লুৰিণৰ মুখথেকেচা…

• পাৰ্থ প্ৰতীম লহকৰ

আগন্তুক বিধানসভা উপ-নিৰ্বাচনকলৈ কংগ্ৰেছ দলৰ লোকসভাত বিৰোধী উপ-দলপতি যোৰহাট লোকসভা সমষ্টিৰ সাংসদ গৌৰৱ গগৈৰ পৰিপক্ক ৰাজনীতিত দিশহাৰা হ’ল তথাকথিত বিৰোধী ঐক্য। কংগ্ৰেছৰ কোলাত বহিয়েই বাকী কেইটা গণভিত্তিহীন ৰাজনৈতিক দলৰ নেতাই নিৰ্বাচনী বৈতৰণী পাৰ হ’ব পাৰিম বুলি সপোন দেখি আহিছিল। কিন্তু গৌৰৱ গগৈৰ সৱল স্থিতিয়ে তেওঁলোকৰ সপোন চুৰমাৰ কৰি দিলে। আজিয়ো অসমত কংগ্ৰেছ দলৰ এটা সৱল গণভিত্তি আছে। বিগত বিধানসভা নিৰ্বাচনত কংগ্ৰেছ দলত যোগদান নকৰাকৈ অথচ কংগ্ৰেছৰ টিকট লাভ কৰি প্ৰয়াত মনজিৎ মহন্তই দিশপুৰ বিধানসভা সমষ্টিত প্ৰায় ৭৫ হাজাৰ ভোট লাভ কৰিবলৈ সক্ষম হৈছিল। মিঞা মুছলমান অধ্যুষিত অঞ্চলসমূহত কংগ্ৰেছৰ একচেটিয়া ভোট বেংক আছে। সেয়া বিগত লোকসভা নিৰ্বাচনৰ সময়ত ধুবুৰী লোকসভাৰ ফলাফলেই প্ৰমাণ কৰে। বিগত ২০২৪ ৰ ডিব্ৰুগড় লোকসভা সমষ্টিৰ পৰা প্ৰতিদ্বন্দিতা কৰা অসম জাতীয় পৰিষদৰ সভাপতি লুৰিণজ্যোতি গগৈৰ বিৰুদ্ধে যদিহে কংগ্ৰেছ দলে প্ৰাৰ্থী থিয় কৰালে হেঁতেন তেন্তে তেওঁৰ আমানতৰ ধনো বাজেয়াপ্ত হ’ল হেঁতেন। যি অজিত কুমাৰ ভূঞা আজি এই তথাকথিত বিৰোধী ঐক্য মৰ্চাৰ সভাপতি হৈছে তেওঁ আকৌ কংগ্ৰেছ আৰু AIUDF ৰ বোকোচাত উঠিয়েই ৰাজ্যসভাৰ সাংসদ হৈছিল। এক অৰ্থত কংগ্ৰেছ অবিহনে বিৰোধী নেতা সমূহ ৰাজ্য ৰাজনীতিত বিৰাট শুন্য । ইয়াৰোপৰি কংগ্ৰেছক বাদ দি বাকী বিৰোধী ৰাজনৈতিক দলসমূহে কেৱল বিজেপি বিৰোধী ভোট বিভাজনৰ বাবেহে নিৰ্বাচনী ৰাজনীতিত অৱতীৰ্ণ হয় বুলি বিগত সময়চোৱাত অভিযোগ উত্থাপন হৈ আহিছে; নিৰ্বাচনত জয়লাভ কৰাটো তেওঁলোকৰ কেতিয়াও লক্ষ্য আৰু উদ্দেশ্য নহয়।

এগৰাকী অসমীয়া হিচাপে গৌৰৱ গগৈয়ে লোকসভাত যি বলিষ্ঠ কন্ঠৰে ভাষণ দিছে সেয়া স্বাভাবিকতে প্ৰশংসনীয়। কিন্তু গৌৰৱ গগৈয়ে প্ৰতিনিধিত্ব কৰি আহিছে ভাৰতীয় জাতীয় কংগ্ৰেছ নামৰ বিষাক্ত দলটোক। যি দলৰ পৃষ্ঠপোষকতাত ভাৰতীয় সভ্যতা-সংস্কৃতিৰ বিনাশ হৈছে। কিন্তু অসমৰ সাধাৰণ ৰাইজৰ এই সন্দৰ্ভত সম্যক জ্ঞান নাই। তেওঁলোকে কেৱল লক্ষ্য কৰে গৌৰৱ গগৈৰ ব্যক্তিত্ব আৰু তেওঁৰ প্ৰয়াত পিতৃ তৰুণ গগৈলৈ। যদিও তৰুণ গগৈৰ ১৫ বছৰীয়া কাৰ্যকালত তেওঁ অসমখনক বাংলাদেশী মিঞাৰ চৰণীয়া পথাৰত পৰিণত কৰিছিল তৎসত্বেও অসমীয়া মানুহৰ তেওঁৰ প্ৰতি এটা ভাল ভাৱ আছে। সেইটো হ’ল তেখেতৰ সততা। কোনো ব্যক্তিগত কেলেংকাৰীত তেওঁৰ নাম সাঙুৰ খোৱা নাছিল। আটাইতকৈ ডাঙৰ কথাটো হৈছে “Who is Badaruddin” বুলি তেওঁ এটা লক্ষ্মণ ৰেখা টানি দিছিল। যি তেওঁ মৃত্যুৰ সময়লৈকে Maintain কৰি ৰাখিলে। যি অখিল গগৈ কালিলৈকে গৌৰৱ গগৈৰ সৈতে আছিল সেই অখিল গগৈয়ে আমেৰিকাত তৰুণ গগৈৰ মাটি সম্পত্তি আছিল বুলি সংবাদ মেল পাতি ঘোষণা কৰিছিল। অথচ তেওঁৰ সেই অভিযোগ পৰবৰ্তী সময়ত মিছা প্ৰমাণিত হৈছিল।

গৌৰৱ গগৈয়ে এগৰাকী পৰিপক্ক ৰাজনৈতিক নেতা হিচাপে ছদ্মবেশত থকা বিৰোধীক চিনি পায় ৰাজনৈতিক ইনিংছ খেলা আৰম্ভ কৰিছে। জয় পৰাজয় পিছৰ কথা। কিন্তু গৌৰৱ গগৈৰ যে,”মাইকী মাছ মতা মাছ”ৰ পৰা এতিয়া বহুত উত্তৰণ ঘটিছে; সেয়া বিজেপিৰ ৰাজনীতিৰ বাবে টাৰ্ণিং পইন্ট হব পাৰে ।