সৰৱানা ভৱনত বিৰিয়াণী

• ৰাজনীতি অসমৰ প্ৰতিবেদন

“সৰৱানা ভৱনত যদি বিৰিয়াণী বিক্ৰী কৰে তেন্তে চলিব নেকি?”

উদ্ধৱ ঠাকৰেৰ পৰাজয়ৰ বিশ্লেষণ কৰি ৰজত শেঠীয়ে কোৱা কথাশাৰ সঠিক হৈছ। সৰৱানা ভৱন দক্ষিণ ভাৰতৰ এখন বিখ্যাত ৰেষ্টুৰেন্ট। ইয়াৰ শাখা দিল্লী, মুম্বাই, লণ্ডন আদিতো আছে। সৰৱানা ভৱনত বিক্ৰী কৰা হয় বিশুদ্ধ নিৰামিষ আহাৰ।ইয়াত পোৱা দোছা, ইদলী, উপমা আদি খুব উন্নতমানৰ। সৰৱানা ভবনৰ পৰিচয়ে হ’ল ইয়াৰ বিশুদ্ধ নিৰামিষ ভোজন আৰু ইয়াৰ গ্ৰাহক সকলে ইয়াৰ খাদ্য পচন্দ কৰে। অহাকালি যদি সৰৱানা ভৱনে চিকেন বিৰিয়ানী বিক্ৰী কৰিবলৈ আৰম্ভ কৰে তেতিয়া ই নিজৰ পুৰণি গ্ৰাহকসকলক হেৰুৱাব। বিৰিয়াণীৰ বাবে ইতিমধ্যে প্ৰতিস্থিত ৰেষ্টুৰেণ্ট আছেই। গতিকে সৰৱানা ভৱন সফল হোৱাৰ সম্ভাবনা কম।

উদ্ধৱ ঠাকৰেৰ লগতো একেই ঘটনা সংঘটিত হৈছে। তেখেতৰ পিতৃ প্ৰয়াত বালাচাহেৱ ঠাকৰে আছিল হিন্দু হৃদয় সম্ৰাট। বাল ঠাকৰে ৰাম মন্দিৰৰ সমৰ্থন কৰিছিল, সাবৰকৰক পূজা কৰিছিল। শিৱ সেনাৰ পৰিচয় আছিল হিন্দুত্ব। কিন্তু তেখেতৰ পুত্রই যেতিয়া দলটোৰ আদৰ্শ বিসৰ্জন দি কংগ্ৰেছৰ লগত মিত্রতা কৰিলে তেতিয়াৰ পৰাই শিৱসেনাৰ পতন আৰম্ভ হ’ল। আজি শিৱসেনাই সাৱৰকৰক পাহৰি গ’ল আৰু হিন্দুত্বৰ কথাও ক’বলৈ ভয় কৰে। ফলত তেওঁলোকৰ ভোটাৰসকলো তেওঁলোকৰ পৰা আতৰি গ’ল। বিজেপিয়ে সুযোগ বুজি নিৰ্বাচনত বাল ঠাকৰেৰ বক্তব্যকে হাইলাইট কৰিলে। ‘বটেংগে টো কটেংগে’ বুলি উদাত্ত ভাষণ দিয়া বাল ঠাকৰেৰ শ্লোগানকে বিজেপিয়ে নিজৰ কৰি পেলালে। মহাৰাষ্ট্ৰৰ নিৰ্বাচনৰ ফলাফলে আৰু এটা কথা স্পষ্টকৈ কৈ গ’ল। ৰাজনীতিত সফল হ’বলৈ অকল মাক-দেউতাকৰ নামেই যথেষ্ট নহয়।