ব্যক্তি প্ৰথম ৰাষ্ট্ৰ গৌণ

• পাৰ্থ সাৰথি দত্ত

---

দুৰ্নীতি আৰু প্ৰৱঞ্চনা  কৰি ধৰা পৰিছিল আনুষ্ঠানিক শিক্ষাগত অৰ্হতা থকা বহু  ল’ৰা ছোৱালী , পুৰুষ মহিলাৰ লগতে বিয়াগোম বিষয়া । মাক বাপেকৰ টকা বা প্ৰভাৱ খটুৱাই  বহুজনে এপি এচ ছি ৰ চাকৰি লৈছিল কংগ্ৰেছৰ দিনত  । চৰকাৰ সলনি হ’ল ।  সৰ্বানন্দ সোণোৱালৰ নেতৃত্ব, চোচিয়েল মিডিয়াৰ বহুল প্ৰয়োগ ,  আৰ টি আই  আইন  ,  আৰক্ষীৰ কৰ্মদক্ষতা ,   দন্ত চিকিৎসক গৰাকী সমন্বিতে  সমুহ অসমবাসীৰ তীক্ষ্ণ নজৰৰ ফলত কেলেংকাৰী পোহৰলৈ আহিল ।  অনৈতিক উপায়েৰে চাকৰিলৈ ধৰাত পৰিল একাংশ আৰু বহুতেই ধৰাত নপৰাকৈ চাকৰিৰ সোৱাদো লৈ নথকা নহয় ।

দুৰ্নীতিৰ অভিযোগত সংবাদ জগতৰ শিৰোনামা দখল কৰা  বিষয়াসকলক ৰাইজে  মঞ্চত  গলত গামোচা পিন্ধায় আৰু তেওঁলোকক অতিমানৱৰ স্তৰলৈ লৈ যায় । নতুন প্ৰজন্মই নিৰৱে লক্ষ্য  কৰি যায় এই অতিমানৱক কৰা পুজা পদ্ধতি আৰু ভিতৰি ভিতৰি  নিজৰ জীৱনৰ লক্ষ্য স্থিৰ কৰি পেলায় এটা চৰকাৰী চাকৰি  । আৰু সেইবাবেই নতুন দুৰ্নীতিৰ দুৱাৰ মুকলি হয় ।  আৰম্ভ হ’ল পিএনআৰডি আৰু আৰক্ষী নিযুক্তি বিতৰ্ক । নিবনুৱাক চৰম প্ৰতাৰণা কৰাৰ উদাহৰণৰ শেষ নাই । ক্ষমতাত থকা দলৰ  আত্মীয়ই সুপ্ত হৈ থকা মেধা উদ্ধাৰ কৰে । নিলমনি সেন ডেকাৰ পৰা আৰম্ভ কৰি দিবন ডেকালৈ বিতৰ্কৰ দীঘল লিষ্ট খনৰ শেষ নাই । মুখ্যমন্ত্রী সোণোৱালে যিমানে তদন্তৰ কথা কওক ৰাইজ কিন্তু আস্বস্ত হ’ব পৰা নাই। তেওঁৰ দিনতে সংঘটিত হৈছে এটাৰ পিছত আনটো নিযুক্তি কেলেংকাৰী। সচৰাচৰ কোৱা হয় যে সকলো দুৰ্নীতিৰ মুলত নতুনকৈ যোগদান কৰা বিজেপিৰ নেতাসকল। দিবন ডেকা কিন্তু ২২ বছৰে বিজেপিৰ লগত জড়িত। ২০১১ চনত বৰক্ষেত্রী সমষ্টিৰ বিজেপিৰ প্ৰাৰ্থী আছিল। শিলাদিত্যই কোৱা আন এজন দুৰ্নীতিৰ মহানায়ক (মোনা লোৱা মানুহজন) ১৬ বছৰ ধৰি বিজেপিত আছে। ৰাষ্ট্ৰ প্ৰথম, দল দ্বিতীয় আৰু ব্যক্তি শেষত বুলি জানো এই দলটোৱে আনক জ্ঞান নিদিয়ে? নতুনকৈ অহা লোকসকল যদি ক্ষমতাৰ বাবে আহিছে তেনেহলে পি.এন.আৰ.দি, জনসংযোগ, পুলিছৰ চাকৰিৰ নিযুক্তিৰ ক্ষেত্রত  ১৬ -২০ বছৰ দলত থকা মহাপুৰুষ সকলৰ নাম সাঙোৰ খাইছে কিয়? আচলতে ক্ষমতাৰ ৰাগীত মতলীয়া হৈ সকলোৱে পাহৰি গৈছে দলৰ নীতি- আদৰ্শ। BJP is not a party with difference any more. দলটোৰ নেতাবোৰে একে আচৰন কৰিছে যিটো কংগ্ৰেছ বা অগপৰ শাসনৰ কালত দেখা গৈছিল। মুখ্যমন্ত্রীৰ সোপাধিলা নীতিকো সমালোচনা নকৰাকৈ থাকিব নোৱাৰি। তেখেতৰ দায়িত্ব হ’ল পৰীক্ষা যাতে সুকলমে হয় তাৰ ব্যবস্থা কৰা। বিষয়াসকলৰ ওপৰত সকলো এৰি দিয়া কাৰ্য্য মুঠেও সমৰ্থন যোগ্য নহয়। পৰীক্ষাৰ প্ৰশ্নকাকত ফাদিল হোৱাৰ পিছত চোৰ ধৰিবলৈ উচ-পিছ লগোৱাতকৈ এনে পৰিস্থিতি যাতে সৃষ্টি নহয় তাক সুনিশ্চিত কৰাৰ দায়িত্ব আছিল মুখ্যমন্ত্রীৰ। মুখ্যমন্ত্রীক নিকা বুলি এতিয়াও সৰহ সংখ্যক অসমীয়াই বিশ্বাস কৰে। ইয়াত দাগ লাগিবলৈ নিদিব! পুলিছ, জনসংযোগ, পি.এন.আৰ.দি যতেই অভিযোগ উঠিছে সকলো অনুসন্ধানৰ দায়িত্ব চি.বি.আইক অৰ্পন কৰক।