‘ৰাজনীতি অসম’ অসমৰ প্ৰথম ৰাজনৈতিক ই-আলোচনীৰ প্ৰতিবেদন
ৰাজনীতি অসম’ (WWW.RAJNITIAXOM.COM) : দুই বছৰ – ১ লাখ ৬৯ হাজাৰ পঢ়ুৱৈ
২০১৯ চনৰ লোকসভা নিৰ্বাচনত বিজেপিয়ে পালে ৯ খন আসন আৰু কংগ্ৰেছে পালে ৩ খন। নিৰ্বাচনৰ পিছত যেতিয়া অসম প্ৰদেশৰ সভাপতি ৰিপুণ বৰাক এই বিষয়ে প্ৰশ্ন কৰা হৈছিল তেতিয়া তেওঁ কৈছিল যে গোটেই ভাৰতৰ ভিতৰত তেওঁৰ প্ৰদৰ্শন হেনো তিনি নম্বৰত। কংগ্ৰেছে সকলোতকৈ বেছি আসন পাইছে কেৰেলাত আৰু তাৰ পিছত পঞ্জাৱত। অসমত কংগ্ৰেছে ৩ খন আসন পাই গোটেই ভাৰতৰ ভিতৰত কংগ্ৰেছৰ প্ৰদৰ্শনৰ ক্ষেত্রত তিনি নম্বৰ স্থানত আছে। ৰিপুণ বৰাই যেতিয়া ইয়াৰ কৃতিত্ব ল’ব বিচাৰিলে তেতিয়া আমাৰ বোধগম্য ন’হল আচলতে তেওঁ কৃতিত্ব লৈছে নে ৰাহুল গান্ধীক উপহাস কৰিছে। বিটিছিৰ নিৰ্বাচনতো এখন আসন পাই আনন্দৰ সীমা নাই সভাপতি মহোদয়ৰ। জীৱনত বি প’জেটিভ থকা ভাল কিন্তু সকলোৰে এটা সীমা থকা উচিত। যি সময়ত বিজেপিয়ে নিজৰ সাংগঠনিক বিস্তাৰৰ বাবে দিনে নিশাই কষ্ট কৰি আছে, সেই সময়তে ৰিপুণ বৰা যুদ্ধক্ষেত্র এৰি পলায়ন কৰিছে। বিটিছি নিৰ্বাচনত দুদিনমান প্ৰচাৰ কৰিয়ে তেখেতে দায়িত্ব সামৰিলে। কোনো ৰকম সংখ্যালঘু ৰাইজৰ কৃপাত কংগ্ৰেছৰ চৰকাৰ কৰি মুখ্যমন্ত্রী হ’ব পাৰিলেই হ’ল। কিন্তু তেখেতে পাহৰিছে যে আজিৰ ৰাজনীতি সলনি হ’ল। টিভি , পেপাৰ, চচিয়েল মিডিয়া আদিৰ যোগেদি ৰাইজে আপোনাক প্ৰতি মুহুৰ্ততে লক্ষ্য কৰি আছে। কষ্ট কৰিব নোৱাৰিলে , ৰাইজৰ ইছু বুজিব নোৱাৰিলে আজিকালি কোনো দলে ক্ষমতা গঠন কৰিব নোৱাৰে। প্ৰফুল্ল মহন্ত-হিতেশ্বৰ শইকীয়াৰ দিনৰ কথা আছিল সুকীয়া। আজি কালি ৰাজ্যত শতাধিক নিউজ চেনেল আৰু পৰ্টেল। প্ৰতিখন সভা, প্ৰতিটো কথা লাইভ হয়। জীৱনত পজিটিভ থকাটো ভাল। কিন্তু ইমানো বেছি প’জিটিভ কথা ক’ব নালাগে যাৰ দ্বাৰা আপুনি হাহিয়াতৰ পাত্র হয়। সময় থাকোতে আত্ম সন্তুষ্টিৰ পৰিবৰ্তে আত্ম সমালোচনা কৰক। নহ’লে ভবিষ্যত অন্ধকাৰ।
