• পাৰ্থ প্ৰতীম লহকৰ

প্ৰাক্তণ মন্ত্ৰী আৰু বৰ্তমানৰ বিধায়িকা অজন্তা নেওগে কংগ্ৰেছ ত্যাগ কৰি বিজেপিত যোগদান কৰিলে । ২০১৬ নিৰ্বাচনৰ আগত হিমন্ত বিশ্ব শৰ্মাৰ কংগ্ৰেছ ত্যাগ আৰু ২০২১ চনৰ নিৰ্বাচনৰ আগে আগে অজন্তা নেওগ , ৰাজদ্বীপ গোৱালা আদি নেতাৰ কংগ্ৰেছ ত্যাগ কিন্তু একে নহয় । ২০১৪ চনত নৰেন্দ্ৰ মোদীৰ নেতৃত্বত বিজেপিয়ে কেন্দ্ৰত চৰকাৰ গঠনৰ পিছত অসমতো কংগ্ৰেছ দলে বিপদৰ উমান পাইছিল । কিন্তু সেইসময়ত কংগ্ৰেছৰ পৰাজয়  নিশ্চিত হোৱা নাছিল । ৰাহুল গান্ধীৰ অভিমান আৰু তৰুণ গগৈৰ পুত্ৰ স্নেহে হিমন্ত বিশ্ব শৰ্মাক কংগ্ৰেছ ত্যাগ কৰা সিদ্ধান্তক ক্ষীপ্ৰতা প্ৰদান কৰিছিল ।সেইসময়ত হিমন্ত বিশ্ব শৰ্মাৰ লগত বিজেপিত যোগ দিয়া পল্লব লোচন দাস , পিযুষ হাজৰিকা , প্ৰদান বৰুৱা আদি নেতাৰ দল সলনি সম্পুৰ্ণ হিমন্ত বিশ্ব শৰ্মাৰ লগত নিৰ্ভৰশীল আছিল । অৰ্থাৎ হিমন্ত বিশ্ব শৰ্মাৰ নেতৃত্বত একাংশ কংগ্ৰেছ নেতা বিজেপিলৈ আহিছিল । হিমন্ত বিশ্ব শৰ্মাই নিজৰ দক্ষতাৰ বলত বিজেপিক উত্তৰণ কৰিলে । হিমন্ত বিশ্ব শৰ্মা অহাৰ পিছত গছ নোহোৱা ঠাইত এৰাই বিৰিখ জাতীয় বহু বিজেপি নেতাই নিৰ্বাচনী সভাত ডাঙৰ কন্ঠত ভাষণ দিবলৈ শিকিলে । হিমন্ত বিশ্ব শৰ্মাৰ নিৰ্বাচনী সভাই বিজেপিৰ প্ৰাৰ্থী এজনৰ ভাগ্য সলনি কৰিলে । হিমন্ত বিশ্ব শৰ্মাই নিজেও ব্যক্তিগত চেনেল এটাৰ ইনটাৰভিউত স্বীকাৰ কৰিছিল যে অচিন সাগৰত তেওঁ নাওঁ এৰি দিছে । ২০১৫-১৬ ৰ পৰিবেশ এতিয়া নাই । ২০১৯ লোকসভা নিৰ্বাচনত পুনৰ মোদী চৰকাৰ , বিটিআৰত বিজেপি মিত্ৰ চৰকাৰ আৰু বিশেষকৈ বদৰুদ্দিন আজমলৰ লগত কংগ্ৰেছৰ মুক্ত মিত্ৰতাই বিজেপিক ২০২১ নিৰ্বাচনত অভাবনীয় মাইলেজ দিয়াটো খাতাং ।উজনি অসমত বদৰুদ্দিন আজমলৰ লগত কৰা মিত্ৰতাই কংগ্ৰেছক বিপদত পেলাব বুলি সকলোৱে দাবী কৰিছিল আৰু অজন্তা নেওগৰ কংগ্ৰেছ ত্যাগে এই দাবীক ন্যায্যতা দিলে । কংগ্ৰেছৰ টিকটত উজনিত অজন্তা নেওঁগৰ পৰাজয় যে নিশ্চিত সেই কথা গোলাঘাটৰ ভোটাৰে তেওঁক জনাই দিছে আৰু উপায়হীন হৈ ৰহিংয়াৰ কাৰণে আব্দুল খালেক , চেৰমান আলীৰ লগত ধৰ্মঘট কৰা প্ৰাক্তণ মন্ত্ৰী গৰাকীয়ে বিজেপিত যোগ দিলে । ২০১৬ চনত যিখিনি ভোটাৰে বিজেপিক জয়ী কৰাইছিল সেই একে খিনি ভোটাৰৰ ভোট পুৰ্বৰ নিৰ্বাচনবোৰত অগপ আৰু নিৰ্দলীয় প্ৰাৰ্থীৰ লগত আছিল । ৰাষ্ট্ৰবাদী দল সংগঠন , অনুষ্ঠান -প্ৰতিষ্ঠানে নিয়মিত ভাবে চলায় থকা বিভিন্ন কাৰ্য্যসূচীৰ প্ৰভাব আৰু বদৰুদ্দিন আজমলৰ ৰাজনীতিত প্ৰবেশে অসমৰ জনগণক ৰাষ্ট্ৰবাদী কৰি তুলিছে আৰু ৰাষ্ট্ৰৰ শত্ৰু চিনাক্ত কৰিবলৈ সক্ষম হৈছে । অজন্তা নেওগ বা ইয়াৰ পিছত বিৰোধী দলপতি দেৱব্ৰত শইকীয়াও যদি বিজেপি যোগ দিয়ে আচৰিত হ’ব লগা একো নাথাকিব । কাৰণ নাজিৰা ,গোলাঘাট ,মৰিয়নিৰ ৰাষ্ট্ৰবাদী ৰাইজে বদৰুদ্দিন আজমলৰ মিত্ৰ নেতাক ভোট নিদিয়ে । তৰুণ গগৈয়ে নিজৰ পুত্ৰক সাংসদ বনোৱাৰ স্বাৰ্থত ৰাহুল গান্ধীক বিৰোধ নকৰিলে । বদৰুদ্দিন আজমলৰ লগত কৰা মিত্ৰতা সম্পুৰ্ণ হাইকামাণ্ডৰ সিদ্ধান্ত আছিল । তৰুণ গগৈ আৰু ৰিপুন বৰাই গান্ধী পৰিয়ালৰ প্ৰিয় ভাজন হৈ থাকিবলৈ আজমলক বিৰোধ নকৰিলে বুলি কংগ্ৰেছৰ ভিতৰচাৰত আলোচনা হৈছে । অজন্তা নেওগ বা আহিব লগা কংগ্ৰেছৰ পৰা আন আন হিন্দু নেতাসকলে বিজেপিক লাভান্বিত কৰিব আৰু নৰেন্দ্ৰ মোদীক শক্তিশালী কৰিব । কিন্তু প্ৰতিষ্ঠাৰ সংকতত পৰিব বিজেপিৰ ন-পুৰণি বা অতি পুৰণি কিছু নেতা । প্ৰমিলা ৰাণীৰ ব্ৰহ্ম ই অধিকাৰ কৰি থকা মহিলা কোটাৰ পৰা আংগুৰলতা ডেকা বা সুমন হৰিপ্ৰিয়াই মন্ত্ৰী হোৱাৰ বাসনা পুৰ্ণ ২০২১ চনত নহ’ব । অজন্তা নেওগৰ অভিজ্ঞতাৰ লগত যিহেতু আংগুৰলতা ডেকা বা সুমন হৰিপ্ৰিয়াৰ তুলনা নাই সেয়ে নেওগ মন্ত্ৰী হ’লে সাধাৰণ জনতাৰ একো অসুবিধা নহ’ব । বহু বিজেপি কৰ্মী বা নেতাই শংকা ব্যক্ত কৰিছে যে এইসকল প্ৰাক্তণ কংগ্ৰেছী নেতা এতিয়া বিজেপিৰ ভাল সময়ত আহিছে । বিজেপিৰ বেয়া দিনত পুনৰ কংগ্ৰেছলৈ ঘুৰি যাব ।এনেকুৱা শংকা শুদ্ধ নেকি ? ২০১৪ লোকসভা বা ২০১৬ বিধান সভা নিৰ্বাচনৰ আগত কংগ্ৰেছ দল বহুবাৰ জয়ী হৈছিল । কংগ্ৰেছক জয়ী কৰা ভোটাৰখিনি জানো বেলেগ দেশৰ আছিল ? আজি বিজেপিৰ ভোটাৰ খিনি পুৰ্বতে আন দলৰ ভোটাৰ আছিল । ভোটাৰে নিজৰ নেৰেটিভ সলনি কৰিছে সেয়ে নেতাই দল  সলাবলৈ বাধ্য । ২০১৪ চনৰ নিৰ্বাচনৰ আগত নেতাই জামা মছজিদৰ ইমামৰ হাতত চুমা খাব গৈছিল । এতিয়া নেতাই মন্দিৰ দৰ্শন কৰিব যায় । কাৰণ দেশৰ জনতাই মন সলনি কৰিছে । সৰ্বানন্দ সোণোৱাল , হিমন্ত বিশ্ব শৰ্মাৰ পৰা আৰম্ভ কৰি অজন্তা নেওগলৈ কোনো এজন নেতাই পুৰ্বৰ দললৈ ঘুৰি যাব নোৱাৰে । কাৰণ সৰ্বানন্দ সোণোৱাল অগপত গৈ বা অসম জাতীয় পৰিষদত গৈ ডিব্ৰুগড় লোকসভা সমষ্টিত জয়ী হ’ব নোৱাৰে । আনহাতে হিমন্ত বিশ্ব শৰ্মাইও গুৱাহাটী লোকসভা সমষ্টিত কংগ্ৰেছৰ টিকটত জিকিব নোৱাৰে যেতিয়ালৈকে ভোটৰ বিন্যাস ওলোটা নহয় ।অসমত আজমল আৰু দিল্লীৰ ৰাজনীতিত ওৱেচি ভাতৃদ্বয়ে ভোটাৰক ভোট বেংকলৈ ৰূপান্তৰ কৰা কাম ক্ষিপ্ৰ কৰিছে ।অসমৰ ৰাষ্ট্ৰবাদী জনতাই নিজৰ ৰাষ্ট্ৰবাদী ধাৰা যেতিয়ালৈকে সলনি নকৰে তেতিয়ালৈকে এই নেতা সকলে কংগ্ৰেছত ঘুৰি গৈ ৰাজৈনতিক ভৱিষ্যত উজ্জ্বল কৰিব নোৱাৰে ।

• নয়ন বৰ্মন

স্বাধীন ভাৰতত চৰকাৰ আৰু সংগঠনৰ মাজত হোৱা বিভিন্ন চুক্তিৰ ভিতৰত আটাইতকৈ সফল চুক্তি হৈছে বিটিচি চুক্তি । বড়ো লিবাৰেচন টাইগাৰ ফৰ্চ চমুকৈ বিএলটিয়ে পৃথক ৰাজ্য দাবীৰে আৰম্ভ কৰা সশস্ত্ৰ সংগ্ৰামৰ পৰিসমাপ্তি ঘটিছিল ৬ষ্ঠ অনুসূচীৰ আধাৰত স্বায়ত্ব শাসন প্ৰদানৰ দ্বাৰা । বিএলটিয়ে সশস্ত্ৰ সংগ্ৰামক পথ হিচাপে লৈছিল আৰু একে দাবীক সফল কৰিবলৈ নিখিল বড়ো ছাত্ৰ সন্থাই গণতান্ত্ৰীক প্ৰক্ৰিয়াৰে কাম কৰিছিল । বিজেপি চৰকাৰ কেন্দ্ৰত থকা সময়ত লালকৃষ্ণ আদৱানীৰ ছত্ৰছায়াত বিটিচি চুক্তিয়ে খুব কম সময়ৰ ভিতৰতে বড়োলেণ্ডত শান্তিৰ পৰিবেশ এটা সৃষ্টি কৰিছিল । বিটিচি গঠনৰ পিছত হোৱা নিৰ্বাচনত প্ৰাক্তণ বিএলটি নেতাৰ দ্বাৰা জন্ম হোৱা বিপিএফ দলে প্ৰতিবাৰেই জয়ী হৈ আহিছিল । আবছু সমৰ্থিত  প্ৰা্ৰ্থিৰ পৰাজয় নিয়মত পৰিণত হয় । বিপিএফ আৰু আবছুৰ মাজৰ সম্পৰ্ক কেতিয়াও ভাল হোৱাৰ নাম নল’লে । উৰ্খা গৌৰা ব্ৰহ্মই লোকসভাৰ প্ৰতিটো নিৰ্বাচনত পৰাজিত হ’ল আৰু বিপিএফৰ পৰা চাংচুমা খুংগুৰ নিৰ্বাচিত হৈ দিল্লী পালে । সামাজিক ক্ষেত্ৰত জনপ্ৰিয় আবছুৰ নিৰ্বাচনী ৰাজনীতিত দুৰ্বল পাৰফৰ্মেঞ্চ বিটিচিৰ বাহিৰৰ মানুহৰ কাৰণে বোধগম্য নাছিল ।

২০২০ৰ আগলৈ আবছু কিয় বাৰে বাৰে নিৰ্বাচনত পৰাজিত হৈছিল ?

প্ৰতিটো নিৰ্বাচনত বড়োভাষী ভোটাৰৰ সমৰ্থন আবছুৱে পাইছিল , কিন্তু আবছুৰ ওপৰত থকা উগ্ৰ ভাষাকেন্দ্ৰীক জাতীয়তাবাদী লেবেল খনৰ বাবে আন জাতি -গোষ্ঠীৰ সমৰ্থন আশানু্ৰুপ নাছিল । অন্যহাতে ৰাজনৈতিক ভাবে বিচক্ষণ হাগ্ৰামা মহিলাৰিয়ে বড়োভাষীৰ ভোটৰ ওপৰত নিৰ্ভৰ নকাৰকৈয়ে নিৰ্বাচন জিকি গ’ল । নব শৰণীয়াই নিৰ্বাচনত অৱতীৰ্ণ নোহোৱালৈকে হাগ্ৰামা মহিলাৰী আছিল অপ্ৰতিদন্দী নেতা । ২০১৪ চনৰ লোকসভা নিৰ্বাচনত বড়ো ভাষী আৰু অন্য ভাষা-ভাষী ভোটৰ পোলাৰাইজেচন হ’ল আৰু একমাত্ৰ অবিভক্ত অসমৰ ইচ্ছ্যুত হীৰা শৰণীয়া জয়ী হৈছিল ।ভোটৰ সংখ্যাত বিটিআৰ এলেকাত সৰ্ব বৃহত গোষ্ঠীতো হৈছে পুৰ্ব বংগীয় মুলৰ মুছলমান খিনি । ২০১৪ নিৰ্বাচনত এই গোষ্ঠীটোৱে হীৰা শৰণীয়াক সমৰ্থন দিয়াৰ ফলত ৰেকৰ্ড ভোটত হীৰা শৰনীয়া জয়ী হয় । কিন্তু বিধানসভা আৰু কাউন্সিলৰ নিৰ্বাচনত হীৰা শৰনীয়াক সমৰ্থন দিয়া সিংহভাগ ভোটাৰে বিপিএফকে সমৰ্থন দি গ’ল ।
নিৰ্বাচন যিহেতু সংখ্যাৰ খেল , সেয়া নিৰ্বাচনত আবছুৱে আশা কৰা ফল নাপালে । ২০১৯ চনৰ পৰা সময় সলনি হ’বলৈ আৰম্ভ কৰে । ২০১৯ চনৰ লোকসভা নিৰ্বাচনত হীৰা শৰনীয়াই পোৱা ভোট দৃষ্টিকুট ভাবে কমে ।২০১৪ চনৰ তুলনাত প্ৰায় ২ লাখ ভোট বৃদ্ধি পায় ২০১৯ চনৰ নিৰ্বাচনত । হীৰা শৰণীয়াই পুৰ্বতকৈ দুই লাখ ত্ৰিশ হাজাৰ(প্ৰায়) ভোট কম পালে । ভোট বৃদ্ধি পায় কংগ্ৰেছৰ আৰু বিপিএফৰ । ইউপিপিএলে পোৱা ভোট ২০১৪ আৰু ২০১৯ চনত প্ৰায় সমান হৈয়ে থাকে । অৰ্থাৎ হীৰা শৰণীয়াৰ ভোট কংগ্ৰেছ আৰু বিপিএফলৈ ট্ৰেন্সফাৰ হয় । হীৰা শৰণীয়াৰ লগত থকা পুৰ্ব বংগীয় মুছলামন ভোটৰ এটা বৃহৎ অংশ কংগ্ৰেছলৈ যায় আৰু আন সৰু সৰু গোষ্ঠীৰ ভোট বিপিএফলৈ ট্ৰেনসফাৰ হয় । বিজেপি আৰু বিপিএফ মিত্ৰজোঁটত থকাৰ ফলত স্বাভাবিক ভাবেই ধৰ্মীয় সংখ্যালঘুৰ সমৰ্থন বিপিএফে পোৱা নাছিল । তৎস্বত্তেও মাত্ৰ ৫০হাজাৰ ভোটৰ ব্যৱধানত হীৰা শৰণীয়া জয়ী হয় ।  ২০২০ চনৰ পৰিষদীয় নিৰ্বাচন । বিশেষ সুত্ৰৰ পৰা পোৱা তথ্য মতে সৰ্বানন্দ সোণোৱালে মাত্ৰ ১০ টা সমষ্টিত নিৰ্বাচন খেলাৰ কথা ভাবিছিল । কিন্তু হিমন্ত বিশ্ব শৰ্মাই নিজৰ অভিজ্ঞতাৰ পৰা বুজি পাইছিল যে সংখ্যাৰ শক্তি নাথাকিলে পৰিষদত হাগ্ৰামা মহিলাৰীৰ পৰা গুৰুত্ব পোৱা কঠিন। কংগ্ৰেছৰ লগত বিপিএফ থকা সময়ছোৱাটো স্থানীয় কংগ্ৰেছ কৰ্মীয়ে গুৰুত্ব পোৱা নাছিল আৰু বিপিএফৰ লগত বিজেপি থকা সময়ছোৱাটো বিজেপিৰ স্থানীয় কৰ্মীয়ে গুৰুত্ব আদায় কৰিব পৰা নাছিল ।
কংগ্ৰেছৰ দিনত দলীয় নীতি নিৰ্ধাৰণত ৰাহুল গান্ধীয়ে হিমন্ত বিশ্ব শৰ্মাক গুৰুত্ব প্ৰদান কৰা নাছিল , কিন্তু ২০২০ চনৰ পৰিষদীয় নিৰ্বাচনত হিমন্ত বিশ্ব শৰ্মাই বিজেপিৰ কেন্দ্ৰীয় নেতৃত্বৰ গ্ৰীণ চিগনেল পালে আৰু পলমকৈ হ’লেও বিটিচি নিৰ্বাচনত সৰ্ব শক্তিৰে নামিছিল । ২০১৪ চনৰ লোকসভা নিৰ্বাচনত  প্ৰাক্তণ আলফা নেতা হীৰা শৰণীয়াক এশ শতাংশ সমৰ্থন দিয়া  আৰু ২০১৯ লোকসভা নিৰ্বাচনত ইউপিপিএলক কিছু সমৰ্থন দিয়া সৰ্ববৃহৎ ভোট বেংক পুৰ্ব বংগীয় মুছলামন ভোটাৰে ২০২০ ৰ পৰিষদীয় নিৰ্বাচনত বিজেপি বিৰোধী স্থিতি পুনৰ ল’লে । যিহেতু বিটিচিত এআইইউডিএফ আৰু কংগ্ৰেছৰ স্থিতি দুৰ্বল সেয়ে বিজেপিয়ে বিৰোধ কৰা বিপিএফক একচেতীয়া সমৰ্থন দিলে । বড়োভাষী ভোট আগৰ কেইবাৰৰ দৰেই আবছুৱে পালে , যদিও হিমন্ত বিশ্ব শৰ্মাৰ কৌশলত বিজেপিয়ে নিজৰ স্থিতি সুদৃঢ় কৰিলে । হীৰা শৰণীয়াই উপলব্ধি কৰিলে তেওঁৰ পুৰ্ব বংগীয় মুছলমান ভোটক কেন্দ্ৰ কৰি গঢ়ি উঠা ৰাজনৈতিক ভৱিষ্যতৰ আসন্ন শুন্যতা । মাত্ৰ ১খন আসনতেই সন্তুষ্ট থাকিবলগীয়া হ’ল গণ সুৰক্ষা পাৰ্টী । বিটিছিত সংখ্যাধিক বড়োভাষী ভোটাৰে ভোট দিয়া দলে প্ৰথমবাৰৰ বাবে চৰকাৰ কৰিলে আৰু অবড়ো আবেগ আৰু সংশয়ক ভিত্তি  কৰি জন্ম লাভ কৰা গণ সুৰক্ষা পাৰ্টীয়েও প্ৰথমবাৰৰ বাবে বিটিচ চৰকাৰত নিজৰ প্ৰতিনিধি পালে । হীৰা শৰণীয়া আৰু প্ৰমোদ বড়োৰ মিত্ৰতাই বিটিচি অঞ্চলত জাতিগঠন প্ৰক্ৰিয়াক মজবুত কৰিব বুলি জনতাই ধাৰণা কৰে । কিন্তু এই কাম তৰান্বিত হৈ থাকিবলৈ কেন্দ্ৰত আগন্তুক ১০-১৫ বছৰৰ কাৰণে বিজেপি চৰকাৰ থাকিব লাগিব । কেন্দ্ৰত বিজেপি চৰকাৰ থকা মানেই ৰাজ্যত চৰকাৰ সলনি নহয় । প্ৰমোদ বড়ো , হীৰা শৰণীয়া আৰু হিমন্ত বিশ্ব শৰ্মাৰ আগন্তুক কৰ্ম পদ্ধতিয়ে বিটিআৰ অঞ্চলত সম্প্ৰীতিৰ পৰিবেশক প্ৰভাব পেলায় থাকিব ।