এই লেখনিৰ উদ্দেশ্য হাস্যৰস )
কমেডি ডেক্স: ৰাজনীতি অসম
ৰাজনীতি অসম’ (WWW.RAJNITIAXOM.COM) : দুই বছৰ – ১ লাখ ৬৯ হাজাৰ পঢ়ুৱৈ
নেতাবিলাকৰ দুখন মুখ থাকে। টিভি, পেপাৰৰ সাক্ষাৎকাৰত সকলো কথা খুলি কবও নোৱাৰে। দলৰ শৃংখলা, কৰ্মীৰ মনোবল আদিৰ কথাও আছে। সেয়েহে আমি উপস্থিত হৈছিলো বিভিন্ন নেতাৰ ঘৰত। উদ্দেশ্য আছিল নেতাবিলাকৰ মনৰ কথা জনাৰ। আমি প্ৰতিশ্ৰুতি দিছিলো যে তেখেতসকলৰ নাম আমি প্ৰকাশ নকৰো। আমাৰ প্ৰতিশ্ৰুতিত ভোল গৈ সকলোৱে একেবাৰে খুলি কলে মনৰ কথাঃ
(১)
অজলা ককাইঃ আপোনাৰ বিৰূদ্ধে অভিযোগ আছে যে আপুনি অনপৰতে মৌন হৈ থাকে।আপোনাক আনকি নাম দিছে নিমাতী কুমাৰ বুলি।
নেতা ১ঃ পক্ষী মৰে ৰৈ, মানুহ মৰে কৈ। নকলেও যদি চলি থাকিব পাৰো কৈনো জগৰ লগাও কিয়? কথা বেছি নকও কাৰণে মোৰ ইমেজ ঠিকে আছে।
অজলা ককাইঃ দেখা গৈছে যে আপোনাৰ ২ নম্বৰ মন্ত্রী জন সদায় লাইম লাইটত থাকে। নাচি বাগি, চাইকেল চলাই নিৰ্বাচনত প্ৰচাৰ কৰি আছে। টিভিত সদায় তেওঁৰ দেডলাইন। আপুনি তেওঁৰ পাখি নাকাটে কিয়?
নেতা ১ঃ চোনু চুদৰ নাম শুনিছেনে? তেওঁ যি ব’ডি বনাইছে শ্বাৰখুন খানেও পাট্টা নাপায়। কিন্ত চিনেমাৰ নায়ক সদায় শ্বাহৰুখে হয়। তেওঁ যি মন যায় কৰি থাকক। চকীখনত মই বহি আছো তো।
অজলা ককাইঃ সংসাৰ কৰাৰ কথা মনত কেতিয়াবা আহেনে?
নেতা ১ঃ নাদ্দা অহাৰ দিনা অলপ আহিছিল। মই বিয়া পাতিলে মোৰ পৰিবাৰৰ লগতে তেওঁৰ পত্নীয়ে বজাৰ কৰিবলৈ যাব পাৰিলেহেতেন দিয়কছোন।
(২)
অজলা ককাইঃ কিমান দিন আৰু এনেকৈ বেলেগক জিকাই থাকিব?
নেতা ২ঃ কি কবি আৰু ভাগিন? কেতিয়াবা অকলে চকুপানী মুছো। বেছিকৈ জোকাই নলবি তয়ো।
অজলা ককাইঃ আপুনি দিল্লীত যাবনে দিছপুৰত থাকিব?
নেতা ২ঃ ২০১৯তে দিল্লী যোৱা কথা আছিল বোপাই। মোক ঠগিলে। বোলে মই ৰাজ্যত নাথাকিলে দলটো দুৰ্বল হ’ব। তেনে যদি কথা মুখ্যমন্ত্রী বনাই দিয়া। সেইটোও নিদিয়ে। গাধ খাটনি দি বেলেগক জিকাব লাগে। এইবাৰ খং উঠিলে বাপ্পেকে কৰোনা হোৱা বুলি নিৰ্বাচনৰ আগত ঘৰতে শুই যাম।
অজলা ককাইঃ ১০০ + হ’বনে এইবাৰ?
নেতা ২ঃ এই দাসজন বলীয়া হৈছে। কিবাকে ৬৪ খন পালে বাংলাদেশৰ মন্দিৰত গৈ পূজা কৰি দিল্লী পাম। ইহত কেইটা ইয়াত যেনেকে মৰে মৰি থাকক। অকলে আৰু কিমান ধাক্কা দিম?
(৩)
অজলা ককাইঃ মহাজোঁট যে কৰিলে, উজনিৰ আসন নালেগে নেকি?
নেতা ৩ঃ উজনিত এনেও শুন্য তেনেও শুন্য। জোঁট নকৰিলে নামনিৰ বিলাকো ডাৰিৱালাই থপিয়াই নিলে হেতেন। ৰাইজ আৰু ছাত্রৰ দলৰো ইয়াতে চকু।
অজলা ককাইঃ অকল নামনিৰ আসনেৰে চৰকাৰ বনাব পাৰিব জানো?
নেতা ৩ঃ চৰকাৰ পিছৰ কথা। মোৰ প্ৰথম লক্ষ্য বিৰোধীক ১০০ খন আসন পোৱাৰ পৰা বিৰত ৰখা। মই মানুহজনে খুব পজিটিভ চিন্তা কৰো।
অজলা ককাইঃ মুখ্যমন্ত্রী হোৱাৰ ইচ্ছা আছেনে?
নেতা ৩ঃ ইচ্ছানো কাৰ নাথাকে। ৰাতি ৰাতি প্ৰায়ে সপোন দেখো। মোৰ শ্ৰীমতীয়ে ধেমালিতে সকলোকে কয়_ ৰাতি এখেতৰ শপতগ্ৰহণ চাব আহিব।
(৪)
অজলা ককাইঃ আপোনাৰ ওপৰত হেনো নিশেধাজ্ঞা লগোৱা হৈছে।
নেতা ৪ঃ নাম নাজানো। মই যেতিয়া ছাত্র সংগঠনত প্ৰথম সোমাইছিলো তাৰ জন্মই হোৱা নাছিল। কটা নিধক!
অজলা ককাইঃ এতিয়া পিছে কি কৰিব?
নেতা ৪ঃ মই পিছে সেইবোৰত লাজ পোৱা মানুহ নহয়। মোৰ বিবেকে কৈছে এইটো সাধাৰণ কথা। মই দুদিনমান মনে মনে থাকি পুনৰ ছাত্র সংগঠনৰ হৈ যা তা বকি থাকিম।
অজলা ককাইঃ ৩০ বছৰ ছাত্র সংগঠনত আছে আৰু কিমান দিন থাকিব?
নেতা ৪ঃ এৰিম বুলি ভাবিলেই দেখো বিছাই দকা য়েন লাগে। ২০ বছৰ মান পিছত চাম কি হয়।
