ৰাজনীতি : মহিমা বুজা টান

• ৰাজেন কলিতা

---

অসমৰ ৰাজনীতিৰ দুজন যোদ্ধাৰ মাজত তীব্ৰ বাকযুদ্ধই জমাই তুলিছিল বিটিছি নিৰ্বাচন। নেডাৰ আহ্বায়ক ড° হিমন্ত বিশ্ব শৰ্মাই তুলিছিল হাগ্ৰামা মহিলাৰীৰ ওপৰত বহু অভিযোগ। আনকি নিৰ্বাচনৰ পিছত হাগ্ৰামাক জেলত  পঠিওৱাৰ ধমকি দিছিল শৰ্মাই। হাগ্ৰামাৰ প্ৰত্যাক্ৰমনো আছিল তীব্ৰ।  নিৰ্বাচনৰ ফলাফল ঘোষণা হোৱাৰ দিনাই সকলো  সলনি হ’ল। হিমন্ত বিশ্ব শৰ্মাই ক’লে যে হাগ্ৰামাই দুৰ্নীতি কৰা নাই। দুৰ্নীতি কৰিছে হেনো অ’ফিছাৰ বোৰে। সকলো অবাক। দিনে নিশাই সভা কৰি, ৰোড শ্বো কৰি হাগ্ৰামাক গালি দিয়া মানুহজন হাগ্ৰামাৰ প্ৰতি দুদিন পিছতে নৰম হৈ পৰিল। হাগ্ৰামাৰো একে অবস্থা। ৰাজনীতিত অসম্ভব বুলি একো নাই তথাপিও কিন্তু ইমান সোনকালে নেতাৰ মুখৰ কথাৰ ইমান পৰিবৰ্তন ৰাইজে আশা কৰা নাছিল।

হাগ্ৰামা আৰু বিজেপি যদি মিত্রজোঁট বন্ধনত আবদ্ধ হৈ নিৰ্বাচন খেলিলেহেতেন তেতিয়া বিধ্বস্ত হ’ল হেতেন দুয়োটা দল। তেতিয়া নৱ শৰণীয়াই হয়তো ১৫ খন, প্ৰমোদ বড়োৱে ১৩ খন আৰু হাগ্ৰামাই ৮ খন মান আসন পালে হেতেন। নৱ শৰণীয়াৰ হাতত থাকিলেহেতেন মুছলমানকে ধৰি সকলো অবড়ো ভোট। হিমন্ত বিশ্ব শৰ্মাই যিমানে হাগ্ৰামাক গালি দিছে সিমানে মুছলমানৰ ভোট হাগ্ৰামালৈ গৈছে।  ফলত সকলোতকৈ ক্ষতিগ্ৰস্থ হ’ল নৱ শৰণীয়া আৰু কংগ্ৰেছ-আজমলৰ ,লাভবান হ’ল বিজেপি আৰু হাগ্ৰামা। একে ঠাইতে থাকি গ’ল প্ৰমোদ বড়ো। মন্ত্রীসভাৰ পৰা বিপিএফৰ তিনি মন্ত্রীয়ে পদত্যাগো নকৰিলে। সেয়েহে ক’ব পাৰি যে এয়া বিজেপি আৰু বিপিএফে জানি শুনি লোৱা এটা কেলকুলেটেট ৰিস্ক। নৱ শৰণীয়াই সন্মুখত অন্ধকাৰ দেখি বিজেপিৰ শৰনাপন্ন হৈছে। কংগ্ৰেছ এতিয়াও দোধোৰ-মোধোৰ অবস্থাত আছে। বিপিএফৰ লগত মিত্রতা কৰিলেও বিধানসভা নিৰ্বাচনত বড়োভুমিত এখনো আসন তেওঁলোকে এৰি নিদিব। নৈতিক সমৰ্থন দি বিপিএফক জিকাই আনিলেও নিৰ্বাচনৰ পিছত যে তেওঁলোক লুটিবাগৰ নামাৰিব তাৰ গেৰান্টি নাই। কাৰণ হাগ্ৰামাই নিজেই কয় যে তেওঁ সুবিধাবাদী। শাসক দলৰ লগত থাকি তেওঁ ভাল পায়। মুঠৰ ওপৰত কব পাৰি যে নেতা বিলাকৰ নিৰ্বাচনৰ সময়ত দিয়া ভাষনবোৰৰ কোনো গুৰুত্ব নাই। কেই ঘন্টামানৰ ভিতৰত সকলো সলনি হ’ব পাৰে।