‘ৰাজনীতি অসম’ অসমৰ প্ৰথম ৰাজনৈতিক ই-আলোচনীৰ প্ৰতিবেদন
ৰাজনীতি অসম’ (WWW.RAJNITIAXOM.COM) : দুই বছৰ – ১ লাখ ৬৯ হাজাৰ পঢ়ুৱৈ
প্ৰাক্তন মুখ্যমন্ত্রী প্ৰফুল্ল কুমাৰ মহন্তই বোকাখাতৰ প্ৰাক্তন বিধায়ক জিতেন গগৈক লগ ধৰাৰ খবৰটোৱে ৰাজনৈতিক মহলত বিশেষ চৰ্চা লাভ কৰিছে। কি কাৰণত মহন্ত ডাঙৰীয়াই জীতেন গগৈক লগ ধৰিলে? ইয়াৰ উত্তৰ স্পষ্ট। অগপৰ সভাপতি তথা বোকাখাতৰ বিধায়ক অতুল বৰাৰ ওপৰত চাপ সৃষ্টি কৰিবলৈ ইয়াতকৈ ভাল উপায় নাছিল। সকলোৱে দেখাকৈ বৰাৰ ৰাজনৈতিক প্ৰতিদ্বন্দ্বীজনক সাক্ষাৎ কৰি মহন্তই বুজাই দিব খুজিছে “টাইগাৰ অভি জিন্দা হ্যে।” ইতিমধ্যে খবৰ ওঁলাইছে যে অহা বিধানসভা নিৰ্বাচনত মহন্তকে ধৰি তেওঁৰ গোটৰ আন বিধায়কসলকৰ টিকট কটা যোৱাটো নিশ্চিত। তালিকাত নাম আছে বৃন্দাবন গোস্বামী, পবীন্দ্ৰ ডেকা, উৎপল দত্ত, নৰেন সোণোৱাল আৰু সত্যব্ৰত কলিতাৰ। সম্ভাব্য বিপদৰ কথা জানি উতিমধ্যে উৎপল দত্ত আৰু সত্যব্ৰত কলিতাই মহন্তৰ সংগ ত্যাগ কৰা বুলি জনা গৈছে। আনকি লখিমপুৰৰ বান পৰিস্থিতিৰ খবৰ লবলৈ যোৱাৰ সময়তো মহন্তৰ সংগ দিয়া নাছিল উৎপল দত্তই। এনে সময়ত প্ৰফুল্ল কুমাৰ মহন্তৰ সন্মুখত বিকল্প সিমীত। ৬ মাহৰ ভিতৰত নতুন দল খুলি নিৰ্বাচনত অবতীৰ্ণ হোৱাৰ সাহস হয়তো মহন্তৰ নহব। ইতিমধ্যে প্ৰগতিশীল দলৰ তিক্ত অভিজ্ঞতা তেওঁ পাহৰা নাই। কংগ্ৰেছ বা আছুৰ নতুন দলেও মহন্তক আদৰণি জনোৱাৰ সম্ভাবনা ক্ষীণ। ৰাজনীতিত তিষ্ঠি থাকিবলৈ বিধানসভা নিৰ্বাচন জয়ী হৈ অহা খুব প্ৰয়োজন আৰু তাৰ বাবে মহন্ত হ’ব লাগিব বহৰমপুৰত অগপ-বিজেপিৰ উমৈহতিয়া প্ৰাৰ্থী। যোৱাবাৰ মহন্তৰ জয়ৰ ব্যবধান আছিল মাত্র ৫ হাজাৰ। দলৰ টিকট নাপাই নিৰ্দলীয় হৈ খেলিলে মহন্তৰ বিজয় মুঠেও নিশ্চিত নহয়। সেয়েহে পাকে প্ৰকাৰে মহন্তই অতুল বৰাক বুজাই দিছে যে টিকট কটাৰ ভুল যাতে তেওঁ নকৰে। নহ’লে বোকাখাতত অতুল বৰাক পৰাভূত কৰিবলৈ মহন্তই সৰ্বস্ব উজাৰি দিব। টাইগাৰৰ এই চেলেঞ্জ অতুল বৰাই গ্ৰহণ কৰিবনে? অপেক্ষা মাত্র কেইটামান মাহৰ।
