টকা থাকিলে অসমীয়া?

• দেৱজিত দত্ত

মুখ্যমন্ত্রীয়ে অভিযোগ কৰা মতে USTM য়ে পাহাৰ কটাৰ ফলত গুৱাহাটীত কৃটিম বাণৰ প্ৰকোপ বৃদ্ধি পাইছে। তেখেতে ইয়াক নাম দিছে ফ্লাদ জেহাদৰ। যিহেতু USTM ৰ মালিকজন মুছলমান সম্প্ৰদায়ৰ সেয়েহে মুখ্যমন্ত্রীৰ বক্তব্যত বহুতে ৰাজনীতিৰ গোন্ধ পাইছে। সেইসকলৰ মতে আজমল দুৰ্বল হোৱাৰ পিছত মুখ্যমন্ত্রীয়ে আন এজন মুছলমান খলনায়ক বিচাৰি ফুৰিছে। কিন্তু আচলতে জানো USTM ৰ ফলত অসমত কৃত্রিম বানপানী বৃদ্ধি পাইছে? আমাৰ চৰজমিন তদন্তত মুখ্যমন্ত্রীৰ বক্তব্যৰ সত্যতা প্ৰমাণিত হৈছে। আমি তাৰ স্থানীয় লোকৰ সৈতে কথা পাতি গম পাইছো যে নতুনকৈ মেডিকেল কলেজ নিৰ্মানৰ ফলত যি বন ধ্বংস যজ্ঞ চলিছে তাৰ দাম অসমে পৰিষোধ কৰিবলগীয়া হৈছে। আগতে পাহাৰখনে যিমান পানী ধৰি ৰাখিব পাৰিছিল বৰ্তমান সময়ত তাৰ পৰিমাণ বহুত হ্ৰাস পাইছে। USTM নিৰ্মান কৰা হৈছে মেঘালয়ত যদিও ই গুৱাহাটীৰ নিচেই কাষত। ইয়াৰ শিক্ষাৰ্থী তথা শিক্ষকৰ সৰহভাগেই অসমৰ। পৰিকল্পিত ভাবে ইয়াত মেঘালয়ত নিৰ্মান কৰি মালিকজনে সকলো সা সুবিধা আদায় কৰিছে অসমৰ পৰা। অসমৰ ডাক্তৰ বিলাকক ফুচুলাই টকাৰ লোভত তাত লৈ যোৱা হৈছে। অনাগত দিনত USTM ৰ মেডিকেল কলেজে স্বীকৃতি পালে অসমত চিকিৎকৰ নাটনি হ’ব পাৰে। USTMৰ বিৰূদ্ধে মুখ্যমন্ত্রীৰ আক্ৰোশ সম্পূৰ্ণ সমৰ্থনযোগ্য।

এতিয়া আহো কিছুমান সংবাদ মাধ্যম আৰু য়ুটুবাৰৰ প্ৰসংগলৈ। সময়ে সময়ে এওঁলোকে USTM ক প্ৰশংসা কৰি আহিছে। জেপত সামান্য ধন লৈ মেহবাবুল হকে হেনো আজি কৌটিপতি হৈছে। ইলেকট্ৰনিক মিডিয়াৰ নামী দামী সাংবাদিকে তেওঁৰ সন্মুখত শিৰ নত কৰি কথা কৈছে। তাৰ বিনিময়ত যে এইসকল লোকে কিবা প্ৰতিদান লাভ কৰিছে সেয়া নিশ্চিত। খৱৰ পোৱা মতে বিজ্ঞাপন, বিদেশ ভ্ৰমণ, অদিটৰিয়ামত মিটিং কৰাৰ সুবিধা দি USTM ৰ মালিকে অসমৰ বহু সাংবাদিক আৰু মালিক গোষ্ঠীক ফিটিং কৰিছে। ইয়াৰ জলন্ত প্ৰমাণ হ’ল মুখ্যমন্ত্রীৰ বক্তব্যৰ পিছত এওঁলোকৰ ভুমিকা। তথ্য প্ৰমাণ সহকাৰে এওঁলোকে প্ৰমাণ কৰিব লাগিছিল যে USTM এ অসমৰ একো ক্ষতি কৰা নাই। এয়া নকৰি তেওঁলোকে কৰি আছে অন্য এখন নাটক। USTM ক বচাবলৈ বাচি লোৱা হৈছে কৃত্রিম বানপানীৰ অন্য কাৰণসমূহ। মুখ্যমন্ত্রীৰ গৃহ সমষ্টিত পাহাৰ কটা, আমচাং ইত্যাদি ইত্যাদি। কৃত্রিম বানপানী হোৱাৰ বহু কাৰণ থাকিব পাৰে কিন্তু USTMৰ কাৰকটোক এই কাৰণে আওকাণ কৰিছো নেকি যে তাৰ মালিকৰ বহু টকা আছে? সামাজিক মাধ্যমত এজন লোকে ঠিকেই লিখিছে _টকা থাকিলে অসমীয়া নহ’লে মিঞা।