(এই লেখনিৰ উদ্দেশ্য হাস্যৰস )
কমেডি ডেক্স: ৰাজনীতি অসম
ৰাজনীতি অসম’ (WWW.RAJNITIAXOM.COM) : দুই বছৰ – ১ লাখ ৬৯ হাজাৰ পঢ়ুৱৈ
২০১৯ত অসমত গেৰুৱাদলে ৯ খন আসন জিকাৰ অন্যতম কাৰণ কি বুলি প্ৰশ্ন কৰিলে আনে কি কয় নাজানো; মোৰ কিন্তু দাদাৰ নাচবোৰলৈ মনত পৰে। হালি-জালি , পৰি- উঠি দাদাই কিমান যে নাচিলে। দাদাৰ মিটিংত সেইকাৰণে হেনো অসম্ভব ভিৰ হৈছিল। ফ্ৰিটে নাচ শিকিব কাৰ নো মন নাযায়? ২০২১ত পিছে? বহু কৰ্মকৰ্তাৰ গা হেনো পিৰপিৰাই আছে। দাদাই ২০২১তো জানো নাচিব? সেয়েহে দাদাক লগ পাই আমি সুধিয়ে পেলালো।
কতনু ভূঞাঃ ২০১৯ত আপোনাৰ নাচ অতি জনপ্ৰিয় হৈছিল। ২০২১ত আমি আপোনাৰ নাচ দেখিবলৈ পামনে?
দাদাঃ পাব কিন্তু মনে মনে চাব। গগৈ চাৰে গম পালে বি.পি বাঢ়ি যাব পাৰে। এই বয়সত আমাক দেখি তেওঁ নাচিবলৈ গ’লে কিবা অঘটন হ’লে কোন জগৰীয়া হ’ব? তেওঁৰ পুত্রতকৈও মই তেওঁৰ বেছি চিন্তা কৰো।
কতনু ভূঞাঃ যোৱা বাৰৰ নিচিনা একে প্ৰকৃতিৰ নাচ থাকিবনে?
দাদাঃ একে প্ৰকৃতিৰ বুলি নকব ; সেই নাচটোক মই পেতেন্ট কৰি লৈছো। সেইটোক গুগোলত মাৰিলে দাদা নাচ বুলি ওলাব। এইবাৰ অবশ্যে মই অলপ ভেৰিয়েচন আনিম। ঘৰতো সদায় একেবিধ তৰকাৰি খাই বিৰক্তি নালাগে যানো।
কতনু ভূঞাঃ নতুন কিবা নাচৰ অভ্যাস কৰি আছে নেকি?
দাদাঃ মুম্বাইৰ মাৰহা খানৰ পৰা স্কাইপত শিক্ষা লৈ আছো। পেটটোৱে বিধি পঠালি নিদিলে ২০২১ত মোৰ ব্ৰেক ডেন্স দেখি যাব। চালচা ,ৰোম্বা এইবিলাকো মাথা মাৰিছিলো কিন্তু কৰোণাই চ’ব শেষ কৰি দিলে।
কতনু ভূঞাঃ ২০২১ত নিৰ্বাচনী বক্তৃতাত কি কি থাকিব?
দাদাঃ আপুনিটো জানেই মই ওৱান লাইনাৰৰ বাবে বিখ্যাত। মই বৰ্তমান ট্ৰায়েল কৰি আছো। কেইটামান ইতিমধ্যে মাৰ্কেটত এৰি দিছো। ৰাইজৰ সহাৰি কেনেকুৱা হয় তাৰ ওপৰত সিদ্ধান্ত ল’ম।
কতনু ভূঞাঃ এতিয়ালৈকে কোন কেইটাত ভাল সহাৰি পাইছে।
দাদাঃ আজমল ভৱন, গাধৰ মাংস আৰু গগৈ ছাৰৰ হৰিনাম লোৱাকলৈ ৰাইজ উৎসাহিত। তিনি নম্বৰটোত সিদিনা সাংবাদিক এজন হাঁহি হাঁহি বাগৰিয়ে গ’ল। মই বুজিলো মিটিংত ৰাইজে খুৱ তালি মাৰিব।
কতনু ভূঞাঃ আপোনাক এইবাৰ মুখ্যমন্ত্রী পাতিবনে?
দাদাঃ এইবাৰ নাপাতিলে আৰু হিমালয়লৈ যাব লাগিব। কিমান আৰু বোজা টানি থাকিম?
কতনু ভূঞাঃ কেন্দ্ৰীয় নেতৃত্বৰ পৰা কিবা প্ৰতিশ্ৰুতি পাইছে নেকি?
দাদাঃ মোটাভাইক মুখ্যমন্ত্রী কেতিয়া পাতিব বুলি সুধিলেই ঢোকলা, ফাফৰা আদি খুৱাই পঠাই দিয়ে। এইবাৰ ময়ো তিল পিঠা খুৱাই দিম।
কতনু ভূঞাঃ আমি ভগবানৰ ওচৰত প্ৰাৰ্থনা কৰিম যাতে আপুনি অসমৰ ৰাজনীতিত সদায় থাকে।
দাদাঃ আপোনাৰ এই স্নেহৰ বাবে ধন্যবাদ।
কতনু ভূঞাঃ স্নেহ নহয় ; আপোনাৰ বাবেই আমাৰ ঘৰবোৰ চলি আছে। আপুনি নাথাকিলে দেখো অসমত নিউজেই নোহোৱা হ’ব। চব চেনেল বন্ধ হৈ যাব।
দাদাঃ হৰ ঘড়ী বদল ৰহি হ্যে ৰূপ জিন্দেগী…কল হো না হো।
