে ৰাষ্ট্ৰীয় পৰ্য্যায়ত ইমান গুৰুত্ব পাইছে। এই সুযোগতে অসমে নিজৰ প্ৰাপ্য আদায় কৰি ল’ব লাগিব। দশক দশক ধৰি অসমক কৰা বঞ্চনাৰ ভৰপায়ী কৰাৰ সময় আহি পৰিছে।