কাশ্মীৰৰ নিৰ্বাচনত ইঞ্জিনিয়াৰ ৰছীদ

• ৰাজনীতি অসমৰ প্ৰতিবেদন

জন্মু-কাশ্মীৰত চলি থকা বিধানসভা নিৰ্বাচনৰ তৃতীয় তথা অন্তিম পৰ্য্যায়ৰ ভোটগ্ৰহণৰ অন্ত পৰিব ১ অক্টোবৰত। এটা দশকৰ পিছত হ’ব লগীয়া নিৰ্বাচনৰ প্ৰতি ৰাইজৰ সহাৰি এতিয়ালৈকে আশাব্যঞ্জক। ২০১৯ চনত মোদী চৰকাৰে আৰ্টিকল ৩৭০ নিস্প্ৰভাবী কৰি জন্মু কাশ্মীৰক এখন কেন্দ্ৰীয় শাসিত ৰাজ্যলৈ ৰূপান্তৰ কৰিছিল। যোৱা ৫ বছৰত ৰাজ্যখনত সন্ত্রাসবাদীৰ কাৰ্য্যকলাপ হ্ৰাস পাইছে, পৰ্য্যটকৰ সংখ্যা বাঢ়িছে আৰু ঘাইপথৰ ব্যাপক উন্নতি হৈছে। ইয়াৰ বাবে মোদী চৰকাৰ ধন্যবাদৰ পাত্র। কিন্তু তাত থকা মুছলমান সকল এতিয়াও সন্তুষ্ট নহয়। জন্মু-কাশ্মীৰক কেন্দ্ৰীয় শাসিত অঞ্চল কৰা বাবে তেওঁলোক ক্ষোভিত। তাৰোপৰি বিজেপি এটা হিন্দুত্ববাদী দল বুলি সকলোৱে জানে। গতিকে কাশ্মীৰৰ মুছলমানে বিজেপিক ভোট নিদিয়ে।

জন্মু আৰু কাশ্মীৰ ৰাজ্যক মুলতঃ দুটা ভাগত ভাগ কৰিব পাৰি। ৪৩ খন আসন থকা হিন্দু বহুল জন্মু উপত্যকা আৰু ৪৭ খন আসন থকা মুছলমান বহুল কাশ্মীৰ উপত্যকা। জন্মুত বিজেপি শক্তিশালী। ৪৩ৰ ভিতৰত ৩০ বা ৩৫ খন আসন লাভ কৰিলেও আচৰিত হ’বলগীয়া নাই। কিন্তু কাশ্মীৰ উপত্যকাত বিজেপিয়ে এখনো আসন লাভ কৰাৰ সম্ভাবনা নাই। কাশ্মীৰত প্ৰধান যুঁজ হ’ব মেহবুবা মুফতিৰ পিডিপি আৰু কংগ্ৰেছ-নেচনেল কনফাৰেঞ্চ জোঁটৰ মাজত। কাশ্মীৰৰ ৰাইজৰ মেহবুবা আৰু আব্দুলা পৰিয়াল দু্য়োটাৰ প্ৰতি মোহভংগ ঘটিছে। তেওঁলোকে কংগ্ৰেছক কিছু পচন্দ কৰে। সেয়েহে কংগ্ৰেছ-আব্দুলা ইয়াত সুবিধাজনক স্তিতিত আছে। বিজেপিয়ে নিজে জয়ী হ’ব নোৱাৰে বুলি জানি কাশ্মীৰত বহুতো নিৰ্দলীয় প্ৰাৰ্থী দিছে। ইয়ে বিজেপিক বিশেষ সহায় কৰাৰ সম্ভাবনা ক্ষীণ। কাশ্মীৰৰ নিৰ্বাচনৰ সকলোতকৈ গুৰুত্নপূৰ্ণ মানুহজন হ’ল ইঞ্জিনিয়াৰ ৰছীদ। তেওঁ ২০২৪ৰ লোকসভাৰ নিৰ্বাচনৰ সময়ত জেলত থাকি নিৰ্বাচন জিকিছিল। তেওঁৰ লগত শোচনীয় ভাবে পৰাস্ত হৈছিল ওমৰ আব্দুল্লা আৰু চাজ্জাদ লোনৰ দৰে শক্তিশালী প্ৰাৰ্থী। চাৰে পাছ বছৰ তিহাৰ জেলত থকাৰ পিছত ইঞ্জিনিয়াৰ ৰছীদ এতিয়া মুকলি আকাশৰ তলত। ৰছীদৰ কাৰ্য্য কলাপে নিৰ্বাচনী ফলাফলত বহুখিনি প্ৰভাব বিস্তাৰ কৰিব।মেহবুবা মুফতিৰ মতে বিজেপিৰ লগত ইঞ্জিনিয়াৰৰ চুক্তি হৈছে যাৰ ফলত তেওঁ জামিন লাভ কৰে। ৩৭ খন আসনত ৰছীদৰ দলে প্ৰাৰ্থী দিছে।