• পাৰ্থ প্ৰতীম লহকৰ

---

হিমন্ত বিশ্ব শৰ্মা আৰু সৰ্বানন্দ সোণোৱালে বিজেপিৰ হৈ অসমৰ ইমুৰৰ পৰা সিমুৰলৈ তীব্ৰ গতিৰে প্ৰচাৰ চলাই আছে। বৰ্তমানলৈ নিৰ্বাচনী ৰেহ ৰূপ চাই দেখা গৈছে যে বিজেপি কংগ্ৰেছতকৈ বহু গুণ আগবাঢ়ি আছে। কিন্তু প্ৰশ্ন হৈছে ২মেত বিজেপিয়ে সংখ্যাগৰিষ্ঠতা পালে মুখ্যমন্ত্রী কোন হ’ব? প্ৰথম বাৰৰ বাবে বিজেপিয়ে নিজৰ মুখ্যমন্ত্রীজনৰ চেহেৰা আগত ৰাখি প্ৰচাৰ চলোৱা নাই। ইয়াৰ কাৰণ অসমৰ সকলো ৰাইজে সহজে বুজি পাইছে। ভাৰতৰ আগশাৰীৰ সাংবাদিক ৰাজদ্বীপ ছৰদেশাইয়ে ডিব্ৰুগড়ৰ ৰোদ শ্বোত হিমন্ত বিশ্ব শৰ্মাক প্ৰশ্ন কৰিছিল “Am I talking to the next chief minister of Assam?” উত্তৰত শৰ্মাই মিচিকিয়া হাঁহি মাৰি কৈছিল যে বিজেপিৰ সংসদীয় বোৰ্ডে এই ক্ষেত্রত সিদ্ধান্ত ল’ব। আমি পোৱা খৱৰ অনুসৰি শৰ্মাৰ মুখ্যমন্ত্রী হোৱাৰ প্ৰবল ইচ্ছা আছে যদিও তেওঁ ইয়াকলৈ কেন্দ্ৰীয় নেতৃত্বক কোনো হেছা প্ৰয়োগ কৰা নাই। প্ৰয়োজনত তেওঁ কেন্দ্ৰলৈ যাবলৈ সাজু আছে। কিন্তু কোনো কাৰণতে শৰ্মাই সোণোৱালৰ অধীনত পুণৰ মন্ত্রী হ’বলৈ বিচৰা নাই। অসমৰ মুখ্যমন্ত্রী কোন হ’ব তাৰ ক্ষেত্রত সকলোতকৈ গুৰুত্বপূৰ্ণ ভূমিকা ল’ব ৰাষ্ট্ৰীয় স্বয়ম স্বেৱক সংঘই। সংঘৰ প্ৰতিবেদনৰ ভিত্তিতে কেন্দ্ৰই এই ক্ষেত্রত চুৰান্ত সিদ্ধান্ত ল’ব। নাম প্ৰকাশত অনিচ্ছুক অসমৰ এজন শীৰ্ষ আৰ.এছ.এছ নেতাই আমাক জনোৱা মতে সংঘৰ প্ৰথম পচন্দ ড° হিমন্ত বিশ্ব শৰ্মা। এতিয়া প্ৰশ্ন হয় হিমন্ত বিশ্ব শৰ্মাত কৈ সৰ্বানন্দ সোণোবাল কম দক্ষ নেকি ? এনেবোৰ প্ৰশ্নৰ উত্তৰে দুয়োজন ব্যক্তিক প্ৰতিপক্ষ হিচাপে থিয় নকৰাব যদিহে দুয়োজন ব্যক্তিৰ ব্যক্তিত্বক সন্মান কৰিবলৈ শিকা যায় । আৰ.এছ.এছৰ নেতাৰ মতে এজন যদি জাতীয় নায়ক তেন্তে আন এজন হিন্দু হৃদয় সম্ৰাট । শৰ্মাই তেওঁৰ গ্ৰন্থ উন্মোচনী সভা এখনত স্পষ্ট ভাবেই কৈছে যে তেওঁৰ প্ৰথম পৰিচয় হিন্দু । ২০২১ ৰ নিৰ্বাচনৰ প্ৰাক মুহূৰ্তত সৰভোগ সমষ্টি ত্যাগ কৰি ৰঞ্জিত দাস পাটাছাৰকুছি পালে । দুবছৰ আগত ৰাহুল গান্ধীয়ে আমেঠিৰ লগতে কেৰেলাৰ ৱাইনাৰ্দ সমষ্টিৰ পৰাও নিৰ্বাচন খেলিছিল । কংগ্ৰেছ প্ৰাৰ্থী ৰাহুল গান্ধীয়ে মুছলমান সংখ্যাগৰিষ্ঠ সমষ্টিৰ পৰা জয়ী হৈছিল আৰু পৰিচিত আমেঠিত পৰাজিত হৈছিল । ৰঞ্জিত দাস সৰভোগ ত্যাগ কৰিবলৈ বাধ্য হ’ল কাৰণ  সৰভোগৰ জনগাঁঠনি সলনি হৈছে । অকল সৰভোগেই নহয় বৰপেটাৰ আন সমষ্টি সমুহো কংগ্ৰেছ – ইউডিএফ মিত্ৰজোঁটে জয়লাভ কৰিব বুলি তেওঁলোক নিশ্চিত  । ধুবুৰী , গোৱালপাৰা , বৰপেটাৰ গোটেই কেইটা সমষ্টিত বিজেপিয়ে শুন্য অতিক্ৰম কৰিব নোৱাৰে ।  একমাত্ৰ দুধনৈ সমষ্টিত কংগ্ৰেছ বা বিজেপিৰ পৰা অসংখ্যালঘু প্ৰাৰ্থী জয়ী হৈ আছে কাৰণ সেই সমষ্টিটো সংৰক্ষিত । বিজেপিৰ সংকল্প বা ইস্তাহাৰ পত্ৰত উল্লেখ থকা সমষ্টি পুনৰ নিৰ্ধাৰণ যদি ৰাষ্ট্ৰবাদৰ সপক্ষে কৰিব পৰা নাযায় তেন্তে ২০২৬ ত পুৰ্ব বংগীয় মুলৰ   ধৰ্মীয় সংখ্যালঘু বিধায়কে বিধান সভাৰ গৰিষ্ঠ সংখ্যক আসন দখল কৰিব । কাৰণ জনসংখ্যা বৃদ্ধি প্ৰক্ৰিয়াটোক ৰাজনৈতিক হাতিয়াৰ হিচাপে তেওঁলোকে ব্যৱহাৰ কৰে । লাভ জেহাদ  অৰ্থাৎ মিছা পৰিচয় ব্যৱহাৰ কৰি বিপৰীত ধৰ্মৰ ছোৱালীক  প্ৰেমৰ জালত ফচাই বিবাহ কৰি নিজৰ ধৰ্মৰ মানুহৰ সংখ্যাবৃদ্ধিৰ উদ্দেশ্য ৰূপায়ন কৰা প্ৰক্ৰিয়াক বন্ধ কৰি সম্প্ৰীতিৰ বাতাবৰণ সৃষ্টি কৰাটো আৰ.এছ.এছে মিছন হিচাপে লৈছে । ইয়াৰ উপৰিও আন এটা অসমাপ্ত কাম সমাপ্ত কৰিব লাগিব নাগৰিকত্ব সংশোধনী ২০২০ আইন খন অসমত বলবৎ কৰা ।সদৌ অসম ছাত্ৰ সন্থা ( আছু) , আমছু ৰ দৰে ছাত্ৰ সংগঠনে বিৰোধ কৰা আৰু কংগ্ৰেছ – ইউদিএফ দলে এই বিৰোধক সহযোগ কৰা কেব আন্দোলনৰ সময়ত  সমুজ্জ্বল ভট্টাচাৰ্য্য , লুৰিণ জ্যোতি গগৈ , আমিনুল ইছলাম আদি নেতাৰ দ্বাৰা সমালোচিত হৈছিল সৰ্বানন্দ সোণোৱাল। ৰাজপথত আছুৰ কৰ্মীয়ে মুখ্যমন্ত্ৰীৰ পুত্তলিকা দাহ কৰিছিল আৰু বিভিন্ন  ঠাইত নাটকীয় ভংগীমাত পুত্তলিকাক ফাঁচি পৰ্যন্ত দিয়া হৈছিল । শিল্পী , সাহিত্যিকৰ হাতত ধৰি আছুৰ মজিয়াৰ পৰা মুখ্যমন্ত্ৰীৰ চকী খনত বহা সৰ্বানন্দ সোণোৱালৰ বাবে সেই সময়ছোৱা অতি কন্টকপুৰ্ণ আছিল । চেগ বুজি বিধায়ক আব্দুল খালেকে মন্তব্য কৰিছিল যে সৰ্বানন্দ সোণোৱাল ভাল মানুহ আৰু কংগ্ৰেছে  সোণোৱালৰ নেতৃত্বত অবিজেপি চৰকাৰ এখনক সমৰ্থন দিব । নেতা , শিল্পী সাহিত্যিকৰ সমালোচনাত দগ্ধ হৈ মুখ্যমন্ত্ৰী জনে সংবাদ মেল  অনুষ্ঠিত কৰি আবেগিক মন্তব্য কৰিছিল __” মোক এঘৰীয়া নকৰিব …………।” এনেকুৱা আবেগিক আত্মসমৰ্পণ অসমৰ ইতিহাসত হয়টো প্ৰথম ।আৰ.এছ.এছ ইয়াক লৈ খুব অসন্তুষ্ট হৈছিল।  হিতেশ্বৰ শইকীয়া , প্ৰফুল্ল মহন্ত , তৰুণ গগৈৰ মুখত এনেকুৱা আত্মসমৰ্পণ কথা অসমৰ মানুহে শুনা নাছিল । যিসকল শিল্পী , লেখক , বুদ্ধিজীবীয়ে বিজেপিক প্ৰতিহত কৰিবলৈ বদৰুদ্দিন আজমলৰ লগ লাগি সংবাদ পত্ৰত প্ৰচাৰ চলায় সেই মানুহ বিলাকৰ সমালোচনাত সৰ্বানন্দ সোণোবাল দুখী হোৱাটো আচৰিত । বিজেপি চৰকাৰ যদি পুনৰ অসমত হয় তেন্তে লাভ জেহাদ বিৰোধী আইন , ভুমিৰ অধিকাৰ , সমষ্টি পুনৰ নিৰ্ধাৰণ , কা আইন বলবৎ কৰিবলৈ আবেগ নহয় দৃঢ় পদক্ষেপৰ প্ৰয়োজন;  যিখিনি দৃঢ়তা হিমন্ত বিশ্ব শৰ্মাৰ পৰা আশা কৰিব পাৰি ।

অহা ৫ বছৰ অসমৰ কাৰণে অতি গুৰুত্বপূৰ্ণ বুলি আৰ.এছ.এছে বিশ্বাস কৰে। বাংলাদেশী মুছলমানৰ আগ্ৰাসনত ভিতিগ্ৰস্ত হৈ থকা অসমৰ মানুহখিনিৰ হৈ যদি বিজেপি চৰকাৰে অহা ৫ বছৰত কোনো পদক্ষেপ নলয় তেন্তে ৰাইজৰ আস্থা বিজেপিৰ প্ৰতি নোহোৱা হৈ যাব। সেয়েহে তেওঁলোকে অসমত বিচাৰে এজন শক্তিশালী হিন্দুত্ববাদী নেতাক। অসমত বহু সংবাদ মাধ্যমত এতিয়া চৰ্চা চলি আছে আগন্তুক চৰকাৰ কাৰ হ’ব। হয়তো অহা ২ মেৰ পৰা আলোচনাৰ বিষয় সলনি হ’ব। জনজাতীয়-উজনি-নামনি- ব্ৰাহ্মণ  আদি শব্দৰে পৰবৰ্তী মুখ্যমন্ত্রীৰ বিষয়ে আলোচনা কৰিব অসমৰ বিশিষ্ট বুদ্ধীজীৱী সকলে।

---

ৰাজনীতি অসম আলোচনীখন সম্পূৰ্ণকৈ পঢ়িবলৈ ক্লিক কৰক: WWW.RAJNITIAXOM.COM

---

‘ৰাজনীতি অসম’ অসমৰ প্ৰথম ৰাজনৈতিক ই-আলোচনীৰ প্ৰতিবেদন

---

ৰাজনীতি অসম’ (WWW.RAJNITIAXOM.COM) : দুই বছৰ – ১ লাখ ৬৯ হাজাৰ পঢ়ুৱৈ

---

• পাৰ্থ সাৰথি দত্ত

---

ভাৰতীয় ৰাজনীতিত প্ৰাৰ্থীতকৈ দলক গুৰুত্ব দিয়াৰ পৰম্পৰা নতুন নহয়। প্ৰাৰ্থীতকৈ দলক গুৰুত্ব দিয়াৰ বাবেই নিৰ্বাচনত পৰাজিত হৈছিল ভাৰতৰত্ন ভূপেন হাজৰিকা, নিবাৰণ বৰাকে ধৰি বহু বৰেণ্য ব্যক্তি। ২০১৯ লোকসভাটো কুইন ওঝাৰ হাতত পৰাস্ত হয় ববিতা শৰ্মাৰ দৰে যোগ্য নেত্রী। ৰাইজে দলৰ চিহ্ন চাই ভোট দিয়াৰ সুবিধা লৈছে প্ৰত্যেক ৰাজনৈতিক দলৰ কিছুমান লবীয়ে। তেওঁলোকে জানে যে কিছুমান সমষ্টিত দলৰ স্থিতি ইমানেই মজবুত যে যি কোনো এজন সমষ্টিৰ পৰা জয়ী হৈ আহিব পাৰিব। ২০২১টো লবীকেন্দ্ৰিক ৰাজনীতিৰ জৰিয়তে কিছুমান নেতাক টিকট দিয়া হৈছে। আমি আলোচনা কৰিম কংগ্ৰেছ আৰু বিজেপিৰ এনে চাৰিজন প্ৰাৰ্থীৰ বিষয়ে।

দিছপুৰৰ পৰা টিকট পালে প্ৰাক্তন অগপ মন্ত্রী অতুল বৰাই। ২০০১,২০০৬ আৰু ২০১১ চনত একেলেঠাৰিয়ে তিনিবাৰ পৰাজিত হোৱা বৰাই ২০১৬ত বিজেপিৰ ঢৌত সঞ্জীবনী পাই ৰাজ্যৰ ভিতৰতে সৰ্বাধিক ভোটৰ ব্যবধানত জয়ী হ’বলৈ সক্ষম হয়। মন্ত্রীত্ব নাপাই বৰাই দলৰ বিৰুদ্ধে জেহাদ ঘোষণা কৰে। চিণ্ডিকেট, কা আদিত দলৰ বিপক্ষে মন্তব্য ৰাখে। সমষ্টিৰ ৰাইজসকলো বৰাৰ ৫ বছৰীয়া কামকলৈ সন্ত্তষ্ট নহয়। আনকি সোণোৱাল আৰু হিমন্ত বিশ্ব শৰ্মাও বৰাক টিকট দিয়াৰ পক্ষত নাছিল বুলি জনা গৈছে। কিন্তু আন এটা শক্তিশালী লবীৰ জৰিয়তে পুণৰ টিকট লাভ কৰিলে অতুল বৰাই। ইয়াকে লৈ সাধাৰণ কৰ্মী সাংঘাতিক ভাবে নাৰাজ। দিছপুৰৰ ভোটাৰৰো বৰাক ভোট দিয়াৰ ইচ্ছা নাই। কিন্তু বিজেপিক জয়ী কৰাৰ স্বাৰ্থত সাধাৰণ ৰাইজৰ হাতত বিকল্প নাই।

দ্বিতীয় ব্যক্তিজন হ’ল কংগ্ৰেছৰ ভৰত নৰহ। ২০১১ত কংগ্ৰেছৰ ঢৌৰ সময়তো নৰহ ঢকুৱাখানাত পৰাজিত হৈছিল। ২০১৬টো নৱ কুমাৰ দলেৰ হাতত শোচনীয় পৰাজয় হয় ভৰত নৰহৰ। এইবাৰো পৰাজয় নিশ্চিত দেখি পলাই আহিল উত্তৰ অসমৰ সৰ্বাধিক মুছলমান ভোটাৰ থকা নাওবৈচালৈ। এ.আই.ইউ.দি.এফৰ সকলোতকৈ কৰ্মপতু বিধায়ক মামুন ইমদাদুলৰ টিকট কাটি নৰহে নিজৰ বাবে সুৰক্ষিত কৰিলে আসনখন। এই সকলো সম্ভব হ’ল ৰাণী নৰহৰ দিল্লীকেন্দ্ৰীক লবীৰ জৰিয়তে। দুবছৰ আগতে নৰহ দম্পতীয়ে বিজেপিত যোৱাৰ মন মেলিছিল। বিজেপিয়ে দলত নোলোৱাত পুণৰ সহজ পথেৰে বিধায়ক হোৱাৰ পৰিকল্পনা কৰিছে ভৰত নৰহে। নাওবৈচাৰ মুছলমান ৰাইজৰো অন্য বিকল্প নাই। বিজেপিক ৰোধ কৰাৰ স্বাৰ্থতেই ভোট দিব হাতৰ চিনত।

মৰিয়নিৰ বিধায়ক ৰূপজ্যোতি কুৰ্মীৰো মুখৰ লাগ বান্ধ নাই। এনে এজন নেতা তিনিবাৰ বিধানসভালৈ নিৰ্বাচিত হোৱাৰ কথা ভাবিলে আচৰিত লাগে। এসময়ত তৰুণ গগৈক গালি দিয়া ৰূপজ্যোতি কুৰ্মী বিজেপিত যাবলৈ প্ৰায় সাজু হৈছিল। আনকি ইয়াক লৈ বিবৃতিয়ো দিছিল। কিন্তু আৰ.এছ.এছৰ প্ৰবল হেচাত ৰূপজ্যোতিৰ বিজেপি গমন সম্ভব নহ’ল। তাৰ কিছুদিন পিছতে ৰিপুন বৰাকলৈও কটু মন্তব্য কৰিছিল ৰূপজ্যোতিয়ে। কিন্তু দলে তেওঁৰ বিৰূদ্ধে ব্যবস্থা ল’বলৈ সাহস নকৰিলে। ইয়াৰ কাৰণ হ’ল মৰিয়নিত কংগ্ৰেছৰ আন কোনো শক্তিশালী প্ৰাৰ্থী নাই। ভোটাৰো নিৰুপায়। হাতৰ চিনক বাদ দি আনত যে নিদিয়ে ভোট।

কমলপুৰত এইবাৰ বিজেপি প্ৰাৰ্থী দিগন্ত কলিতা। বিধায়ক নিৰ্বাচিত হোৱাৰ আগতেই সুৰক্ষা কৰ্মীক গতা মাৰি খৱৰ সৃষ্টি কৰিলে। বিধায়ক হোৱাৰ পিছত বা কি কৰে? তেখেতৰ তুলনাত কংগ্ৰেছ প্ৰাৰ্থী কিশোৰ ভট্টাচাৰ্য্য খুব অমায়িক ব্যক্তি। কিন্তু জয়ী হ’ব দিগন্তই; কাৰণ কমলপুৰৰ ভোটাৰক লাগে কমল আৰু মোদী।

প্ৰতিটো ৰাজনৈতিক দলৰ কিছুমান লবীয়ে লৈ অহা সুবিধা ৰাইজে ইচ্ছা কৰিলে বন্ধ কৰিব পাৰে। ইয়াৰ বাবে ভোট দিব লাগিব ন’টাত। যদি ন’টাৰ ভোট সৰ্বাধিক হয় তেন্তে সমষ্টিটোত নতুনকৈ নিৰ্বাচন হ’ব আৰু সকলো ৰাজনৈতিক দলে প্ৰাৰ্থী সলনি কৰিবলৈ বাধ্য হ’ব। গণতন্ত্রৰ এই সকলোতকৈ মুল্যবান অস্ত্রপাত অসমৰ কোনো এটা সমষ্টিৰ ৰাইজে বিবেচনা কৰিবনে? নহলে ৰাজনৈতিক দলবিলাকক শিক্ষা দিয়াৰ বিকল্প নাই।

‘ৰাজনীতি অসম’ অসমৰ প্ৰথম ৰাজনৈতিক ই-আলোচনীৰ প্ৰতিবেদন

---

ৰাজনীতি অসম’ (WWW.RAJNITIAXOM.COM) : দুই বছৰ – ১ লাখ ৬৯ হাজাৰ পঢ়ুৱৈ

---

উত্তৰ অসমৰ তেজপুৰ আৰু লখিমপুৰ লোকসভা সমষ্টিৰ অন্তৰ্গত ১৮খন বিধানসভা আসন আছে। ২০১৬ৰ বিধানসভা আৰু ২০১৯ লোকসভা নিৰ্বাচনত বিজেপিয়ে ইয়াত চমকপ্ৰদ ফল লাভ কৰিছিল। ২০১৬ৰ বিধানসভা নিৰ্বাচনত ১৮খন আসনৰ ভিতৰত ১৭খন আসন দখল কৰি নিজৰ শক্তিৰ উমান দিছিল। অকল নাওবৈচাত এ.আই.ইউ.দি.এফৰ মামুন ইমদাদুলৰ হাতত বিজেপি মাত্র ১২৩৩টা ভোটৰ ব্যবধানত পৰাজিত হৈছিল। তেজপুৰ লোকসভাৰ অন্তৰ্গত ৯টা বিধানসভা সমষ্টিত চাহ জনগোষ্ঠী আৰু বড়ো ভোটাৰে নিৰ্ণায়ক ভূমিকা গ্ৰহণ কৰে। লখিমপুৰত বুজন সংখ্যক মিচিং ভোটাৰৰ লগতে কোচ ৰাজবংশী আৰু আহোম ভোটাৰো আছে। ২০২১ৰ বিধানসভা নিৰ্বাচনৰ বাবে এই ১৮টা সমষ্টিত ২৭ মাৰ্চ তাৰিখে ভোট পৰিল। বিভিন্ন ৰাইজৰ লগত কৰা আলোচনাৰ  ভিত্তিত এই ১৮টা সমষ্টিৰ ওপৰত আমাৰ এক প্ৰতিবেদনঃ

৭১ নম্বৰ ঢেকিয়াজুলিত মুল প্ৰতিদ্বন্দ্বিতা হৈছে বিজেপিৰ অশোক সিংহাল আৰু কংগ্ৰেছৰ  বেনুধৰ নাথৰ মাজত। জাতীয় পৰিষদৰ পৰা শত্ৰুঘ্ন চাচোনি আছে যদিও তেওঁ প্ৰভাব পেলাবলৈ সক্ষম হোৱা নাই। ২০১৬ চনত অশোক সিংঘালে কংগ্ৰেছৰ হাবুল চক্ৰবৰ্তীক ৩৪, ৯৯৫ টা ভোটৰ ব্যবধানত পৰাজিত কৰিছিল। সিংঘালে ৭১,৪২৫ ভোট আৰু চক্ৰবৰ্তীয়ে ৩৬,৪৩০টা ভোট পাইছিল। এ.আই.ইউ.দি.এফৰ ধনীৰাম ৰাজোৱাৰে পাইছিল ১৬,৬৯০। এইবাৰ এই ভোটখিনিৰ সৰহ সংখ্যক কংগ্ৰেছে পাব বুলি অনুমান কৰা হৈছে। ২০১৯ লোকসভাত বিজেপিয়ে ৯৮,১৫২ টা আৰু কংগ্ৰেছে ৪৮,৩১৫টা ভোট পাইছিল। বিজেপিৰ  সাংগঠনিক স্থিতি ইয়াত খুব মজবুত। মানুহে প্ৰাৰ্থীতকৈ যিহেতু দলক গুৰুত্ব দিছে সেয়েহে বিজেপিৰ জয় ইয়াৰ পৰা নিশ্চিত।

  ৭২ নম্বৰ বৰচলাত ২০১৬ত বিজেপিৰ গণেশ লিম্বুয়ে ৫৩,৯১২টা আৰু কংগ্ৰেছৰ টংক বাহাদুৰ ৰায়ে ৩০,২৩০টা ভোট পাইছিল। ২০১৯ত বিজেপিয়ে ৭১,৬৮৯ আৰু কংগ্ৰেছে৫১,০৬৬টা ভোট লাভ কৰিছিল। এইবাৰ গণেশ লিম্বুৰ সন্মুখত প্ৰাক্তন বিজেপি আৰু বৰ্তমান কংগ্ৰেছ নেতা ৰামপ্ৰসাদ শৰ্মা। নেপালী ভোটাৰে ভাগ্য নিৰ্ণয় কৰা সমষ্টিটোত দুয়োজনে শক্তিশালী প্ৰাৰ্থী। ৰামপ্ৰসাদ শৰ্মাই ৰাইজৰ মাজত সোমাই কিছু সমৰ্থন আদায় কৰিছে যদিও তেওঁৰ বিজয়ৰ পথ কঠিন। লিম্বু পুনৰ বিধানসভালৈ যোৱাৰ সম্ভাবনা প্ৰবল।

   ৭৩নম্বৰ তেজপুৰত ২০১৬চনত অগপৰ বৃন্দাবন গোস্বামীয়ে ৭১,১৭০ আৰু কংগ্ৰেছৰ হিৰণ্য ভূঞাই ৩৬,৫০৭টা ভোট পাইছিল। ২০১৯ লোকসভাত বিজেপিয়ে ৭৪,০৫৫ আৰু কংগ্ৰেছে ৬৬,৬৯৬টা ভোট লাভ কৰিছিল। এইবাৰ অগপৰ প্ৰাৰ্থী পৃথ্বীৰাজ ৰাভা আৰু কংগ্ৰেছৰ অনুজ কুমাৰ মেছ। জাতীয় পৰিষদৰ জানমনি বৰাৰ প্ৰভাব সিমীত। বৃন্দাবন গোস্বামী টিকট নাপাই অসন্ত্তষ্ট যদিও তেওঁৰ সমৰ্থকৰ সংখ্যা তেনেই কম। কলাগুৰুৰ পুত্র তথা সাংস্কৃতিক কৰ্মী ৰূপে ৰাভাৰ এক সুকীয়া পৰিচয় আছে। ৰাভাৰ লগত আছিল বিজেপিৰ শক্তিশালী সংগঠন। পৃথ্বীৰাজ ৰাভা জয়ী হবই বুলি সাধাৰণ ৰাইজৰ ধাৰণা।

   ৭৪ নম্বৰ ৰঙাপাৰাত বিজেপিৰ সন্মুখত কংগ্ৰেছে কোনো প্ৰতিদ্বন্দ্বিতাই আগবঢ়াব পৰা নাই। আচলতে ৰঙাপাৰাৰ পৰা কংগ্ৰেছৰ কোনো প্ৰাৰ্থীয়েই নাছিল। হাই কামাণ্ডৰ অনুৰোধত অভিজিত হাজৰিকাই নিৰ্বাচন খেলিছে। ২০১৬ত বিজেপিৰ পল্লবলোচন দাসে ৫১,৫৯৭টা ভোট লাভ কৰি কংগ্ৰেছৰ ভিমানন্দ তাতীক ২২,৯৯১টা ভোটৰ ব্যবধানত পৰাস্ত কৰিছিল। ২০১৯ লোকসভাত বিজেপি আৰু কংগ্ৰেছে ভোট পাইছিল ৭৩,৯৯২ আৰু ৪৩,৩৩২। এনেকুৱা লাগিছে কংগ্ৰেছৰ প্ৰাৰ্থীজনে আগতীয়াকৈ পৰাজয় স্বীকাৰ কৰিছিল । নিৰ্বাচনৰ ফল ঘোষণা এক আনুষ্ঠানিকতা মাত্র।

   ৭৫ নম্বৰ চতিয়াত পুণৰ প্ৰতিদ্বন্দ্বিতাত নামিছিল পদ্ম হাজৰিকা আৰু প্ৰাণেশ্বৰ বসুমতাৰী। ২০১৬ত বিজেপিৰ টিকটত হাজৰিকাই ৬০,৪৪০টা ভোট পাই মাত্র ১৮‍১৮টা ভোটৰ ব্যবধানত পৰাস্ত কৰিছিল প্ৰাণেশ্বৰ বসুমতাৰীক। অবশ্যে ২০১৯ লোকসভাত বিজেপিৰ ভোট বৃদ্ধি পায় ৭৮,৪০৪লৈ। কংগ্ৰেছে ভোট লাভ কৰে ৫০,৭৩৭টা। প্ৰাণেশ্বৰৰ সাধাৰণ জীৱন জাপন তথা বড়ো জনগোষ্ঠীৰ হোৱা বাবে ভোটাৰক আকৰ্ষিত কৰিছে। কিন্তু পদ্ম হাজৰিকাই যোৱা ৫ বছৰত শাসক দলৰ বিধায়ক ৰূপে সমষ্টিত বহু কাম কৰিবলৈ সুবিধা পাইছিল। এয়াই আছিল পদ্মৰ ডাঙৰ উপলব্ধি। চতিয়াত পদুম ফুলাটো প্ৰায় নিশ্চিত।

  ৭৬ নম্বৰ বিশ্বনাথত বিজেপিৰ প্ৰমোদ বৰঠাকুৰ আৰু কংগ্ৰেছৰ অঞ্জন বৰাৰ মাজত প্ৰতিদ্বন্দ্বিতা সীমাবদ্ধ আছে। ২০১৬ত বৰঠাকুৰে ৬৪,২২৫ আৰু কংগ্ৰেছৰ নুৰজামান চৰকাৰে ৫৪,১০৫টা ভোট লাভ কৰিছিল। ২০১৯ত বিজেপিয়ে লাভ কৰা ভোটৰ পৰিমান ৬৯,০১৭ তথা কংগ্ৰেছৰ ৫৪,৬৮৬ টা আছিল। প্ৰমোদ বৰঠাকুৰৰ নিকা ভাবমুৰ্তিৰ বাবে তেওঁ সমষ্টিত পুণৰ জয়ী হ’ব বুলি সৰহ সংখ্যক লোকে ধাৰণা কৰিছে। বুজন সংখ্যক মুছলমান ভোটাৰ থকা বাবে কংগ্ৰেছেও ইয়াৰ পৰা শক্তিশালী প্ৰতিদ্বন্দ্বিতা আগবঢ়াব।

  ৭৭নম্বৰ বিহালীত আমি কোনো প্ৰতিদ্বন্দ্বিতা দেখা নাই। বিজেপিৰ প্ৰাক্তন সভাপতি তথা বৰ্তমান কেবিনেট মন্ত্রী ৰঞ্জিত দত্ত চতুৰ্থ বাৰলৈ অসম বিধানসভালৈ নিৰ্বাচিত হোৱা নিশ্চিত। ইয়াত চি.পি.আই (এম.এল)ৰ বিবেক দাসে কোনো প্ৰভাব পেলাব নোৱাৰিলে। বিহালীৰ পৰা বিজেপিয়ে ২০১৬ত ৫২,১৫২ আৰু ২০১৯ত ৫৫,৩৩৯ ভোট লাভ কৰিছিল। একে সময়তে কংগ্ৰেছে লাভ কৰা ভোটৰ পৰিমাণ আছিল ২৮,৫৫১ আৰু ৩৬,৯৬৫।

  ৭৮ নম্বৰ গহপুৰৰ পৰা ২০১৬ত বিজেপিৰ উৎপল বৰাই শোচনীয় ভাবে পৰাজিত কৰিছিল ৰিপুন বৰাৰ পত্নী মনিকা বৰাক। উৎপল বৰাই ৮৫,৪২৪টা ভোট পোৱাৰ বিপৰীতে মনিকা বৰাই পাইছিল ৫৬,৪৮৯টা ভোট। ২০১৯ত এই ব্যবধান আৰু বৃদ্ধি পায়। বিজেপিৰ চিনত ভোট পৰিছিল ৯৫,৪৪৭ আৰু কংগ্ৰেছে পাইছিল ৪৯,২৬৪টা। পঞ্চায়ত নিৰ্বাচনটো বিজেপিয়ে দেখুৱাইছিল চমকপ্ৰদ ফল। এইবাৰ উৎপল বৰাৰ সন্মুখত প্ৰদেশ কংগ্ৰেছৰ সভাপতি ৰিপুন বৰা। উৎপল বৰাই যোৱ ৫ বছৰত সমষ্টিটোত যঠেষ্ট ৰাস্তা নিৰ্মান কৰিছে। ৰিপুন বৰাই  সমষ্টি উদ্ধাৰ কৰাৰ বাবে বহু কষ্ট কৰিছিল। কিন্তু তেওঁ সফল নহ’ল যেন অনুমান হয়।

উত্তৰ অসমৰ ১৮টা সমষ্টিৰ ভিতৰত সকলোতকৈ তীব্ৰ যুঁজ হৈছে ১০৯ নম্বৰ বিহপুৰীয়া সমষ্টিত। যোৱাবাৰৰ পৰাজিত প্ৰাৰ্থী কংগ্ৰেছৰ ভূপেন বৰাৰ সন্মুখত এইবাৰ প্ৰাক্তন আছু নেতা বিজেপিৰ ড° অমিয় ভূঞা। যোৱাবাৰ দেবানন্দ হাজৰিকাৰ হাতত ভূপেন বৰা পৰাজিত হৈছিল ২৬,১৮৭টা ভোটৰ বিশাল ব্যবধানত। ২০১৯ লোকসভাত বিজেপিয়ে ভোট লাভ কৰিছিল ৬৫,৩৪২টা আৰু কংগ্ৰেছে পাইছিল ৩৯,৪০০টা ভোট। বৰ্তমানৰ বিধায়ক দেবানন্দ হাজৰিকাৰ ৰিপোৰ্ট কাৰ্ড ভাল নহয় বাবে বিজেপিয়ে প্ৰাৰ্থীত্ব সলনি কৰিবলৈ বাধ্য হৈছিল। ২০১৯ লোকসভাৰ সময়ত বিজেপিয়ে যিদৰে ৰাইজৰ সহাৰি পাইছিল , ২০২১ত পোৱা নাই। কিন্তু নৰেন্দ্ৰ মোদীয়ে সমষ্টিটোত সভা কৰাৰ পিছত পৰিস্থিতি সলনি হৈ পৰে। ভূপেন বৰাই নিজৰ মৃত পিতৃ-মাতৃৰ কথা কৈ ৰাইজক আবেগিক কৰি ভোট ভিক্ষা কৰা বুলি বিজেপিয়ে অভিযোগ কৰে। অমিয় ভূঞাৰ দিছপুৰলৈ যোৱাৰ মনোকামনা পূৰ্ণ হ’ব পাৰে।

  ৯৯ নম্বৰ মাজুলীত বিজেপিৰ প্ৰাৰ্থী মুখ্যমন্ত্রী সৰ্বানন্দ সোণোৱাল। সোণোৱালৰ সন্মুখত কংগ্ৰেছৰ ৰাজীব লোচন পেগু । ২০১৬ত সোণোৱালে ৪৯,৬০২ আৰু পেগুৱে ৩০,৬৭৯টা ভোট লাভ কৰিছিল। ২০১৯ত গণশক্তিৰ সমৰ্থনৰ পিছত বিজেপিৰ ভোট বৃদ্ধি হৈ ৬২,৩৭৫ হয়। কংগ্ৰেছে পায় ২৪,২৪২টা ভোট। ২০২১ত সোণোৱালৰ সন্মুখত প্ৰত্যাহ্বান নাই। কংগ্ৰেছৰ কোনো ডাঙৰ নেতাই মাজুলিত প্ৰচাৰৰ বাবে যোৱা নাই।

  ১১০ নম্বৰ নাওবৈছাত এ.আই.ইউ.দি.এফৰ শক্তিৰে বলীয়ান প্ৰাক্তন মন্ত্রী ভৰত নৰহ। ৰাইজৰ দলৰ প্ৰাৰ্থী আৰু প্ৰাক্তন  আমছু নেতা আজিজুৰ ৰহমানে সংখ্যালঘুৰ কিছু ভোট ভাঙিলেও নৰহৰ চিন্তাৰ কাৰণ নাই কাৰণ সমষ্টিৰ ৪৮% ভোটাৰ মুছলমান। ২০১৬ত এ.আই.ইউ.দি.এফ , বিজেপি আৰু কংগ্ৰেছে লাভ কৰা ভোটৰ পৰিমাণ আছিল ক্ৰমে ৫৬০০৩, ৫৪৭৭০ আৰু ৩৩৮৬২। ২০১৯ত কংগ্ৰেছে  ৯৩০৩৪ আৰু বিজেপিয়ে ৭৪০৮২টা ভোট লাভ কৰিছিল। এইবাৰ অগপৰ প্ৰাৰ্থী জয়ন্ত খাউণ্ড। টিকট নাপাই যোৱাবাৰৰ বিজিত প্ৰাৰ্থী ৰাও গজেন্দ্ৰ সিং নিৰ্দলীয় প্ৰাৰ্থী। উত্তৰ অসমৰ এইখন আসনতে কংগ্ৰেছে শেষ হাঁহি মৰাৰ সম্ভাবনা আছে।

  ১১১ নম্বৰ লখিমপুৰত অগপৰ উৎপল দত্ত আছে যদিও মুল প্ৰতিদ্বন্দ্বিতা হ’ব বিজেপিৰ মানব ডেকা আৰু কংগ্ৰেছৰ জয় প্ৰকাশ দাসৰ মাজত। ‍২০১৬ত উৎপল দত্ত জয়ী হৈছিল মাত্র ৪১৫৫ টা ভোটৰ ব্যবধানত। দত্তই ৪৫,৯১৭ আৰু দাসে ৪১,৭৬২টা ভোট লাভ কৰিছিল। কংগ্ৰেছৰ টিকট বঞ্চিত ঘন বুঢ়াগোহাঁইয়ে নিৰ্দলীয় হিচাপে খেলি পাইছিল ৩০,০০০ৰো অধিক ভোট। এইবাৰ লখিমপুৰৰ সমিকৰণ সলনি হৈছে। ২০১৯ত ইয়াত বিজেপিয়ে ৭৬,৬৮৫ আৰু কংগ্ৰেছে ৫১,৩৮৯টা ভোট লাভ কৰিছিল। বিজেপিৰ সংগঠন লখিমপুৰত অতি শক্তিশালী। ইয়াৰ উপৰিও মানবৰ লগত আছে মন্ত্রী হিমন্ত বিশ্ব শৰ্মাৰ আশীৰ্বাদ। মানব ডেকাৰ জয়ৰ সম্ভাবনাই উজ্জ্বল।

১১২ নম্বৰ ঢকুৱাখানাত মুল যুঁজ বিজেপিৰ নৱ কুমাৰ দলে আৰু কংগ্ৰেছৰ পদ্ম লোচন দলেৰ মাজত। তৃতীয় বাৰৰ বাবে বিধায়ক হোৱাৰ সপোন দেখা নৱ দলে ২০১৬ত ভৰত নৰহক ২৪,৫৪২টা ভোটৰ ব্যবধানত পৰাস্ত কৰিছিল। ২০১৯ত বিজেপিয়ে ৮৩,৫০২টা ভোট পোৱাৰ বিপৰীতে কংগ্ৰেছে পাইছিল ৪৭,০৯১টা ভোট। গণশক্তিৰ লগত নৱ দলেৰ শিতল যুদ্ধই তেওঁক বিপদত পেলাব বুলি ভবা হৈছিল যদিও মুৰকত সেয়া নহ’ল। ঢকুৱাখানাৰ পৰা সুৰক্ষিত মন্ত্রী নৱ দলে।

১১৩ নম্বৰ ধেমাজি সমষ্টিত মুল প্ৰতিদ্বন্দ্বী বিজেপিৰ ৰনোজ পেগু, জাতীয় পৰিষদৰ চিত্ত বসুমতাৰী আৰু কংগ্ৰেছৰ শৈলেন সোণোৱাল। ২০১৬ আৰু ২০১৯ত ইয়াত বিজেপিয়ে ৬৯,৫৯২ আৰু ৯২,০৭৬টা ভোট লাভ কৰিছিল। একে সময়তে কংগ্ৰেছে লাভ কৰা ভোট আছিল ৫০,৪৭১ আৰু ৬৫,১২৯। ইয়াত গণশক্তিয়ে বিজেপিক পূৰ্ণ সমৰ্থন কৰিছিল। মিছিং ভোট বিজেপিয়ে একচেটিয়াকৈ লাভ কৰাৰ ফলত ৰণোজ পেগুৰ জয় নিশ্চিত।

১১৪ নম্বৰ জোনাইত বিজেপিৰ ভুবন পেগু আৰু কংগ্ৰেছৰ হেম হৰি প্ৰসন্ন পেগুৰ মাজত মুল প্ৰতিদ্বন্দ্বিতা হ’ব। ২০১৬ত ভুবন পেগুই বিজেপিৰ অশ্বিনী পাইটক ৪৯,২৯৩টা ভোটৰ ব্যবধানত পৰাজিত কৰিছিল। ২০২১ ত বিজেপিয়ে ১,৫৭,২৬৪টা ভোট লাভ কৰাৰ বিপৰীতে কংগ্ৰেছে পাইছিল ৪৭,৯৩২ টা ভোট। কংগ্ৰেছৰ স্থিতি ইয়াত দুৰ্বল। ভুপন পেগু ৫০ হাজাৰৰো অধিক ব্যবধানত জয়ী হোৱাৰ সম্ভাবনা আছে।

১২১ নম্বৰ চাবুৱা সমষ্টিত অগপৰ পোণাকন বৰুৱা আৰু কংগ্ৰেছৰ অজয় ফুকনৰ মাজত মুল যুঁজ হ’ব। ২০১৬ত বিজেপিৰ বিনোদ হাজৰিকাই কংগ্ৰেছৰ ৰাজু চাহুক ৩০,৭৫৪টা ভোটৰ বিশাল ব্যবধানত পৰাস্ত কৰিছিল। ২০১৯ত ইয়াত বিজেপিয়ে ৭৯,০২১টা আৰু কংগ্ৰেছে ২৭,৫৭৩টা ভোট লাভ কৰিছিল। অজয় ফুকনৰ যাদু ইয়াত চলা নাই। কংগ্ৰেছ -আজমলৰ মিত্রতাকলৈ নাৰাজ সাধাৰণ ৰাইজ। সকলোৱে একেমুখে কৈছে পোণাকন এইবাৰ হাতীত উঠি দিছপুৰলৈ যাব।

১২৫ নম্বৰ ডুমডুমাত যোৱাবাৰ দুৰ্গা ভূমিজ জয়ী হৈছিল মাত্র ৭৮২টা ভোটত। ইয়াৰ কাৰণ আছিল বিজেপিৰ প্ৰাৰ্থীজন নাছিল চাত্র জনগোষ্ঠীৰ। এইবাৰ ভুল নকৰি বিজেপিয়ে টিকট দিলে ৰুপেশ গোৱালাক। ২০১৯ত ইয়াৰ পৰা  বিজেপিয়ে ৭০,৫১২ আৰু কংগ্ৰেছে ২৯,৭৫২টা ভোট লাভ কৰিছিল। ২০২১ত ডুমডুমাত বিজেপিৰ সপক্ষে বতাহ দেখা গৈছিল। ৰুপেশ গোৱালা বিশাল ভোটৰ ব্যবধানত জয়ী হ’ব বুলি ৰাইজে কৈছে।

১২৬ নম্বৰ শদিয়াত ২০১৬ চনত বিজেপিৰ বলীন চেতীয়াই কংগ্ৰেছৰ বিৰিঞ্চি নেওগক ৬৫৬৬ টা ভোটৰ ব্যবধানত পৰাজিত কৰিছিল। ২০১৯ত বিজেপিয়ে ৭৮,৫০০ আৰু কংগ্ৰেছে পাইছিল ৩৮,৮৬০টা ভোট। ২০২১ত প্ৰতিদ্বন্দ্বিতা হৈছে ত্রিকোণীয়া। কংগ্ৰেছৰ লখিন চন্দ্ৰ চেতীয়া আৰু জাতীয় পৰিষদৰ জগদীশ ভূঁঞাই বলীন চেতীয়াক প্ৰত্যাহ্বান জনাইছে। প্ৰথম অবস্থাত জগদীশ ভূঞাৰ কিছু প্ৰভাব আছিল যদিও বিজেপিৰ প্ৰবল প্ৰচাৰ আৰু সাংগঠনিক ভেটিৰ বাবে বলীন চেতীয়া নিৰ্বাচনী যুদ্ধত আগবাঢ়ি আছে।

দেখা গ’ল যে ২৭ এপ্ৰিলত অনুস্থিত হোৱা  উত্তৰ অসমৰ ১৮টা বিধানসভা সমষ্টিৰ ভিতৰত বিজেপি আগবাঢ়ি আছে ১৭টা সমষ্টিত। এতিয়া অপেক্ষা মাত্র ২ মেলৈ।

• ৰিতু তালুকদাৰ

---

বিজেপিৰ কংগ্ৰেছ মুক্ত ভাৰতৰ শ্লোগানৰ সমান্তৰাল ভাবে বিজেপিত কংগ্ৰেছী নেতাৰ যোগদানে বিজেপিৰ গাঁঠনি পৰ্যন্ত সলনি কৰিছে । কংগ্ৰেছ চৰকাৰত থাকিব নোৱাৰিলেও বিগত লোকসভাত নিৰ্বাচনত প্ৰদ্যুত বৰদলৈ আৰু গৌৰৱ গগৈৰ জয়ে কংগ্ৰেছ দলৰ ইমেজ বহু পৰিমাণে ধনাত্মক কৰিছিল । বহুতেই ধাৰণা কৰিছিল যে মোদী বতাহকো নেওচি কংগ্ৰেছে নিজৰ শক্তি প্ৰদৰ্শনত পিছ পৰি থকা নাই । দুয়োটা সমষ্টিত তেতিয়া বদৰুদ্দিন আজমলে প্ৰাৰ্থী দিয়া নাছিল । প্ৰদ্যুত বৰদলৈৰ জয়ৰ কাৰণ আছিল লাহৰিঘাট আৰু যমুনামুখ সমষ্টি । ধৰ্মীয় সংখ্যালঘু মুছলমান সংখ্যাগৰিষ্ঠ সমষ্টি দুটাৰ পৰা পোৱা ভোটে প্ৰদ্যুত বৰদলৈক জয়ী  কৰাইছিল । কাৰণ নগাও লোকসভাৰ অন্তৰ্গত বিধান সভা সমষ্টিৰ বাকী কেইটাত যদিও বিজেপিৰ ফলাফল ভাল আছিল তথাপি যমুনামুখ আৰু লাহৰিঘাটত ভোটাৰৰ সংখ্যা আন সমষ্টিৰ তুলনাত প্ৰায় দুগুণ । কলিয়াবৰত  গৌৰৱ গগৈক জয়ী কৰাইছিল ধৰ্মীয় সংখ্যালঘু মুছলমান সংখ্যাগৰিষ্ঠ সমষ্টি  ধিং ,ৰুপহী আৰু চামগুৰিৰ ভোটৰ সংখ্যাই । ইউদিএফে দুয়োটা সমষ্টি কংগ্ৰেছক এৰি দিলে আৰু বিজেপি পৰাস্ত হল । বদৰুদ্দিন আজমলে ২০১৪ চনত তিনিখন লোকসভাত জয়ী হৈছিল আৰু ২০১৯ ত মাত্র তিনিখন আসনত প্ৰতিদ্বন্দ্বিতা কৰি ত্যাগ স্বীকাৰ কৰিছিল । এই ত্যাগ আছিল নে বৰশীৰ টোপ আছিল সেই কথা প্ৰমাণিত হ’ল ২০২১ বিধানসভা নিৰ্বাচনত । তৰুণ গগৈৰ নেতৃত্বত ‘হু ইজ বদৰুদ্দিন’ কোৱা কংগ্ৰেছে বদৰুদ্দিন আজমলৰ লগত  মুক্ত মিত্ৰতা কৰি নিৰ্বাচন খেলে । এইবাৰহে আজমলে খেল দেখুৱাব । আজমলৰ উদ্দেশ্য চৰকাৰ গঠন নহয় , চৰকাৰ গঠন হোৱাহেতেঁন ৫-৬ সমষ্টিত বন্ধুত্বপুৰ্ণ প্ৰতিদ্বন্দ্বিতা নকৰিলেহেঁতেন । আজমলৰ উদ্দেশ্য প্ৰধান বিৰোধী ৰাজনৈতিক শক্তি হোৱা । উজনিত কংগ্ৰেছে দুৰ্বল প্ৰদৰ্শন কৰিব আৰু উজনিত দুৰ্বল প্ৰদৰ্শন মানেই উজনিৰ পৰা খিলঞ্জীয়া হিন্দু বিধায়কৰ সংখ্যা কমি যোৱা । বাকী  বৰাক আৰু নামনিত ইউডিএফে উজ্জিবিত প্ৰদৰ্শন কৰাটো স্বাভাবিক । আনকি নামনিৰ পৰা কংগ্ৰেছে ৪-৫ টা সমষ্টিত জয়ী হলেও একমাত্ৰ ৰেকিবুদ্দিন আহমেদৰ বাহিৰে বাকী কেইজন খিলঞ্জীয়া ধৰ্মীয় সংখ্যালঘু সম্প্ৰদায়ৰ নহব । অৰ্থাৎ নিৰ্বাচনৰ ফলাফলে বদৰুদ্দিন আজমলক মহাজোঁটৰ বিগব্ৰাদাৰ কৰি তুলিব আৰু বিজেপিৰ হিমন্ত বিশ্ব শৰ্মাই কোৱা ৩৫% ভোটাৰ শ্লোগান বহু পৰিমানে সঁচা কৰি তুলিব । উজনিৰ কংগ্ৰেছী নেতা অজন্তা নেওগৰ দৰেই বহু কেইজন কংগ্ৰেছীৰ বিজেপি গমন এক প্ৰত্যাশিত ঘটনা হব বাকী নামনিৰ যিকেইটাৰ কংগ্ৰেছৰ পৰা ধৰ্মীয় সংখ্যালঘু সম্প্ৰদায়ৰ ব্যক্তি বিধায়ক হব তেওঁলোকৰ পাখি আজমলে ২০৩১ ত কাটি  সমষ্টি সমুহত ইউডিএফৰ হাতত নিব ।

কংগ্ৰেছে বদৰুদ্দিন আজমলৰ লগত কৰা মিত্ৰতাৰ সমান্তৰাল ভাবে কংগ্ৰেছ দলে বিটিআৰৰ গোটেই ১২ খন আসন বিপিএফক এৰি দিছে । ১২ খন আসনৰ ৫ খনতো যদি হাগ্ৰামা মহিলাৰীৰ দল জয়ী হয় তেন্তে বিপিএফৰ পৰৱৰ্তী  পদক্ষেপ কি হব ? ইউপিপিএল ক ভয় দেখুৱাই ৫ বছৰ বিটিচিত চৰকাৰ চলাই থাকিবলৈ হাগ্ৰামা মহিলাৰী শক্তিশালী হৈ থাকিব লাগিব ।  বিপিএফৰ পৰা জয়ী হৈ অহা বিধায়ক সকলক পাকে প্ৰকাৰে বিজেপিয়ে নিকায় বা আয়োগত সংস্থাপিত কৰিব । গোটেই ১২ সমষ্টিৰ ভিতৰত বিজেপিয়ে তিনি-চাৰিটা দখল কৰিলেও গোটেই ১২ খন আসন প্ৰকাৰন্তেৰে নিজৰ লগত ৰাখিব । ৰাজ্যসভাৰ নিৰ্বাচনৰ পৰা আৰম্ভ কৰি বিভিন্ন বিল পাছ কৰাৰ সময়ত বিপিএফ সদায় চৰকাৰৰ লগত থাকিব । কংগ্ৰেছে বাৰখন আসন এৰি দিয়াৰ  ট্ৰেজেদী ২ মে’ ৰ পিছতহে দেখিবলৈ পোৱা যাব ।

‘ৰাজনীতি অসম’ অসমৰ প্ৰথম ৰাজনৈতিক ই-আলোচনীৰ প্ৰতিবেদন

---

ৰাজনীতি অসম’ (WWW.RAJNITIAXOM.COM) : দুই বছৰ – ১ লাখ ৬৯ হাজাৰ পঢ়ুৱৈ

---

আমি আলোচনা কৰিবলৈ লৈছো উজনিৰ যোৰহাট আৰু ডিব্ৰুগড় লোকসভা সমষ্টিৰ অন্তৰ্গত ১৯খন বিধানসভা অাসনৰ বিষয়ে। ২০১৬ চনত বিজেপি মিত্রজোঁটে ১৯খনৰ ভিতৰত ১৫খন আসন দখল কৰিছিল। উল্লেখযোগ্য যে ডিব্ৰুগড়ৰ ৯ খনৰ ভিতৰত ৯ খন আৰু যোৰহাটৰ ১০খনৰ ভিতৰত ৬খনত জয়ী হৈছিল বিজেপি আৰু অগপ। কা আন্দোলনৰ সকলোতকৈ বেছি প্ৰভাব পৰিছিল এই অঞ্চলত। ভবা হৈছিল যে বিজেপি ইয়াৰ ফলত ভীষণ ভাবে ক্ষতিগ্ৰস্থ হ’ব। এই ১৯টা সমষ্টিত ইতিমধ্যে ২৭ মাৰ্চ তাৰিখে ভোটদান সম্পন্ন হয়। সমষ্টিবোৰৰ বিভিন্ন ভোটদাতা ৰাইজৰ লগত কথা পাতি নিৰ্বাচনী যুদ্ধৰ বিষয়ে আমাৰ এক প্ৰতিবেদন।

১৯টা সমষ্টিৰ ভিতৰত প্ৰায়ভাগতে দেখা গ’ল বিজেপিৰ শক্তিশালী প্ৰদৰ্শন। যিকেইটা সমষ্টিত বিজেপি-অগপ দল বিপুল ভোটত জয় হ’ব বুলি ৰাইজৰ মনত অলপো সন্দেহ নাই সেই সমষ্টি কেইটা হ’ল ডিব্ৰুগড়, টিংখং, তিনিচুকীয়া, ডিগবৈ, মাৰ্ঘেৰিটা, যোৰহাট, মাহমৰা আৰু সোনাৰি। ডিব্ৰুগড়ৰ পৰা প্ৰশান্ত ফুকনৰ বিৰুদ্ধে যুদ্ধ দিছে ৰাজকুমাৰ নেওগে। দুৰ্বল বিৰোধী আৰু বিজেপিৰ ঢৌৱে প্ৰশান্ত ফুকনৰ চতুৰ্থ বাৰৰ বাবে বিধানসভা যাত্রা সুগম কৰিলে। টিংখংত বিজেপিৰ বিমল বৰাৰ সন্মুখৰ পৰা ছত্রভংগ দিছে কংগ্ৰেছৰ এটোৱা মুণ্ডাই। তিনিচুকীয়াত সঞ্জয় কিষানৰ বিৰূদ্ধে প্ৰাৰ্থী বিচাৰি নাপাই কংগ্ৰেছে অসমত অস্তিত্ব নথকা ৰাষ্ট্ৰীয় জনতা দলক এৰি দিছে। ৰাইজৰ মতে সঞ্জয় কিষান আৰু হীৰা দেৱী চৌধুৰীৰ মাজৰ ভোটৰ ব্যবধানটো উজনিৰ সকলো আসনৰ ভিতৰত সৰ্বাধিক হ’ব। মাৰ্ঘেৰিটা সমষ্টিতো বিজেপিৰ ভাস্কৰ শৰ্মাই কংগ্ৰেছৰ মনোৰঞ্জন  বৰগোহাঁইক বিপুল ভোটত পৰাজিত কৰাটো নিশ্চিত হৈছে। যোৰহাটত দুই গোস্বামীৰ যুঁজত হীতেন্দ্ৰ নাথ গোস্বামী বহু আগত। মাহমৰাত বিজেপিৰ যোগেন মহনে কংগ্ৰেছৰ সূৰুয দিহিংগীয়াক বুজন সংখ্যক ভোটত পৰাজিত কৰিব বুলি ৰাইজে বিশ্বাস কৰে। তেনেদৰে সোনাৰি সমষ্টিত কংগ্ৰেছৰ সুশীল কুমাৰ চুৰীয়ে কোনো প্ৰতিদ্বন্দ্বিতা আগবঢ়াব পৰা নাই। বিজেপিৰ ধৰ্মেশ্বৰ কোঁৱৰৰ দিছপুৰ যাত্রা প্ৰায় নিশ্চিত। ডিগবৈত বিজেপিৰ সুৰেন ফুকন সম্পূৰ্ণ নিৰাপদ। কংগ্ৰেছৰ শিৱনাথ চেতিয়া ৩০-৪০হাজাৰ ভোটত পৰাজিত হ’ব বুলি ৰাইজে কব খোজে।

বাকী থকা সমষ্টিকেইটাৰ ভিতৰত অন্যতম আকৰ্ষনৰ কেন্দ্ৰবিন্দু নাহৰকটীয়া। ইয়াত প্ৰতিদ্বন্দ্বিতা চাৰিকোনীয়া। বৰ্তমানৰ বিধায়ক নৰেন সোণোৱাল, কংগ্ৰেছৰ প্ৰণতি ফুকন, বিজেপিৰ তৰংগ গগৈ আৰু জাতীয় পৰিষদৰ লুৰিণজ্যোতি গগৈ আটাইকেইজনে শক্তিশালী প্ৰাৰ্থী। ২০১৬ত নৰেন সোণোৱালে প্ৰণতি ফুকনক মাত্র ৩৫৩১টা ভোটৰ ব্যবধানত পৰাজিত কৰিছিল। ২০১৯ত বিজেপিয়ে ইয়াত ৫৮,০৯৩ আৰু কংগ্ৰেছে ৩৩,৭২৭টা ভোট পাইছিল। লুৰিণ গগৈ ইয়াত ফেক্টৰ হয় যদিও মুল যুঁজ কিন্তু বিজেপি আৰু কংগ্ৰেছৰ মাজতে হৈছে। ইয়াৰ পৰা তৰংগ গগৈ জয়ী হোৱাৰ সম্ভাবনা বেছি। লুৰিণে কিছু ভোট পাব যদিও তৃতীয় স্থানত থাকিব।

মৰাণত বিজেপি বিধায়ক চক্ৰ গগৈক তীব্ৰ প্ৰতিদ্বন্দ্বিতা আগবঢ়াইছে কংগ্ৰেছৰ প্ৰাঞ্জল ঘাটোৱাৰে। চক্ৰ গগৈৰ বিৰূদ্ধে কিছু প্ৰতিষ্ঠান বিৰোধী ঢৌ আছিল। ২০১৬ত চক্ৰ গগৈয়ে প্ৰাঞ্জলৰ দেউতাক পবন সিং ঘাটোৱাৰক ১৬,২৩১টা ভোটত পৰাজিত কৰিছিল। ২০১৯ত বিজেপিয়ে ৬২,৫৫৬ আৰু কংগ্ৰেছে ৩৩,৩৯৫টা ভোট পাইছিল। প্ৰথম অবস্থাত চক্ৰ গগৈ কিছু পিছ পৰি আছিল যদিও সময় যোৱাৰ লগে লগে তেওঁৰ প্ৰচাৰে গতি লাভ কৰে। চক্ৰ গগৈৰ ভাগ্য চক্ৰ পুনৰ উজ্জ্বল দেখা গৈছে।

লাহোৱালত পুনৰ এজন কংগ্ৰেছ নেতাৰ পুত্র মনোজ ধানোৱাৰ। খুব নম্ৰ আৰু বিনয়ী যুবকজনে প্ৰত্যহ্বান আগবঢ়াইছে বৰ্তমানৰ চাবুৱাৰ বিজেপি বিধায়ক বিনোদ হাজৰিকাক। ২০১৬ত এই সমষ্টিৰ পৰা বিজেপিৰ ৰিতুপৰ্ণ বৰুৱাই কংগ্ৰেছৰ প্ৰতাপী মন্ত্রী পৃথ্বী মাঝীক ১৯,৫৯৯টা ভোটত পৰাস্ত কৰিছিল। ২০১৯ত ইয়াত বিজেপিয়ে ৭১,৩৭৭টা ভোট পোৱাৰ বিপৰতে কংগ্ৰেছে পাইছিল মাত্র ৩১,৭৫৮টা ভোট। বিনোদ হাজৰিকাই খুব কম দিনৰ মাজত সমষ্টিত জনপ্ৰিয়তা লাভ কৰিছে। কংগ্ৰেছ-আজমলৰ মিত্রতাৰ ফলতো ৰাইজ কংগ্ৰেছৰ প্ৰতি বিতুষ্ট। বিনোদ হাজৰিকা দ্বিতীয় বাৰৰ বাবে বিধায়ক হ’বলৈ গৈ আছে।

দুলীয়াজানত মুল যুঁজ হ’ব বিজেপিৰ তেৰছ গোৱালা আৰু জাতীয় পৰিষদৰ লুৰীণজ্যোতি গগৈৰ মাজত। ২০১৬ত গোৱালাই কংগ্ৰেছৰ ধ্ৰুৱজ্যোতি গগৈক ১৭,০৮৬ ভোটত পৰাজিত কৰিছিল। ২০১৯ত বিজেপিয়ে ৬৭,৫০৪ আৰু কংগ্ৰেছে ৩৭,৭৮৭টা ভোট পাইছিল। ধ্ৰুৱ এইবাৰ পুণৰ কংগ্ৰেছৰ প্ৰাৰ্থী। আহোম ভোট লুৰিণৰ পক্ষে বেছিকৈ পৰাৰ বাবে ধ্ৰুৱ তৃতীয় স্থানত থকাৰ সম্ভাবনাই প্ৰবল। এই সমষ্টিত যিহেতু বাগানৰ ভোটে নিৰ্ণায়ক ভূমিকা পালন কৰে আৰু সেই ভোটবোৰ বিজেপিৰ পক্ষত পৰিছে সেয়েহে তেৰছ গোৱালা জয়ী হোৱাৰ সম্ভাবনা বেছি।

শিৱসাগৰত বিজেপিৰ সুৰভি ৰাজকুঁৱৰী, কংগ্ৰেছৰ শুভমিত্র গগৈ আৰু ৰাইজৰ দলৰ অখিল গগৈ নিৰ্বাচনী যুদ্ধত নামিছে। ২০১৬ত সুৰভি ৰাজকুঁৱৰী কংগ্ৰেছৰ প্ৰণব গগৈৰ হাতত মাত্র ৫৪২টা ভোটত পৰাজিত হৈছিল। ২০১৯ত বিজেপিয়ে ৫৫,৬৫৯ আৰু কংগ্ৰেছে ৫৬,৩১৮টা ভোট পাইছিল। অখিল গগৈৰ মাতৃয়ে প্ৰচাৰ কৰাৰ ফলত তেখেতে ৰাইজৰ সহানুভূতি পাইছে। কংগ্ৰেছৰ প্ৰাৰ্থী নাথাকিলে অখিল গগৈৰ জয় নিশ্চিত আছিল। অখিল-শুভমিত্রৰ মাজেৰে বিজেপি সৰকি যোৱাৰ শংকা ৰাইজে ব্যক্ত কৰিছে। জয়ী হোৱা প্ৰাৰ্থী জনৰ ভোটৰ ব্যবধান খুব কম হ’ব।

তিতাবৰত ২০১৬ত তৰুণ গগৈয়ে বিজেপিৰ কামাখ্যা প্ৰসাদ তাছাক ১৭,৪৯৫টা ভোটৰ ব্যবধানত পৰাজিত কৰিছিল। ২০১৯ত কংগ্ৰেছে ৫৮,৫২০ আৰু বিজেপিয়ে ৪৫,৩১৪টা ভোট লাভ কৰিছিল। এইবাৰ বিজেপিৰ হেমন্ত কলিতাৰ সন্মুখত ভাস্কৰ জ্যোতি বৰুৱা। বিজেপিয়ে তিতাবৰত বহু কষ্ট কৰিছে। হিমন্ত বিশ্ব শৰ্মাই একাধিকবাৰ গৈছে। কিন্তু ৰাইজৰ মনত এতিয়াও তৰুণ গগৈৰ প্ৰতি অগাধ শ্ৰদ্ধা আছে। সেয়েহে কংগ্ৰেছকে তেওঁলোকে ভোট দিব। যোৰহাট জিলাৰ একমাত্র কংগ্ৰেছ বিধায়ক হ’ব পাৰে ভাস্কৰ বৰুৱা।

২০১৬ত টীয়কত ৰেনুপমা ৰাজখোৱাই কংগ্ৰেছৰ পল্লবী শইকীয়া গগৈক ৫০৪৯ট ভোটত পৰাজিত কৰিছিল। ২০১৯ত বিজেপিয়ে ৪৭,০৭৫ আৰু কংগ্ৰেছে ৪০,৭৫০টা ভোট পাইছিল। ৰেনুপমা ৰাজখোৱাৰ বিৰূদ্ধে প্ৰচণ্ড প্ৰতিষ্ঠান বিৰোধী ঢৌ আছিল। প্ৰথমতে বিজেপিয়ে অগপক সহায় কৰা নাছিল। কিন্তু শেষৰ কিছু দিনত ছবি অলপ সলনি হয়। দুই মহিলাৰ ভোটযুদ্ধত কোন জয়ী হয় কোৱা টান। যিকোনো এজন ১ৰ পৰা ৫ হাজাৰ ভোটৰ ব্যবধানত জয়ী হৈ যাব পাৰে।

আমগুৰিটো একেই অবস্থা। যোৱাবাৰৰ দুই প্ৰতিদ্বন্দ্বী প্ৰদীপ হাজৰিকা আৰু অংকিতা দত্ত পুনৰ যুদ্ধক্ষেত্রত। ২০১৬ত অংকিতা পৰাস্ত হৈছিল মাত্র ১,৬২০ ভোটত। ২০১৯ত কংগ্ৰেছে ৩৭,১১০ আৰু বিজেপিয়ে ৫০,০০১টা ভোট লাভ কৰিছিল। বিজেপিয়ে এইবাৰ প্ৰদীপ হাজৰিকাক প্ৰাৰ্থীত্ব দিব বিচৰা নাছিল। কিন্তু অগপৰ আকোৰগোজ স্থিতিৰ বাবে অবশেষত আসন এৰিবলৈ বাধ্য হয়। অগপৰ সাংগঠনিক স্থিতি আগৰ দৰে মজবুত নহয় আৰু বিজেপিৰ কৰ্মীয়ে তেওঁক সহায় কৰা নাই। তেনে অবস্থাত প্ৰদীপ হাজৰিকাৰ জয় অনিশ্চিত। বিজেপিৰ ঢৌৱে তেওঁক কিমান সহায় কৰিছে সেয়া ২ মেৰ দিনা গম পোৱা যাব।

আন এটা অতি আকৰ্ষনীয় সমষ্টি  হ’ল থাওৰা যত বিজেপিৰ কুশল দুৱৰী বনাম সুশান্ত বুঢ়াগোহাঁইৰ মাজত পুনৰ যুঁজ দেখা গৈছে। ২০১৬ত দুৱৰীয়ে বুঢ়াগোহাঁইক মাত্র ১২২৬টা ভোটৰ ব্যবধানত পৰাজিত কৰিছিল। ২০১৯ত অবশ্যে সুশান্তই নিজৰ সমষ্টিটে লিড ল’ন নোৱাৰিলে। সুশান্তই ৪১,০৯৩টা ভোট পোৱাৰ বিপৰীতে তপন গগৈয়ে পাইছিল ৪৩,৭৩৮টা ভোট। এইবাৰো যুঁজ তীব্ৰ হৈছে।  কুশল দুৱৰী যদি জয়ী হয় একমাত্র কাৰণ হ’ব কংগ্ৰেছ-আজমলৰ মিত্রতাৰ ফলত ৰাইজৰ মনত জন্ম হোৱা ক্ষোভ।

মৰিয়ণিত এইবাৰ পদুম ফুলাটো নিশ্চিত। ২০১৬ত বিজেপি তৃতীয় স্থানত আছিল। কংগ্ৰেছৰ ৰূপজ্যোতি কুৰ্মীয়ে ৰাষ্ট্ৰবাদী কংগ্ৰেছ দলৰ অলক ঘোষক ১৭৯৩টা ভোটত পৰাজিত কৰিছিল। ২০১৯ত বিজেপিয়ে ৪৯,৩১৮ আৰু কংগ্ৰেছে ৩৫,০২৭টা ভোট লাভ কৰিছিল। সমষ্টিৰ মুল ভোটাৰ চাহ বাগানৰ শ্ৰমিক আৰু বঙালী হিন্দু। অখিল গগৈৰ মনোনয়ন প্ৰত্যাহাৰে ৰূপজ্যোতিৰ মুখত হাঁহি বিৰিঙাইছিল যদিও অলক ঘোষৰ মনোনোয়ন পত্র বাতিল হোৱাত তেওঁৰ জয়ৰ সকলো আশা মষিমুৰ হৈ গৈছে। বিজেপিৰ ৰমনী তাতীৰ বিৰূদ্ধে ৰূপজ্যোতিৰ ভগবানে শেষ ভৰষা।

অন্তিম সমষ্টিটো হ’ল নাজিৰা। ২০১৬ত নিজৰ গুৰু হিতেশ্বৰ শইকীয়াৰ প্ৰতি শ্ৰদ্ধা জনাই হিমন্ত বিশ্ব শৰ্মা নাজিৰালৈ প্ৰচাৰৰ বাবে যোৱা নাছিল। সেয়হে দেবব্ৰত শইকীয়াই বিজেপিৰ প্ৰহ্লাদ গোৱালাক ১৪,৮৫৫টা ভোটৰ ব্যবধানত পৰাজিত কৰিছিল। ২০১৯ত বিজেপিয়ে ৪৭,৩৫০ আৰু কংগ্ৰেছে ৪৫,৫২৯টা ভোট লাভ কৰিছিল। এইবাৰ হিমন্ত বিশ্ব শৰ্মাই তেওঁৰ অনুগৰ ময়ূৰ বুঢ়াগোহাঁইৰ জয়ৰ বাবে সৰ্বশক্তি প্ৰয়োগ কৰিছে। দেবব্ৰত শইকীয়াক পৰাজিত কৰা ইমান সহজ নহয় যদিও ময়ূৰে বহু কষ্ট কৰিছে। ময়ূৰৰ দিছপুৰ যাত্রাৰ সপোন দিঠকত পৰিণত হ’ব পাৰে।

এয়া আছিল যোৰহাট আৰু ডিব্ৰুগড় লোকসভা সমষ্টিৰ অন্তৰ্গত ১৯টা বিধানসভা সমষ্টিৰ ফলাফলৰ ওপৰত আমাৰ এক প্ৰতিবেদন। এতিয়া অপেক্ষা ২ মেলৈ।

ৰাজনীতি অসম’ (WWW.RAJNITIAXOM.COM) : দুই বছৰ – ১ লাখ ৬৯ হাজাৰ পঢ়ুৱৈ

---