শুই থকা মানুহে হাহঁ ধৰিব পাৰিবনে?

• তাৰক দাস

৪ জুনত নিৰ্বাচনৰ ফলাফল ঘোষণা হ’ব। ৰাজনীতিত সম্যক জ্ঞান থকা মানুহে বুজি পায় যে দেশত পুনৰ বিজেপিৰ চৰকাৰ হ’বলৈ গৈ আছে। একেৰাহে তৃতীয়বাৰ ৰাহুল গান্ধী বা কংগ্ৰেছ পৰাজিত হ’ব। এতিয় প্ৰশ্ন হ’ল নৰেন্দ্ৰ মোদী কিয় পুনৰ জয়ী হ’ব? বিজেপিয়ে দেশৰ সকলো মানুহৰ আশা আকাঙ্ক্ষা পুৰণ কৰিলে নেকি? মোদীৰ বিৰূদ্ধে কোনো অসন্তুষ্টি নাই নেকি? যোৱা দহ বছৰত মোদীয়ে বহু ভাল কাম কৰিছে যদিও বিৰোধীৰ বাবেও সুবিধা বহুত আছিল। ৰাম মন্দিৰ আৰু ৩৭০এ হিন্দুবাদীক আনন্দিত কৰিলে। উচ্চ খাপৰ দুৰ্নীতি কমিছে বুলি ৰাইজে বিশ্বাস কৰে, ঘাইপথ নিৰ্মান কৰি গাডকাৰীয়ে ৰেকৰ্ড গঢ়িলে, বিশ্বত ভাৰতৰ সন্মান বাঢ়িল ইত্যাদি। ৰাইজৰ বহু সমস্যা সমাধান কৰাত মোদী চৰকাৰ ব্যৰ্থও হ’ল। নিবনুৱা সমস্যা, মুল্যবৃদ্ধি ,কৃষক আন্দোলন আদি চৰকাৰখনৰ ব্যৰ্থতা। এই ব্যৰ্থতা খিনি কংগ্ৰেছে ৰাইজৰ মাজত লৈ যোৱাৰ বাবে যঠেষ্ট। তাৰ বাবে সঠিক পৰিকল্পনা লাগিব, নেতা লাগিব,বক্তা লাগিব। কিন্তু কংগ্ৰেছে ২০১৪ৰ পৰা দল চলাই আছে ৰাহুল গান্ধী আৰু তেওঁৰ দুজন তোষামোদকাৰী জয়ৰাম ৰমেশ আৰু ৰনদ্বীপ সুৰযেৱালাই। ৰাহুল গান্ধীৰ না ৰাজনৈতিক জ্ঞান আছে না তেওঁ ভালকৈ কথা ক’ব পাৰে। কেৱল তেওঁৰ অনুগত সকলে যি লেখি দিয়ে তাক ভাটৌৰ দৰে মাতিব পাৰে। দেশৰ সাধাৰণ নিৰ্বাচন আমেৰিকাৰ ৰাষ্ট্ৰপতি নিৰ্বাচনৰ দৰে হৈ পৰিছে যত বিৰোধীয়ে মোদীৰ বিৰূদ্ধে প্ৰাৰ্থী আগতীয়াকৈ ঘোষণা কৰাটো দৰকাৰ। পথাৰত ধান পকি আছে। কংগ্ৰেছে ধান কাটি চাউল উলিয়াই খাব জানিব লাগিব। তেওঁলোকে ধাৰণা কৰে যে পথাৰৰ পৰা ধান আহি নিজে নিজে চাউল হৈ তেওঁলোকৰ মুখত পৰিব। ৪ জুনত কংগ্ৰেছে বহুতক দোষ দিব। তাৰ ভিতৰত ইলেকচন কমিচন , মিডিয়া,ইভিএম ইত্যাদি। এইখিনিতে মনত পৰে এই শ্বেৰটোলৈ ” চাৰা উমৰ ইয়ে ভুল কেৰতা ৰহা, ধুল চেহৰে পে থী,আইনা চাফ কৰতা ৰহা।’