Sunday, July 25, 2021
Home Blog

আগন্তুক ৫ বছৰত হিমন্ত বিশ্ব শৰ্মাৰ ৪টা প্ৰাথমিকতা

  • পাৰ্থ প্ৰতীম লহকৰ

ৰাজনীতি অসম’ (WWW.RAJNITIAXOM.COM) : তিনি বছৰ: ২ লাখ ১২ হাজাৰ পঢ়ুৱৈ


হিমন্ত বিশ্ব শৰ্মা এজন কৌশলী ৰাজনেতা , চানক্য ইত্যাদি বিশেষণেৰে তেওঁক সম্বোধন কৰা হয় । এইজন ব্যক্তিয়েই কটন কলেজৰ ছাত্ৰ ৰাজনীতিক নতুন মাত্ৰা প্ৰদান কৰিছিল । তেওঁ পঢ়ি থকা সময়ত কলেজখনৰ ৰাজনীতিত দলীয় ৰাজনৈতিক নেতা , মন্ত্ৰীৰ প্ৰভাব আছিল লক্ষণীয় । হিতেশ্বৰ শইকীয়াৰ পৰা ৰাজনীতি শিকা হিমন্ত বিশ্ব শৰ্মাই যেতিয়া সংসদীয় নিৰ্বাচনত ভৰি দিছিল তেতিয়া কৌশলী যুবকজন পৰাজিত হৈছিল বিধান সভাৰ নিৰ্বাচনত ।  জালুকবাৰীৰ সমষ্টিৰ পৰা  পৰাজিত হোৱা হিমন্ত বিশ্ব শৰ্মাৰ লগত যদি পিয়ুষ হাজৰিকা , তৰংগ গগৈ , জয়ন্ত মল্ল বৰুৱা , গৌৰৱ গগৈ আদি যুব নেতাৰ তুলনা কৰা যায় তেন্তে হিমন্ত বিশ্ব শৰ্মাৰ তুলনাত এওঁলোক সফল । পৰাজয়ৰ মুখ এওঁলোকে দেখা নাই । এজন নেতাৰ জয় পৰাজয় , সফলতা বিফলতা সকলো সময় সাপেক্ষ । ৰাজনৈতিক প্ৰেক্ষাপটত  ব্যক্তিগত ভাবে ২০২১ চনটো হিমন্ত বিশ্ব শৰ্মা  অতি সফল বছৰ । কিন্তু মুখ্যমন্ত্ৰী , প্ৰধানমন্ত্ৰীৰ পদ লাভ কৰাৰ পিছতেই এজন ব্যক্তিৰ সফলতাৰ মাপকাঠি  সলনি হয় । ব্যক্তিজনৰ লগত জড়িত আন নেতা কৰ্মী বা নিকট ব্যক্তিসমুহৰ কাৰণে ক্ষমতা আৰু উপাৰ্জনৰ পথ পুৰ্বতকৈ অধিক ক্ষিপ্ৰ হয় । কিন্তু নতুন আসনত বহা ব্যক্তিজন আৰু তেওঁৰ পৰিয়ালৰ কাৰণে সময়বোৰ সম্পুৰ্ণ সলনি হয় । এনেকুৱা এক সময়ৰ সন্ধিক্ষণত ৰাজনেতা আৰু তেওঁৰ নিকট ব্যক্তিসকলৰ  সংযত আচৰণে দেশ বা ৰাজ্যখনৰ ভৱিষ্যতৰ লগতে ব্যক্তিজনৰো ভৱিষ্যত  নিৰুপন কৰে । ১৯৮৫ ৰ পৰা অসমত নতুন সামাজিক চৰিত্ৰ এটাই ঠন ধৰি উঠিছিল ।  ক্ষমতাৰ প্ৰকোপত এটা ৰাতিত ধনী হৈ আভিজাত্য জীৱন ধাৰণ কৰাৰ লক্ষ্যত অসমৰ যুবচাম নামি পৰিছিল আৰু সেই স্বভাবে এতিয়া চৰিত্ৰৰ ৰূপ লৈছে । অসমৰ যিকোনো ছাত্ৰ সংগঠনৰ পৰা গৈ মন্ত্ৰী ,বিধায়ক , সাংসদ হৈ ক্ষমতাৰ সোৱাদ লৈ নিজস্ব স্বাৰ্থ সিদ্ধি কৰাৰ পৰম্পৰাই অসমৰ প্ৰতিটো কোণৰ যুব সামজক মেৰিয়াই লৈছে । এনে এক পৰম্পৰাৰ প্ৰথম চিকাৰ হৈছিল প্ৰফুল্ল কুমাৰ মহন্ত । যিটো সময়ত  জাতিপ্ৰেমীৰ লেবেল লগোৱা একাংশ সাংবাদিক ,শিক্ষাবিদ , ব্যৱসায়ী , ঠিকাদাৰ , বিষয়া আৰু অধিকাংশ অগপ নেতাৰ স্বপ্ৰেমী কাৰ্য্যপন্থাই প্ৰফুল্ল মহন্তৰ ৰাজনৈতিক ভৱিষ্যতক প্ৰায় ধ্বংস কৰি পেলালে । কিন্তু তেওঁৰ দ্বাৰা পালিত ব্যৱসায়ী , ঠিকাদাৰসকল আজিৰ তাৰিখত চৰকাৰৰ লগত থাকি চৰম সুখত নিজৰ ব্যৱসায় বিস্তাৰ কৰি আছে । প্ৰফুল্ল মহন্তৰ নেতৃত্বত অগপ কৰা নেতাসকল কংগ্ৰেছ , বিজেপি বা বিপিএফ প্ৰতিটো দলতেই শক্তিশালী ভুমিকা লৈ আছে বা  বৰণ সলনি কৰি বিধায়ক, মন্ত্ৰী হ’বলৈও সক্ষম হৈ আছে ।

হিমন্ত বিশ্ব শৰ্মাৰ এতিয়া মিত্ৰৰ অভাব নাই । বিৰোধী দলটো মিত্ৰৰ অভাব নাই তেওঁৰ কাৰণ ক্ষমতাৰ ৰাজনীতিত তোষামোদ এতিয়া অন্যতম আহিলা ।   স্পষ্ট কথা হিমন্ত বিশ্ব শৰ্মাৰ সন্মুখত দুটা পথ আছে । মধ্যস্থান তেওঁ ল’ব নোৱাৰে । কাৰণ বিজেপি আৰু হিমন্ত বিশ্ব শৰ্মাক লক্ষ্য কৰি ভোট দিয়া জনতাৰ আকাংক্ষাক মধ্যস্থানে প্ৰশমিত কৰিব নোৱাৰে ।  সৰ্বানন্দ সোণোৱাল , তৰুণ গগৈ ,  হিতেশ্বৰ শইকীয়াৰ দৰে মুখ্যমন্ত্ৰীয়ে অসমত উন্নয়নৰ বাট খৰতকীয়া কৰাত বিশেষ ভুমিকা লৈছিল । কিন্তু জাতীয় সমস্যা সমাধানত বিশেষ  সফল নহ’ল । উল্লেখ্য যে হিতেশ্বৰ  শইকীয়াই চেষ্টা কৰিছিল যদিও সেই সময়ত একাংশ সাংবাদিক -বুদ্ধিজীবীৰ কুটিল খেলত শইকীয়া পৰাস্ত হয় ।হিতেশ্বৰ শইকীয়া বিফল হোৱাৰ আঁৰত এজন বিশেষ ব্যক্তিৰ নামো উচ্চাৰিত হৈছিল । সেই সময়ত কেন্দ্ৰ চৰকাৰৰ গৃহ মন্ত্ৰী তথা কাশ্মীৰৰ পিদিপি নেতা মুফতি মহম্মদ চৈয়দৰ ভুমিকাও লক্ষনীয় বুলি বিবেচনা কৰিব পাৰি । কোকৰাঝাৰ , বঙাইগাওঁ সামৰি এক বিস্তীৰ্ণ অঞ্চলত খিলঞ্জীয়া বড়োভাষী আৰু পুৰ্ব বংগীয় মুছলামানৰ মাজত চলা সংঘৰ্ষক শইকীয়া চৰকাৰে দমন কৰিব নোৱাৰিলে । কেন্দ্ৰীয় মন্ত্ৰী ৰাজেশ পাইলতে পুৰ্ব বংগীয় মুছলমানৰ হাতত অস্ত্ৰ যোগান ধৰিব বুলি ঘোষণা কৰাৰ বাতৰি বিভিন্ন কাকতত প্ৰকাশ পাইছিল ।  যিয়েই নহওক হিতেশ্বৰ শইকীয়াক বিচক্ষণ ৰাজনেতাৰ বাহিৰে আন বিশেষণেৰে সম্বোধন কৰাৰ সুযোগ অসমৰ ৰাইজে নাপালে ।
প্ৰফুল্ল মহন্তৰ সময়ত চলা দুৰ্নীতি , মন্ত্ৰী-বিষয়াৰ ব্যক্তিগত স্বাৰ্থলোভী কুটনীতি , আলফাৰ সমান্তৰাল চৰকাৰৰ লগে লগে আলফাৰ পৰিয়ালৰ ওপৰত গুপ্তহত্যাৰ ঘটনাই প্ৰফুল্ল মহন্তক ক্ষমতাচ্ছ্যুত কৰিলে । ২০০১ চনৰ নিৰ্বাচনত অগপক ৰাইজে বিদায় দিয়াৰ পিছত অগপ আৰু প্ৰফুল্ল মহন্তই আজিলৈকে ৰাজনীতিৰ পথাৰখনত মুৰ দাঙিব পৰা নাই । অসম আন্দোলনৰ সময়ৰ ব্ৰহ্মপুত্ৰ উপত্যকাৰ অসমীয়াভাষীৰ চকুৰ মণি আৰু দুইবাৰ মুখ্যমন্ত্ৰী প্ৰফুল্ল মহন্ত বৰ্তমান সময়ৰ ৰাজনীতিত কিমান প্ৰাসংগিক সকলোৱে প্ৰত্যক্ষ কৰিছে । ৮৫’ ত সুৰ্য্যৰ দৰে জিলিকি উঠা প্ৰফুল্ল মহন্তৰ ৰাজনীতিত এতিয়া চলিছে সুৰ্য্য গ্ৰহণ ।
সাধাৰণ আন দহজন মুখ্যমন্ত্ৰীৰ দৰে হিমন্ত বিশ্ব শৰ্মাও এজন মুখ্যমন্ত্ৰী হোৱাত বাধা নাই । কাৰণ কেন্দ্ৰৰ বিজেপি চৰকাৰে অসমক সদায় গুৰুত্ব প্ৰদান কৰি থাকিব । ঐতিহাসিক ভাবে জনসংঘৰ নেতা সকলেও অসমক জিন্নাৰ কব্জাৰ পৰা উদ্ধাৰ কৰাত স্থানীয় নেতা গোপীনাথ বৰদলৈক সহায় কৰিছিল । হিমন্ত বিশ্ব শৰ্মাই যদি নিজৰ নামটোক যুগমীয়া কৰি ৰাখিব বিচাৰে তেন্তে গোপীনাথ বৰদলৈৰ পথ লব লাগিব । যুগমীয়া হৈ থাকিবলৈ দহ – পোন্ধৰ বছৰ দায়িত্বত থকাৰ প্ৰয়োজন নাই । গোপীনাথ বৰদলৈয়ে সেই সময়ত চাদুল্লাৰ কুটনীতিক বাধা দিয়াত সম্পুৰ্ণ সফল হ’ব নোৱাৰিলে, একমাত্ৰ কংগ্ৰেছৰ নেতৃত্বত থকা আবুল কালাম আজাদ আৰু জৱাহৰলাল নেহৰুৰ বাবে । অসম আৰু অসমবাসীৰ সুৰক্ষাৰ লক্ষ্যত গোপীনাথ বৰদলৈৰ আধৰুৱা হৈ থকা কামক সম্পুৰ্ণ কৰাৰ পুৰ্ণ সুযোগ হিমন্ত বিশ্ব শৰ্মাৰ হাতত আছে । অন্যথা জিন্নাৰ আধৰুৱা সপোনক বাস্তৱ ৰূপ দিয়াবলৈ অসমত মৌলবাদী ইচলামিক নেতাৰ অভাব নাই আৰু জিন্নাৰ বন্ধু দেশদ্ৰোহী যোগেন্দ্ৰ নাথ মণ্ডলৰ দৰে হিন্দু ৰাজনৈতিক নেতাৰ অভাবো অসমত নাই । খিলঞ্জীয়া জনগোষ্ঠীৰ পৰ্যাপ্ত সংৰক্ষণৰ দ্বাৰা বিধান সভাত খিলঞ্জীয়াৰ সংখ্যাগৰিষ্ঠতা অটুট ৰখা, অসমত অতীজৰে পৰা বাস কৰি অহা প্ৰতিজন ভাৰতীয় মানুহে অসমৰ উন্নয়নত নিজকে সমৰ্পিত কৰিব পৰা
পৰিবেশ ৰচনা কৰা , গোহত্যা বন্ধ কৰা , সমষ্টি পুনৰ নিৰ্ধাৰণৰ লগতে জন সংখ্যা বিস্ফোৰণ বিৰোধী কঠোৰ আইন প্ৰনয়ণৰ দৰে বিষয় সমুহ আগন্তুক ৫ বছৰত সম্পুৰ্ণ হব লাগিব । উন্নয়নৰ দিশটো তৰুণ গগৈ বা সৰ্বানন্দ সোণোৱালৰ সময়তো হৈছিল আৰু কেন্দ্ৰত নৰেন্দ্ৰ মোদীৰ চৰকাৰ থকালৈ ৰাজ্যত উন্নয়ন পথ স্তব্ধ নহয় । এইখিনি কাম যদি নহয় তেন্তে আগন্তক কালত জনতাই এইজন বিচক্ষণ নেতাক আন দহজন নেতাৰ দৰে পাহৰি যাব । মাত্ৰ এচাম তোষামোদকাৰী আৰু আত্মপ্ৰেমী ঠিকাদাৰ ,ব্যৱসায়ীৰ পৰিয়ালতেই তেওঁৰ চৰ্চা সীমাবদ্ধ হৈ থাকিব ।

ৰূপজ্যোতি কুৰ্মীৰ আগমন মাষ্টাৰ ষ্ট্ৰোক

  • প্ৰিয়াংকু নাৰায়ণ বৰুৱা

ৰাজনীতি অসম’ (WWW.RAJNITIAXOM.COM) : তিনি বছৰ: ২ লাখ ১২ হাজাৰ পঢ়ুৱৈ


সাম্প্ৰতিক সময়ৰ গুৰুত্বপূৰ্ণ কৌতুহল “কেৱল সভাপতি পদ”নোপোৱাৰ ক্ষোভতেই দলত্যাগ কৰিলে নেকি কট্টৰ কংগ্ৰেছী ৰূপজ্যোতি কুৰ্মীয়ে? ইয়াৰ আৰতো আছে নেকি বিশেষ কোনো চৰ্চাৰ দিশ!স্বাভাৱিকতে প্ৰশ্নৰ উদ্ৰেক হয় একপ্ৰকাৰ কংগ্ৰেছৰ দুৰ্গত মোক্ষম আঘাত হানি মুখ্যমন্ত্ৰী ড:হিমন্ত বিশ্ব শৰ্মাৰ উপস্থিতিত কংগ্ৰেছ দলৰ পৰা নিৰ্বাচিত মৰিয়নি সমষ্টিৰ সদ্যপদত্যাগী বিধায়ক ৰূপজ্যোতি কুৰ্মীৰ বিজেপিত যোগদান কিহৰ ইংগিত! নিৰ্বাচন যোৱাৰ পিছতো কাৰ্যতঃ যেন কংগ্ৰেছৰ পিছ এৰা নাই দাদা বিগ্ৰেদ আৰু ৰাজ্যিক বিজেপিৰ থিংক টেংক।কাৰ্যতঃ মুখ্যমন্ত্ৰী ড:শৰ্মাই ৰাজ্যখনৰ প্ৰগতিৰ বাবে সকলোকে লৈ আগবঢ়াৰ পথত পূৰ্ববংগীয় পৃষ্ঠপোষকসকল অথবা অতি অভিলাষী সেইসকলৰ সৈতে আপোচকামী চৰিত্ৰ বহন কৰা সকলক বাদ দি যেন বিধানসভাটো খিলঞ্জীয়া একত্ৰিকৰণৰ লক্ষ্যৰে আগবাঢ়িছে।এই দিশত যেন বিচক্ষণ আৰু লক্ষ্য সন্মুখত ৰাখি আগবঢ়া মুখ্যমন্ত্ৰী ড:শৰ্মাই আগ্ৰাসীৰূপেৰে পূৰ্ব অভিজ্ঞতা তথা সকলো ধৰণৰ সুসম্পৰ্কক পুনৰুজ্জীৱিত কৰণৰ প্ৰতি গভীৰ মনোনিৱেশৰ তাৎপৰ্যপূৰ্ণ সংকেত প্ৰেৰণ কৰিছে।গোলাঘাটৰ শক্তিশালী কংগ্ৰেছ বিধায়িকা অজন্তা নেওঁগক নিৰ্বাচনী প্ৰাকক্ষণত ভাজপা দললৈ আদৰা তথা বিজেপিৰ টিকটত বিজয় লাভ সহ পৰৱৰ্তী সময়ত মন্ত্ৰীত্ব প্ৰদানেৰে উপযুক্ত সন্মান প্ৰদান এফালে যেনেকৈ ভাজপাৰ বিচক্ষণতা আনফালে নিৰ্বাচনী প্ৰাকক্ষণতে কংগ্ৰেছৰ কঁকালত মৰ কোব শোধোৱা গদা ঘূৰোৱাজন কোন ৰাইজে নক’লেও বুজিব।মূলতঃ কংগ্ৰেছ দলটোৰ নাড়ী নক্ষত্ৰৰ গভীৰ উমান থকা ড:শৰ্মাই আভ্যন্তৰীণ বেমেজালিৰ সময়তে যেন কংগ্ৰেছৰ শেহতীয়া ৰাজনৈতিক দৰ্শনৰ প্ৰতি বীতশ্ৰদ্ধ একাংশ বিধায়কক ভাজপালৈ আদৰি খিলঞ্জীয়া পক্ষ অধিক সৱল কৰি তুলিবলৈ তৎপৰ হৈ পৰিছে।কংগ্ৰেছত সম্প্ৰতি খিলঞ্জীয়াই উশাহ ল’ব নোৱাৰা অৱস্থা বুলি একাংশ কংগ্ৰেছ নেতাই কংগ্ৰেছ-এ ইউ ডি এফৰ মিত্ৰতাৰ পৰৱৰ্তী সময়তে উষ্মা প্ৰকাশ কৰা দেখা গৈছিল।মূলতঃ চাহ জনগোষ্ঠীৰ অন্যতম শক্তিশালী নেতা তথা মৰিয়নি সমষ্টিৰ চাৰিবাৰৰ বিধায়ক ৰূপজ্যোতি কুৰ্মীৰ দৰে মজ্জাগতভাৱে কংগ্ৰেছীৰো যেন ধৈৰ্যচ্যুতি ঘটিছিল।নিৰ্বাচনৰ সময়তে অংকিতা দত্তইও শীৰ্ষ নেতৃত্বৰ পৰা যথোচিত সহায় নোপোৱা বুলি উল্লেখ কৰা বোধহয় অসমৰ ৰাইজৰ মনত আছে।মেডিয়া ষ্টান্টমেন হিচাপে কুৰ্মীয়ে সময়ে সময়ে কিছু বিভ্ৰান্তিকৰ আচৰণ কৰি আহিলেও জনাই জানে বুজাই বুজে শূণ্য সময়তো ৰাজনীতিত হাইলাইট হোৱাৰ সেইবোৰ কৌশলহে।কিন্তু তাৰ অৰ্থ এইটো কাহানিও নাছিল যে ৰূপজ্যোতি কুৰ্মী ৰাজনৈতিকভাৱে অপৰিপক্ক।বৰঞ্চ অত্যন্ত পৰিপক্কতাৰে কুৰ্মীয়ে আবেগ পৰিহাৰি কংগ্ৰেছ ত্যাগৰ সিদ্ধান্ত ল’লে এনে এক সময়ত যি সময়ত এ ইউ ডি এফ আৰু কংগ্ৰেছৰ মিত্ৰতা সম্পৰ্কত ৰাইজৰ মাজত বিৰূপ প্ৰতিক্ৰিয়া তীব্ৰতৰ হোৱা পৰিলক্ষিত হৈছে।সম্ভৱতঃ অচিৰেই আৰু কেবাজনো শীৰ্ষ কংগ্ৰেছী বিজেপিমুখী হোৱাৰ সম্ভাৱনা আছে।এনে এক প্ৰেক্ষাপটত কংগ্ৰেছৰ সভাপতি ৰিপুন বৰাই এ ইউ ডি এফৰে মিত্ৰতা সম্পৰ্কত সহমত বাহাল ৰখাৰ পৰিপ্ৰেক্ষিতত দলটোৰ অভ্যন্তৰত চিৰাল ফাট পৰিলক্ষিত হোৱাৰ সমান্তৰালকৈ মুষ্টিমেয় শীৰ্ষনেতাৰ আকোৰগোজালিত অতিষ্ঠ বহুজনৰ অস্থিৰ মগজুত নৱৰত্ন তেলেৰে শীতলীকৰণৰ দিশে আগবাঢ়ি গৈছে ভাজপা।একপ্ৰকাৰ দলত প্ৰাপ্য মৰ্যদা হৃত  হোৱাত আৰু দলৰ অৰাজকতাৰ ক্ষণত মুখ্যমন্ত্ৰী ড: শৰ্মাৰ “Action First and Fast”নীতিৰ প্ৰতি বিৰাট আগ্ৰহী তথা আশাবাদী হৈ পৰিছে এসময়ত “দাদা” ডঃ শৰ্মাৰ সান্নিধ্য প্ৰাপ্ত তথা তেওঁৰ প্ৰতি আস্থাশীল বহু কংগ্ৰেছী নেতা-নেত্ৰী।

প্ৰশ্ন হয় লোকসভা নিৰ্বাচনলৈ দিন আছে।চৰকাৰখন নতুনকৈ হৈছেহে।আনকালে দেখা যায় বিজয়ী দলে আন দলৰ অভ্যন্তৰৰ বিষয় লৈ সততে ইমান মূৰ নঘমায়।কিন্তু  এইবাৰ দেখা গৈছে নিৰ্বাচনৰ পিছতো বি পি এফ অথবা কংগ্ৰেছৰ পৰা বিজেপিলৈ যোগদানৰ ধাৰাটো অব্যাহত আছে আৰু বেছ আকৰ্ষণীয় ৰূপ গ্ৰহণ কৰিছে।কিন্তু কিয় এই কুচকাৱাজ?স্বয়ং মুখ্যমন্ত্ৰীয়ে হাজাৰটা সমস্যাৰ সৈতে মোকাবিলা কৰি থাকিও কুৰ্মীৰ যোগদান অনুষ্ঠানত উপস্থিত থাকি আন বহুকেইজনলৈ দিলে সেউজ সংকেত।অৱশেষত সেইজন ৰূপজ্যোতি কুৰ্মীয়ে যি বিধায়কৰূপে নিৰ্বাচিতও হৈছিল তেওঁ ভাজপাত যোগদান কৰিলে।এসময়ত ভাৰত মাতা কী জয় বুলি ক’বলৈ অস্বীকাৰ কৰা একেজন মানুহেই কেৱল ভাৰত মাতা কী জয় বোলাতেই ক্ষান্ত নাথাকি ৰাষ্ট্ৰীয় স্বয়ংসেৱক সংঘক ক্ষমা বিচাৰিবলৈও মানসিক প্ৰস্তুতি ল’লে।এই সকলোবোৰ পৰিঘটনাক সুচাৰুৰূপে আগবঢ়াই নিয়া মানুহজনেই সম্ভৱতঃ অসমৰ বৰ্তমানৰ তীক্ষ্ণ মেধাৰ মুখ্যমন্ত্ৰী গৰাকী।তেওঁ ভালকৈয়ে বুজি উঠিছে যে জনসংখ্যা বিষ্ফোৰণৰ জ্বালামুখীত বহি থকা জাতিটোক ৰক্ষা কৰিবলৈ হ’লে যি জনসংখ্যা নীতি আনিব লাগিব তাৰ সঠিক প্ৰণয়ন তথা ৰূপায়ণৰ  বাবে লাগিব খিলঞ্জীয়া একতা।চাহ জনগোষ্ঠী-নেপালী গোৰ্খাকে ধৰি অসমৰ বায়ু -পানী-মাটিৰ সৈতে একাত্ম হৈ পৰা সকল তথা ভিন্ন জনজাতি- জনগোষ্ঠীৰ প্ৰাপ্য প্ৰদানেৰে সমবিকাশ সম্ভৱ তেতিয়াহে হ’ব যেতিয়া বেদখল আৰু আগ্ৰাসন ৰোধ হ’ব।ভাষিক ভাৱে অসমীয়া আজি সংকটত।উন্নয়নৰ সমান্তৰালকৈ জনবিষ্ফোৰণ-লাভজেহাদ,ধৰ্ষণৰ বিৰুদ্ধে আইন প্ৰণয়ন,ছয় নং দফা ৰূপায়ণ,সমষ্টি পুনঃ নিৰ্ধাৰণ আদি বহু প্ৰত্যাহ্বান আছে।থলুৱাৰ সুৰক্ষাৰ দিশত বহু কৰণীয় আছে।ভালুকৰ সাঙী হৈ পৰা এন আৰ চি খনৰ পুনৰীক্ষণৰ বিষয়টো কৰণীয় আছে।সকলোতকৈ ডাঙৰ কথা সন্দেহযুক্ত অবৈধ সকলৰ প্ৰত্যাহ্বান তথা সেইসকলৰ পৃষ্ঠপোষক ৰাজনৈতিক-অৰাজনৈতিক নেতা-দল-সংগঠন তথা বুদ্ধিজীৱিৰ প্ৰত্যাহ্বান ওফৰোৱাৰ প্ৰত্যাহ্বান আছে।নিৰ্বাচনৰ সময়ৰ সভ্যতাৰ যুঁজখনৰ কথা যেন পাহৰা নাই মুখ্যমন্ত্ৰী ডাঙৰীয়াই।সাধাৰণতে নিৰ্বাচনৰ বহু প্ৰতিশ্ৰুতি বতাহত উৰি অহা কমোৱা তুলাৰ লেখীয়া।আহে আৰু যায়।এইটো প্ৰতিটো ৰাজনৈতিক দলৰে ক্ষেত্ৰত স্বাভাৱিক।কিন্তু ড:শৰ্মাই যি সভ্যতাৰ যুঁজৰ কথা সভা সমিতিত কৈ আহিছে তাৰ লগত জড়িত আছে অসমৰ জাতীয় জীৱনৰ প্ৰতি ভাবুকি স্বৰূপ একাধিক প্ৰত্যাহ্বান তথা সেই সকলো প্ৰত্যাহ্বানক প্ৰত্যাহ্বান জনাই অসম তথা অসমবাসীক সুৰক্ষা দিয়াৰ গুৰু দায়িত্ব।অৱশ্যেই এই দিশটোত সফল হ’বলৈ নিৰন্তৰ প্ৰত্যাহ্বানৰ সন্মুখীন হ’ব লাগিব বুলি সম্ভৱতঃ ভাজপা চৰকাৰে প্ৰস্তুতি আৰম্ভ কৰা পৰিলক্ষিত হৈছে।প্ৰতিশ্ৰুতি ৰখাৰ পূৰ্বপৰিকল্পনাত ব্যস্ত নতুন চৰকাৰ।এয়া শুভলক্ষণ।
আগন্তুক সময়ত অসমত খিলঞ্জীয়াৰ ভৱিষ্যত সুৰক্ষিত কৰাৰ দিশত সৱল পদক্ষেপৰ অংশস্বৰূপেই ভাজপাই খিলঞ্জীয়া একত্ৰিকৰণৰ চলমান প্ৰয়াস অব্যাহত ৰখাত দৃষ্টি নিক্ষেপ কৰিছে।সমান্তৰালকৈ ছিণ্ডিকেট-কলাবজাৰ-ঘোঁচ-পক্ষপাতিত্ব নচলিব জাতীয় সঁকিয়নি,ড্ৰাগছ বেপাৰীৰ বিৰুদ্ধে ধাৰাবাহিক অভিযান,চোৰাং গৰুৰ বেহা ৰোধৰ দিশত কঠোৰ নিৰ্দেশ তথা ধাৰাবাহিক বেদখল উচ্ছেদৰ লগতে জনসংখ্যা নীতি সন্দৰ্ভত ইতিবাচক পদক্ষেপৰ দায়বদ্ধতাৰ নিৰ্দেশেৰে বিচক্ষণ মুখ্যমন্ত্ৰী গৰাকীয়ে আপোচহীন স্থিতিৰ ইংগিত দিয়া পৰিলক্ষিত হৈছে।মূলতঃ এই সমূহ পৰিকল্পনাৰ সঠিক ৰূপায়নৰ দিশত অভিভাৱক মন্ত্ৰী তথা বিধায়কসকলক সাঙুৰি মন্ত্ৰীমিত্ৰ আদি সূত্ৰ সময়ত বৰ উপযোগী বিবেচিত হ’ব যেন ধাৰণা। নিজৰ দল অথবা মিত্ৰজোঁটৰ বাহিৰেও অন্য দলৰো শুভাকাঙ্খীক সাঙুৰি শক্তিশালী আৰু সুৰক্ষিত অসম গঢ়াৰ দিশত এক পৰিকল্পিত মাষ্টাৰ প্লেনৰ ৰূপায়নত ব্যস্ত অসমৰ চতুৰ বুদ্ধি মুখ্যমন্ত্ৰীগৰাকী।সম্ভৱতঃ ৰূপজ্যোতি কুৰ্মীৰ আগমন এনে এক মাষ্টাৰ ষ্ট্ৰোকেই।।ইতিবাচক প্ৰেক্ষাপটত আমাৰ শুভকামনা সদায়েই।

জনসংখ্যা নীতি :বালো-গালো;সকলো খোলাকটিৰ তাল ?

  • বিশ্বজিত নাথ

ৰাজনীতি অসম’ (WWW.RAJNITIAXOM.COM) : তিনি বছৰ: ২ লাখ ১২ হাজাৰ পঢ়ুৱৈ


২০১৪ চনত কেন্দ্ৰত নৰেন্দ্ৰ মোদী চৰকাৰে শাসনভাৰ লোৱাৰ পিছৰে পৰা দেশৰ ৰাষ্ট্ৰবাদী মানুহখিনিৰ মোডী ডাঙৰীয়াৰ ওপৰত আশা-আকাংক্ষা বাঢ়ি যাবলৈ ধৰিলে। জন্মু-কাশ্মীৰৰ পৰা ধাৰা ৩৭০ প্ৰত্যাহাৰ কৰিলে। ৰামমন্দিৰৰ ঐতিহাসিক ৰায়দান। এতিয়া শেহতীয়াকৈ কঠোৰ জনসংখ্যা নিয়ন্ত্ৰণ আইন দেশজুৰি প্ৰণয়ন কৰাৰ ব্যাপক দাবী উত্থাপন হৈছে। সমান্তৰালকৈ দুটা সন্তান নীতি(Two Child Policy) প্ৰযোজ্য কৰাৰ কথাও আলোচিত হৈছে। কিন্তু এই আলোচনা কিমান বাস্তৱ সন্মত? ভাৰতবৰ্ষত ব্যাপক জনসংখ্যা বৃদ্ধিৰ কাৰণসমূহৰ বিজ্ঞানসন্মত আলোচনা আৰু তৰ্ক-বিতৰ্ক হৈছেনে? সেয়ে এই সন্দৰ্ভত এক আলোচনা কৰাৰ এক ক্ষুদ্ৰ প্ৰয়াস কৰিছোঁ।
  হয় জনসংখ্যা নিয়ন্ত্ৰণ হ’ব লাগে। দুটা সন্তান নীতি দেশজুৰি জাতি-ধৰ্ম-বৰ্ণ নিৰ্বিশেষে প্ৰযোজ্য হোৱা উচিত। কিন্তু ইয়াৰ ভিত্তি কি? এটা পৰিয়ালৰ দুটা সন্তান। It’s OK.ভাল কথা। কিন্তু এজন পুৰুষক লৈ নে এগৰাকী মহিলাকলৈ?এই সন্দৰ্ভত আমাৰ আৰু চৰকাৰৰ স্থিতি কি? যদিহে এগৰাকী মহিলাৰ দুটাতকৈ অধিক সন্তান থাকিলে তেওঁ চৰকাৰী সা-সুবিধাৰ পৰা বঞ্চিত হ’ব। তেন্তে এজন পুৰুষে প্ৰতি দুবছৰ-তিনিবছৰৰ মূৰে মূৰে এগৰাকী মহিলাক বিয়া পাতি দুটাকৈ সন্তান জন্ম দি বিবাহ বিচ্ছেদ কৰে। আকৌ সেই পুৰুষজনে আন এগৰাকী মহিলাক বিয়া পাতি আকৌ দুটা সন্তান জন্ম দিয়ে তেতিয়া তেওঁৰ বৰ্তমানৰ পৰিয়ালটোহে তেওঁৰ বৈধ পৰিয়াল হ’ব আৰু বৰ্তমানৰ পৰিয়ালটোহে চৰকাৰী ভাবে Accountable হ’ব। তেনেক্ষেত্ৰত হাজাৰ জন্ম নিয়ন্ত্ৰণ আইন প্ৰণয়ন কৰিও এই জনসংখ্যা বিস্ফোৰণ নিয়ন্ত্ৰণ কৰা সম্ভব নহয়। ইয়াৰ বাবে প্ৰথমতেই বহু-বিবাহ (Multiple Marriage) প্ৰথা বন্ধ হ’ব লাগিব। যিহেতু Muslim Personal Law Board অনুসৰি এজন পুৰুষে নিজৰ পত্নী থকাৰ পিছতো কোনো ধৰণৰ বিবাহ বিচ্ছেদ নকৰাকৈ চাৰি গৰাকীলৈ বিয়া পাতিব পৰাটো বৈধ তেনেক্ষেত্ৰত তেওঁলোকে চাৰি গৰাকী মহিলা বিয়া কৰাই সৰ্বোচ্চ আঠটাকৈ সন্তান জন্ম দিব পাৰে তেন্তে তেওঁলোকৰ ক্ষেত্ৰত এই জনসংখ্যা নিয়ন্ত্ৰণ আইনখন এক অৰ্থহীন বাগাড়াম্বৰত পৰিণত হ’ব। ইয়াৰোপৰি যদিহে এই পৰিয়াল পৰিকল্পনা ব্যৱস্থাটো সম্পূৰ্ণ ধৰ্মীয় এজেণ্ডা ভিত্তিক আৰু বুজাবুজিৰ চুক্তি অনুসৰি হৈ তেতিয়া?
   উদাহৰণস্বৰূপে মোৰ প্ৰথম পত্নীৰ যোগেদি মোৰ দুটা সন্তান। মই মোৰ প্ৰথম পত্নীক বুজালো যে সন্তান উৎপাদন কৰাটো ঈশ্বৰৰ ইচ্ছা। আমি যিমান সন্তান জন্ম দিম আমাৰ সিমান পূণ্য হ’ব। সন্তান অধিক জন্ম দিয়াটো আমাৰ ধৰ্মীয় এজেণ্ডা। মই প্ৰথমা পত্নীক বুজাই-বঢ়াই আৰু ভৱিষ্যতে ভৰণ-পোষণ কৰিম বুলি আকৌ দ্বিতীয় বিবাহ কৰালো। এই দ্বিতীয় বিবাহ কৰিও মোৰ আকৌ দুটা সন্তান। সেই একেটা সূত্ৰত মোৰ জৈৱিক তাড়না থকালৈকে মই পোন্ধৰ-বিশ গৰাকী বিয়া পাতি প্ৰায় ৮০-৯০ টা সন্তানৰ পিতৃ হলো। কিন্তু চৰকাৰী ভাবে Accountable হ’ব কেৱল মোৰ শেষৰ পত্নী গৰাকী আৰু সন্তান কেইটা। তেনেক্ষেত্ৰত মোৰ পূৰ্বৰ পত্নী কেইগৰাকীৰো বিবাহ বিচ্ছেদ হোৱাৰ বাবে মোৰ লগত কোনো Legal bindings নাথাকিব। ইফালে মোৰ প্ৰতিগৰাকী প্ৰাক্তন পত্নীয়ে দুই সন্তানৰ লগত স্বতন্ত্ৰ পৰিয়াল হিচাবে বাস কৰিব পাৰিব।আৰু দৰিদ্ৰ সীমাৰেখাৰ তলত থকা পৰিয়ালৰ বাবে চৰকাৰে প্ৰদান কৰা সকলো সা-সুবিধাও লাভ কৰি থাকিব।সেয়ে জনসংখ্যা নিয়ন্ত্ৰণ আইনৰ লগতে এই বহু বিবাহ(Multiple Marriage) বন্ধ হ’ব লাগিব। এটা পৰিয়াল Accountable কেৱল মহিলাক লৈ নহয়;পুৰুষক লৈয়া হ’ব লাগিব। Male-Female দুয়োৰে সন্তানৰ সংখ্যা Accountable হ’ব লাগিব। তেতিয়াহে এক কঠোৰ জনসংখ্যা নীতি বাস্তবায়িত হ’ব।
   আনহাতে অসমৰ মাননীয় মুখ্যমন্ত্ৰী ডাঙৰীয়াই কি সূত্ৰৰ ওপৰত ভিত্তি কৰি ST,SC আৰু চাহ-জনজাতি সম্প্ৰদায়ক এই জনসংখ্যা নিয়ন্ত্ৰণ আইনৰ আওতাৰ বাহিৰত ৰখাৰ(Exempted) কথা ঘোষণা কৰিছে সেয়াও বোধগম্য নহল। আইন সকলোৰে বাবে সমান। উদাহৰণস্বৰূপে ভাৰতীয় দণ্ড বিধি (Indian Penal Code)ৰ কোনো ধাৰা ST, SC আৰু চাহ জনজাতিৰ ক্ষেত্ৰত ব্যতিক্ৰম নহয়। তেন্তে এইক্ষেত্ৰত ই Exempted কেনেকৈ হ’ব ?
    জনসংখ্যা নিয়ন্ত্ৰণৰ ক্ষেত্ৰত এই বিষয়সমূহৰ আলোচনা আৰু বিশ্লেষণ হোৱা উচিত। যদিহে দেশত নামতহে এখন জনসংখ্যা নিয়ন্ত্ৰণ আইন পৰবৰ্তী সময়ত প্ৰণয়ন হয় তেন্তে এই সকলোবোৰ শেষত গৈ হ’ব—–আলো-বালো-গালো;সকলো খোলাকটিৰ তাল!

ইউৰো কাপ চাবলৈ Wembly লৈ

  • পাৰ্থ সাৰথি দত্ত

ৰাজনীতি অসম’ (WWW.RAJNITIAXOM.COM) : তিনি বছৰ: ২ লাখ ১২ হাজাৰ পঢ়ুৱৈ


চেমি ফাইনেল, ফাইনেলকে ধৰি লণ্ডনত ইউৰো কাপ ২০২১ৰ বহু কেইখন খেল ৰখা হৈছে। টিকট ইতিমধ্যে সকলো বিক্ৰী হৈছে। অৱশ্যে লণ্ডনত এনে বহু ৱেবছাইট আছে য’ত  নিজৰ কিনা টিকট অধিক দামত বিক্ৰী কৰা ব্যবস্থা আছে। ভাৰতত যিটো ব্লেক বুলি কোৱা হয়। ইয়াত ব্লেক মাৰ্কেট বুলি ক’লে কিন্তু আপোনাৰ বিৰূদ্ধে বৰ্ণবৈষম্যৰ কেছ ৰুজু হ’ব পাৰে। সেয়েহে ইয়াত ব্লেকৰ সলনি মানুহে grey মাৰ্কেট বুলি কয়। ইউৰো কাপৰ খেল এখন সৰুৰে পৰা ষ্টেদিয়ামত গৈ চাবলৈ এটা সপোন পুহি ৰাখিছিলো। অবশেষত সুযোগ আহিল। প্ৰি কোৱাৰ্টাৰ ফাইনেলত ইটালী বনাম অষ্ট্ৰিয়া। ৪ হাজাৰ টকীয়া টিকট ক্ৰয় কৰিলো প্ৰায় ২০ হাজাৰ টকাত। অষ্ট্ৰিয়াৰ পৰা খেল চাবলৈ আহিব বিচৰা এজন মানুহে এদিন আগতে নিজৰ দুটা টিকট বিক্ৰী কৰাৰ সিদ্ধান্ত ল’লে। কোভিদ টেষ্টৰ নিগেটিভ ৰিপোৰ্ট লৈ বন্ধু এজনৰ লগত Wembly ত গৈ উপস্থিত হ’লো।ষ্টেদিয়ামত মুঠ ৯০ হাজাৰ লোক বহিব পাৰে যদিও কোভিদৰ বাবে প্ৰায় ২৫ হাজাৰ মানহে টিকট বিক্ৰী কৰা হৈছে। সামাজিক দুৰত্বৰ মানি চলাবৰ বাবে বহু আসন খালি ৰখা হৈছে। খেল ৮ বজাত যদিও আমি গৈ উপস্থিত হ’লো সন্ধিয়া ৬ বজাত। সুন্দৰ ভাবে সকলো ব্যবস্থা কৰা হৈছে। আমাৰ কোভিদ ৰিপোৰ্ট পৰীক্ষা কৰাৰ পিছত মোবাইলত থকা ডিজিটেল টিকটত থকা বাৰ কোদ দেখুওৱাত দৰ্জাখন নিজে নেজে খোল খালে। চিকিউৰিটি চেকৰ পিছত নিজৰ আসনৰ পিনে অগ্ৰসৰ হ’লো। ষ্টেদিয়ামত ৮০% ইটালীৰ সমৰ্থক। আমাৰ কাষতে বহি আছিল এহাল ইটালীয়ান দম্পতী। আমিও ইটালীক সমৰ্থন কৰাৰ কথা শুনি তেওঁলোক উৎফুল্লিত হৈ পৰিল। কথা প্ৰসংগত গিৰিয়েকজনে কলে ভাৰত আৰু ইটালীৰ সম্পৰ্কৰ কথা। ছোনীয়া গান্ধীক লৈ তেওঁলোক গৌৰেৱান্নিত। ফুটবল খেলত ভাৰত আৰু ইটালীৰ এই সম্পৰ্কটোৰ কথা তাৰ আগলৈ মনত অহা নাছিল। ৭ মান বজাৰ পৰা খেলুৱৈসকল ষ্টেডিয়ামত প্ৰবেশ কৰি প্ৰেকটিছত ব্যস্ত হৈ পৰিল। ৭:৩০ মান বজাত সকলো দৰ্শক নিজৰ আসনত বহিল। ৯০ হাজাৰ টিকট যদি বিতৰণ কৰিলেহেতেন তেন্তে ষ্টেডিয়ামৰ পৰিবেশ আৰু বেছি ৰোমানঞ্চকৰ হৈ পৰিলেহেতেন। ৮ বজাৰ লগে লগে খেল আৰম্ভ হ’ল।

প্ৰথম হাফত ইটালীয়ে ভাল খেলিলে। বহুকেইটা গোল কৰাৰ সুযোগ পাইছিল যদিও লক্ষ্য ভেদ কৰাত ব্যৰ্থ হয়। ৪৫ মিনিট সময় কেনেদৰে পাৰ হৈ গ’ল গমেই নাপালো। দ্বিতীয় হাফত অষ্ট্ৰিয়াই সুন্দৰ খেলিলে। অষ্ট্ৰিয়াই এটা গোল কৰিলে আৰু লগে লগে আমাৰ সন্মুখত বহি থকা অষ্ট্ৰিয়াৰ সমৰ্থক এজনে আনন্দত কান্দি পেলালে। পিছত অবশ্যে অফছাইদৰ বাবে গ’লটো নাকছ কৰা হয়। ৯০ মিনিট পিছতো গোল নোহোৱাত মোৰ কাষৰ ইটালীয়ান ফেনজন খুব ব্যথিত হয়। ” We are not playing well” হতাশাত মানুহজন। ৩০ মিনিটৰ অতিৰিক্ত সময়ত ইটালীয়ে দুটা গোল কৰে। অষ্ট্ৰিয়াই এটা গোল পৰিষোধ কৰে যদিও অবশেষত ইটালীৰ পৰাক্ৰমৰ সন্মুখত নতি স্বীকাৰ কৰে। ইটালীয়ান দম্পতী গৰাকীয়ে ইটালীও , ইটালীও বুলি চিঞৰী পৰস্পৰক আলিংগন কৰে।  ষ্টেডিয়ামৰ পৰা মেট্ৰো ষ্টেচনলৈ প্ৰায় আধা কিলোমিটাৰ ৰাস্তা। ইটালীৰ ফেন সকলে গোটেই ৰাস্তা নাচি বাগি, গান গাই মতলীয়া হ’ল। ষ্টেদিয়ামৰ পৰা ওলাই অহা ২৫ হাজাৰ মানুহৰ প্ৰায় ২০ হাজাৰ মানে গতি কৰিলে মেট্ৰো ষ্টেচনলৈ। ইমান মানুহক একেলগে ষ্টেচনত সোমাব দিয়া সম্ভব নাছিল সেয়েহে ষ্টেচনৰ বাহিৰত পুলিছে খুব পৰিকল্পিত ভাবে মানুহৰ ভিৰ নিয়ন্ত্রণ কৰিছিল। প্ৰায় ১০ মিনিট মান আমিও অপেক্ষা কৰিবলগীয়া হয়। ৰাতি প্ৰায় ১২ বজাত আমি ঘৰ পালো। লগত লৈ আহিলো এটা পাহৰিব নোৱাৰা অভিজ্ঞতা।

সৰ্বানন্দ সোণোৱালৰ পচন্দ ভবেশ কলিতা

‘ৰাজনীতি অসম’ অসমৰ প্ৰথম ৰাজনৈতিক ই-আলোচনীৰ প্ৰতিবেদন


ৰাজনীতি অসম’ (WWW.RAJNITIAXOM.COM) : তিনি বছৰ: ২ লাখ ১২ হাজাৰ পঢ়ুৱৈ


ৰাষ্ট্ৰীয় স্বয়ংসেৱক সংঘৰ প্ৰাক্তণ স্বয়ংসেৱক আৰু বৰ্তমানৰ বিজেপি নেতা তথা ৰঙিয়া সমষ্টিৰ বিধায়ক ভবেশ কলিতাই বিজেপি দলৰ সিংহভাগ কৰ্মীয়ে আশা কৰাৰ দৰেই সভাপতি নিৰ্বাচিত হ’ল । নিৰ্বাচনৰ পিছতেই বিজেপিৰ ভিতৰচৰাত ভবেশ কলিতাৰ নাম ওলাইছিল সভাপতি পদৰ বাবে । কাৰণ প্ৰাক্তণ সভাপতি ৰঞ্জিত দাসে দলত সময় দিয়া কৰ্মীক উচিত স্থান দিব নোৱাৰিলে । যোৱা চৰকাৰত তেওঁ এজন প্ৰভাবশালী মন্ত্ৰীৰ ৰাৱাৰ ষ্টাম্প হিচাপে কাম কৰা বুলিও দলৰ ভিতৰচৰাত ওলাইছিল । ‘ সেৱাই সংগঠন ‘ নীতিৰ ফুলজাৰী মৰা নেতাই যেতিয়া নিজৰ সমষ্টি ত্যাগ কৰি সহজ সমষ্টিৰ পৰা বিধায়ক হৈ মন্ত্ৰীসভা পায়  তেতিয়া ৰাষ্ট্ৰ প্ৰথম ব্যক্তি শেষত শ্লোগানো সেমেকা হৈ পৰে । সৰভোগ সমষ্টিত বৰ্ষীয়ান নেতা শংকৰ দাসৰ পৰাজয়ৰ মাৰ্জিন অতি কম হোৱাৰ পিছতেই দলৰ আভ্যন্তৰিণ পৰ্যালোচনাত ৰঞ্জিত দাসৰ ভুমিকাত বহু নেতাই খেদ প্ৰকাশ কৰিছে । বিশেষ সুত্ৰৰ পৰা পোৱা খৱৰ মতে ৰঞ্জিত দাসে নিজে যদি সৰভোগৰ পৰা নিৰ্বাচনত অৱতীৰ্ণ হ’ল হেঁতেন তেন্তে বিজেপিয়ে কম মাৰ্জিনত হলেও জয়ী হ’লহেঁতেন । কিন্তু মন্ত্ৰীত্ব প্ৰত্বাশী নেতাজনে অলপো ৰিক্স লবলৈ ইচ্ছা নকৰিলে । সাংসদ পল্লব লোচন দাসৰ পৰা আৰম্ভ কৰি কৃষ্ণমনি চুতীয়াৰ দৰে বিজেপিত অনভিজ্ঞ ব্যক্তিক দলত গুৰুত্বপুৰ্ণ স্থান দিয়া কাৰ্য্যক বহু পুৰণি কৰ্মীয়ে সহজ ভাবে লোৱা নাছিল , তথাপি চৰকাৰখনৰ পৰা সুবিধা লাভ কৰাৰ আশাত কোনেও ৰাজহুৱাকৈ মুখ খোলা নাই । চৰকাৰ গঠন হোৱাৰ পিছতেই সম্পুৰ্ণ আকাংক্ষিত ভাবেই মুখ্যমন্ত্ৰী পদত হিমন্ত বিশ্ব শৰ্মা , মন্ত্ৰীৰ দায়িত্ব  ৰঞ্জিত দাসৰ ৰাজ অভিষেক হয় । ৰঞ্জিত দাসৰ আসন্ন বিদায়ৰ পিছত কোন হ’ব পৰৱৰ্তী সভাপতি তাকে লৈ বিজেপিৰ ভিতৰচঁৰাত লবি কেন্দ্ৰীক ৰাজনীতি তৎপৰ হৈ পৰে । মুখ্যমন্ত্ৰীয়ে কামাখ্যা প্ৰসাদ তাচা বা  দিলীপ শইকীয়াই দায়িত্ব পোৱাটো বিচাৰিছিল যদিও বিজেপিৰ এটা ফৈদে বিচাৰিছিল যে এজন নিৰপেক্ষ ব্যক্তিয়ে দলৰ সভাপতিৰ দায়িত্ব লওক । সংঘ পৰিয়ালে নিৰ্বাচনৰ পুৰ্বেই ভবেশ কলিতাৰ পদোন্নতিক গ্ৰীণ চিগনেল দি থৈছিল , কিন্তু সভাপতি নিৰ্বাচনত তেওঁলোকে প্ৰত্যক্ষ ভুমিকা লোৱাৰ পৰা আঁতৰত থাকে। ভবেশ কলিতাৰ পদোন্নতিত বিশেষ ভুমিকা লোৱা ব্যক্তিজন হৈছে প্ৰাক্তণ মুখ্যমন্ত্ৰী সৰ্বানন্দ সোণোৱাল ।  নাম প্ৰকাশত অনিচ্ছুক এজন ৰাষ্ট্ৰীয় পৰ্য্যায়ৰ নেতাই ব্যক্ত কৰা মতে দাদা ব্ৰিগেদৰ শৰণাগত হোৱা ব্যক্তিক সোণোৱালে সভাপতি পদত বিচৰা নাই । দলৰ শীৰ্ষ আৰু বৰ্ষীয়ান নেতা সকলেওচৰকাৰৰ ওপৰত দলৰ প্ৰভাব শক্তিশালী হোৱাটো বিচাৰে । টিকট কটা যোৱা বিধায়ক , মন্ত্ৰী নোপোৱা  বিধায়ক , দলৰ পৰা এলাগী হোৱা নেতা , সংসদীয় সচিব হৈ ভিআইপি হোৱাৰ আশা নিৰ্বাপিত হোৱা নেতা সকলৰ সিংহভাগেই সৰ্বানন্দ সোণোৱালক সমৰ্থন দিছিল । যাৰ ফলশ্ৰুতিত ভুৱনেশ্বৰ কলিতাৰ পিছতেই ৰঙিয়া সমষ্টিৰ পৰা পুনৰ এটা ৰাষ্ট্ৰীয় দলৰ ৰাজ্যিক সভাপতি নিৰ্বাচিত হয় ভবেশ কলিতা। আগন্তুক পাঁচ বছৰত ভবেশ কলিতাই চৰকাৰ আৰু দলৰ মাজত কেনেকুৱা সম্পৰ্ক সৃষ্টি কৰে লক্ষণীয় হব । চৰকাৰৰৰ  পৰা পোৱা সভাপতি কোটাৰ চাকৰি , ঠিকা -ঠুকুলিৰে নিজৰ ক্ষমতা আৰু ঐশ্বৰ্য্য বৃদ্ধি কৰি থাকিব নে ২০২৬ চনৰ নিৰ্বাচনৰ কাৰণে কৰ্মী সৃষ্টি কৰিব সেয়া জানিবলৈ কিছুমাহ অপেক্ষা কৰিব লাগিব ।

মই দেখা চাৰিজন মুখ্যমন্ত্রী

  • অগ্নিভ দত্ত

ৰাজনীতি অসম’ (WWW.RAJNITIAXOM.COM) : তিনি বছৰ: ২ লাখ ১২ হাজাৰ পঢ়ুৱৈ


(১)

হিতেশ্বৰ শইকীয়া : একক আৰু অনন্য, তেখেত আছিল অসমৰ ৰাজনীতিৰ চানক্য ৷ তেখেতৰ শাসন বা শাসনৰ পূৰ্বে অসমৰ সন্ত্ৰাসবাদী সমস্যাই এনেকুৱা ৰূপ লৈছিল যে সেই সন্ত্ৰাসবাদীয়ে অসমৰ  উন্নয়নেই হঁওক বা আন যিকোনো কামকেই সম্পূৰ্ণ গ্ৰাস কৰি পেলাইছিল ৷ অসমখনৰ ধ্বংসৰ সকলো প্ৰক্ৰিয়া যেন সম্পূৰ্ণ হৈ উঠিছিল ৷  সন্ত্ৰাসবাদৰ কৱলত পৰি ককবকাই উঠিছিল ৰাজ্যবাসী ৷ আৰু সেই সন্ত্ৰাসবাদক শেষ কৰিবলৈ যুগান্তকাৰী সিদ্ধান্ত গ্ৰহণ কৰিছিল শইকীয়াই ৷ সুচতুৰ,বিচক্ষণ শইকীয়াৰ আগত দিক্ বিদিক হেৰুৱাই পেলাই জাকে জাকে সন্ত্ৰাসবাদীয়েই অস্ত্ৰ পেলাবলৈ বাধ্য হৈ পৰিছিল ৷ হিতেশ্বৰ শইকীয়াৰ প্ৰায় সকলো কামৰেই বিৰোধীতা কৰিলেও স্বীকাৰ কৰিবই লাগিব যে অসমখনক সন্ত্ৰাসবাদীৰ ওচৰত সম্পূৰ্ণ ধ্বংস হোৱা নেদেখাৰ বাবে যদি ধন্যবাদ দিব লাগিব সেইজন হৈছে হিতেশ্বৰ শইকীয়া ৷
(২)
প্ৰফুল্ল মহন্ত: প্ৰফুল্ল মহন্তৰ উত্থান হৈছিল অসম আন্দোলনৰ যোগেদি ৷ আন্দোলনৰ সময়ত প্ৰফুল্ল মহন্ত মানেই আছিল সকলোৰে চকুৰ মণি, অসমৰ মানুহৰ নিচেই আপোন ৷ কিন্তু  আন্দোলনৰ আচল কথাটোতেই বিশ্বাসঘাটকতা কৰি অসম চুক্তি কৰিয়েই ৰৈ নগ’ল ,, চিধাই আন্দোলনৰ পৰা ৰাজ্যৰ শাসনভাৰ ললে মহন্তই ৷  প্ৰফুল্ল মহন্তৰ কাৰ্য্যকাল মানেই মানুহে মনত ৰাখে ৰাস্তাৰ য’তে ত’তে খোলা মদৰ দোকানকেইখন , দৰমহাৰ কাৰণে ককবকাই থকা চৰকাৰী কৰ্মচাৰীসকল আৰু গুপ্তহত্যাৰ বিভীষিকা  ৷ ৰাজ্যখনৰ অৰ্থনীতি সম্পূৰ্ণ বিধ্বস্ত হৈ যোৱা অৱস্থাৰ কাৰণে উত্তৰ প্ৰজন্মৰ কাৰণে এক মনত ৰাখিব পৰা ঘটনাই হৈ পৰিল এই মহন্তৰ শাসন ৷
(৩)
তৰুণ গগৈ:  প্ৰফুল্ল মহন্তৰ দিনত অসমৰ অৱস্থা যুদ্ধ বিধ্বস্ত একোটা অঞ্চলতকৈ কোনোগুনেই কম নাছিল ৷ উন্নয়নৰ নামত সকলোফালে শূন্য ৷ চাকৰি বাকৰি নাই   বিনিয়োগ নাই,  দৰমহা নাই, মুঠতে কেৱল নাই আৰু নাই ৷ গধুলী হোৱাৰ লগে লগে লাগে ৰাতিবোৰ কেতিয়া পুৱাব ? মানুহ ঘৰৰ পৰা ওলালে ঘৰ ঘুৰি নোপোৱালৈকে ঘৰৰ মানুহৰ শান্তি নাথাকে, মুখলৈ ভাত কেইটাও যেন নাযায় ৷ ছালফাৰ সন্ত্ৰাসত অসমৰ মানুহে একো কৰিব নোৱাৰিছিল, পাৰিছিল কেৱল নামঘৰে নামঘৰে চাকি জ্বলাই শাওপাত দিব ৷ আৰু এনেকুৱা সময়তেই তৰুণ গগৈয়ে শাসনভাৰ লৈছিল ৷ তৰুণ গগৈয়ে দায়িত্ব লোৱাৰ পিছত আটাইতকৈ ডাঙৰ কামটো আছিল অসমৰ মানুহে আকৌ মুকলিকৈ উশাহ লব পাৰিছিল ৷ গধুলি দোকান পোহাৰ খোলা ৰাখিব পাৰিছিল, মুকলি মনেৰে মানুহে ঘুৰিব পৰা হৈছিল ৷ ৰাস্তা পদুলিবোৰ নতুনকৈ বনোৱা হৈছিল ৷ চাকৰি বাকৰি পাব পৰা হৈছিল ৷ব্যক্তিগতখণ্ডৰ বিভিন্ন অনুষ্ঠান,প্ৰতিষ্ঠানে অসমত বিনিয়োগ কৰিবলৈ আহিছিল ৷ যদিও দুৰ্নীতি হৈ পৰিছিল সহজলভ্য ৷  তথাপিও অসমক সেই অন্ধকাৰৰ দিনৰ পৰা মুক্ত কৰোৱাটো আছিল গগৈৰ অন্যতম সফলতা আৰু সেই কথাৰেই তেখেতক অসমবাসীয়ে মনত ৰাখিব ৷
(৪)
সৰ্বানন্দ সোনোৱাল: এটা সময়ত দুৰ্নীতি,অনীতিয়ে চুড়ান্ত পৰ্য্যায় পাইছিলগৈ গগৈৰ শাসনকালত ৷ আৰু তাৰ ফলত স্তব্ধ হৈ পৰিব ধৰিছিল গগৈয়ে নিজেই আৰম্ভ কৰা উন্নয়নৰ যাত্ৰা ৷ মানুহে অতিষ্ঠ হোৱাৰ ওপৰিও ভাৰতীয় জনতা পাৰ্টীৰ আদৰ্শৰ ওপৰত বিশ্বাস ৰাখি দলটোৰ হাতত চৰকাৰ গঠনৰ দায়িত্ব দিছিল ৷ চৰকাৰ গঠনৰ দায়িত্ব পায়েই মুখ্যমন্ত্রী হিচাবে সৰ্বানন্দ সোনোৱালে অতি ক্ষীপ্ৰতাৰে আৰম্ভ কৰিছিল দুৰ্নীতি বিৰোধী যুঁজ এখন ৷ এনেকুৱা যুঁজ হয়তো সমগ্ৰ ভাৰততে কতো হোৱা নাছিল ৷ লোক সেৱা আয়োগৰ দৰে অনুষ্ঠান এটাৰ সমস্ত ডাঙৰ ডাঙৰ বিষয়ববীয়াকেই জেলৰ ভাত খোৱাবলৈ সক্ষম হোৱাই নহয় প্ৰায় ১০০ জনকৈ ৰাজপত্ৰিত বিষয়াক অতি কম সময়ৰ ভিতৰতেই কাৰাগাৰৰ কোঠৰীত বন্দী কৰি ৰাখিছিল ৷ এনে নোহোৱা নোপোজা কাম হয়তো কেতিয়াও কতো হোৱা নাছিল ৷ আনকি যোৱা ৩০-৪০ বছৰৰ ভিতৰত হয়তো প্ৰথমবাৰৰ বাবে মানুহে লোক সেৱা আয়োগৰ ওপৰত আস্থা দেখুওৱা দেখা গল ৷ বাকী সোনোৱালৰ দিনত উন্নয়নমূল কাম কাজবোৰে গতিশীলতা লাভ কৰি অসমক আগবঢ়াই নিবলৈ সক্ষম হল ৷ কিন্তু ৰাইজে মনত ৰাখিব সোনোৱালক দুৰ্নীতিৰ বিৰুদ্ধে যুঁজা যুঁজখনৰ কাৰণে ৷

অসমত বিজেপিৰ ভৱিষ্যত

  • ৰতন ব্ৰহ্ম

ৰাজনীতি অসম’ (WWW.RAJNITIAXOM.COM) : তিনি বছৰ: ২ লাখ ১২ হাজাৰ পঢ়ুৱৈ


Without social union, political unity is difficult to be achieved. If achieved, it would be as precarious as a summer sapling, liable to be uprooted by the gust of a hostile wind. With mere political unity, India may be a State. But to be a State is not to be a nation and a State, which is not a nation, has small prospects of survival in the struggle for existence. The danger to a mixed and composite state, therefore, lies not so much in external aggression as in the internal resurgance of nationalities …. B R Ambedkar
সামাজিক একতা  অবিহনে, ৰাজনৈতিক একতা  প্ৰাপ্ত কৰা কঠিন। যদি প্ৰাপ্ত কৰা, ই গ্ৰীষ্মকালৰ অসুৰক্ষিত  গছপুলিৰ দৰে বিপদজনক হ’ব, প্ৰতিকূল বতাহৰ দ্বাৰা নিশ্চিত উৎখাতৰ  সন্মুখিন হ’ব । কেৱল ৰাজনৈতিক ঐক্যৰ  দ্বাৰা ৰাষ্ট্ৰ গঠন সম্পুৰ্ণ নহয় । এখন দেশ ৰাষ্ট্ৰ হ’ব নোৱাৰিলে দেশখন অস্তিত্বৰ সংগ্ৰামত জীয়াই থকাৰ  ক্ষীণ সম্ভাৱনা থাকে। এক মিশ্ৰিত আৰু মিশ্ৰিত অৱস্থাৰ দেশে বিদেশী ৰাষ্ট্ৰৰ পৰা পোৱা বিপদতকৈ আভ্যন্তৰিণ বিপদৰ হে সন্মুখিন হয় ।
If unity is to be of an abiding character, it must be founded on a sense of kinship, in the feeling of being kindred. In short, it must be spiritual. Judged in the light of these considerations, the unity between Pakistan and Hindustan is a myth. Indeed, there is more spiritual unity between Hindustan and Burma than there is between Pakistan and Hindustan….B R Ambedkar
যদি একতা এক স্থায়ী চৰিত্ৰ হ’ব লাগে,তেন্তে ইয়াক  প্ৰতিষ্ঠা কৰিব লাগিব আত্মীয়তাৰ অনুভূতি আৰু সামাজিক সম্পৰ্কৰ ওপৰত ভিত্তি কৰি । চমুকৈ, ই  হ’ব লাগিব আধ্যাত্মিক।এই বিবেচনাবোৰৰ পৰিপ্ৰেক্ষিতত পাকিস্তানৰ লগত হিন্দুস্তানৰ ঐক্যতাৰ সম্পৰ্ক অবাস্তৱ আৰু কাল্পনিক । দৰাচলতে,  হিন্দুস্তান আৰু বাৰ্মাৰ মাজত অধিক আধ্যাত্মিক ঐক্য আছে পাকিস্তান আৰু হিন্দুস্তানৰ তুলনাত ।
২০১৬ চনত অসমত পোন প্ৰথম বাৰৰ বাবে অসমত বিজেপিয়ে চৰকাৰ গঠন কৰে । ২৫-৩০ বছৰ বিজেপি দল কৰা নেতা-কৰ্মী সকলেও এই ঘটনাক নাভূত নাশ্ৰুত বুলি সংবাদ মাধ্যমত বাৰে বাৰে কোৱা আমি শুনো । যি সকল নেতাই ২০১৬ চনত বিজেপিয়ে চৰকাৰ গঠন কৰাটোক আচৰিত বুলি কয় , তেওঁলোৰ এই প্ৰতিক্ৰিয়া অন্ধতা নে মুৰ্খতা ?অকংগ্ৰেছী চৰকাৰ অসমত নতুন কথা নহয় । শৰৎ চন্দ্ৰ সিংহ , প্ৰফুল্ল মহন্ত , গোলাপ বৰবৰাৰ দৰে অকংগ্ৰেছী নেতা অসমৰ মুখ্যমন্ত্ৰী হৈছে । তেন্তে বিজেপিয়ে চৰকাৰ গঠন কৰাত কি আচৰিত হ’ব লগা আছে ? সদৌ অসম ছাত্ৰ সন্থাৰ নেতৃত্বত চলা অসম আন্দোলনৰ পিছত গঠন হোৱা অগপই ১৯৮৫ চনত চৰকাৰ গঠন কৰোত অগপই একক সংখ্যা গৰিষ্ঠতা  পোৱা নাছিল । কাৰ্বি আংলং পৃথক ৰাজ্য দাবী কৰা এ এচদি চি , বৰ্তমানৰ বিটিআৰ এলেকাত থকা বিএচিত বড়োভাষীক জাতীয়তাবাদী দল পিটিচিৰ উত্থান হৈছিল । কিন্তু অগপৰ বিপুল জনসমৰ্থনৰ ছবি খন কিমান আচল আছিল ? সেই সময়তে কংগ্ৰেছে জয়ী হৈছিল ২৫ টা সমষ্টিত আৰু ইউনাইটেদ মাইন’ৰিটি ফ্ৰন্ট ( ইউএম এফ) ৰ ১৭ জন প্ৰাৰ্থী ব্ৰহ্মপুত্ৰ উপত্যকাত জয়ী হৈছিল । একেদৰে হিতেশ্বৰ শইকীয়াৰ নেতৃত্বত কংগ্ৰেছে ১৯৯১ চনত চৰকাৰ গঠন কৰাৰ সময়তো অগপ , অগপৰ বিদ্ৰোহী গোট নঅগপ , আৰু বিজেপি দলৰ প্ৰাৰ্থী জয়ী হৈছিল ৩৪ টা সমষ্টিত । আনহাতে কাৰ্বি আংলং , বড়ো এটোনমাচ কাউন্সিলত প্ৰায় ১৫ জন প্ৰাৰ্থীয়ে পিটিচি , এ এচদিচিৰ পৰা জয়ী হৈছিল ।২০০১ চনৰ পৰা ২০১৬ চনৈ একেৰাহে ১৫ বছৰ কংগ্ৰেছ ক্ষমতাত থকাৰ অংক আছিল আন দলৰ মাজত ভোট
বিভাজন ।  আলি আৰু কুলিৰ ভোটৰে কংগ্ৰেছে চৰকাৰ গঠন কৰা সমীকৰণক অসমৰ বিৰোধী নেতা সকলে উপলব্ধি কৰা নাছিল আৰু একাংশই উপলব্ধি কৰিছিল যদিও ব্যক্তিগত স্বাৰ্থ পুৰণৰ বাবে কংগ্ৰেছৰ সমীকৰণক সাৰপানী যোগান ধৰি আছিল । কেন্দ্ৰত নৰেন্দ্ৰ মোদীৰ চৰকাৰ গঠনে  বাস্তৱ উপলব্ধি কৰিব নোৱাৰা  অসমৰ কংগ্ৰেছ বিৰোধী সমাজখনক একলগ হবলৈ সুবিধা দিয়ে । সমান্তৰাল ভাবে আলি -কুলিৰ ফৰ্মুলাৰে দুটা দশকৰ অধিক কাল কংগ্ৰেছ দল কৰা হিমন্ত বিশ্ব শৰ্মাই বিজেপিত যোগ দি বিজেপিৰ সুপ্ত প্ৰতিভাৰ নেতা সকলক বাস্তৱ ৰাজনীতিত ভৰি দিবলৈ পথ প্ৰদৰ্শণ কৰায় । বিজেপিৰ কাৰণে প্ৰথম টাৰ্গেট আছিল চাহ জনগোষ্ঠী সমাজ । হিমন্ত বিশ্ব শৰ্মা বিজেপিত অহাৰ আগতেই চাহ জনগোষ্ঠী সমাজে বিজেপিক সমৰ্থক দিয়া আৰম্ভ কৰিছিল । কামাখ্যা তাচা , ৰামেশ্বৰ টেলীৰ দৰে নেতাৰ জন্ম আছিল বিজেপিৰ বহু দিনীয়া পৰিকল্পনাৰ অংশবিশেষ । আলি সমাজ বুলি কওতে মুছলমান সমাজক বুজাইছিল আৰু কুলিৰ ভোট বুলি কওতে চাহ জনগোষ্ঠী সমাজক বুজাইছিল । জাতীয় কংগ্ৰেছৰ কেন্দ্ৰীয় কমিটিত সভাপতি পদ লাভ কৰা প্ৰথমজন অসমীয়া কংগ্ৰেছী নেতা তথা অসমৰ প্ৰাক্তণ শিক্ষামন্ত্ৰী , বিধান সভাৰ অধ্যক্ষ , প্ৰাক্তণ কেন্দ্ৰীয় মন্ত্ৰী দেৱকান্ত বৰুৱাই আজিৰ পৰা ৫ টা দশক আগতেই ঘোষণা কৰিছিল যে আলি -কুলিৰ ভোট হ’লেই আনবোৰৰ ভোট প্ৰয়োজন নাই । কংগ্ৰেছৰ বেহুৰ পৰা চাহ জনগোষ্ঠী মুক্ত হ’ল বিজেপিৰ ছত্ৰছাঁয়াত আনহাতে মুছলমান ভোটাৰে বিকল্প পথ হিচাপে কংগ্ৰেছক ব্যৱহাৰ কৰি থকাৰ পৰা লাহে লাহে আতৰি আহিব ধৰিছে ।এই ক্ষেত্ৰত জনসংখ্যা বৃদ্ধি হৈছে প্ৰধান কাৰণ । লাহে লাহে বদৰুদ্দিন আজমল শক্তিশালী হৈ আহিছে অসমৰ ৰাজনীতিত আৰু কংগ্ৰেছৰ মুছলামন নেতাসকলেও আজমলৰ বিপক্ষে ভাষণ দিয়াৰ পৰা বিৰত থাকিব লগিয়া হৈছে । কাৰণ পুৰ্ব বংগীয় সমাজে বদৰুদ্দিন আজমলৰ এআই ইউদিএফ দলৰ বিৰুদ্ধাচৰণ কৰা নেতাক কোনোপধ্যেই মানি নলয় । যাৰ ফলশ্ৰুতিত ২০২১ ৰ বিধানসভাৰ নিৰ্বাচনত কংগ্ৰেছ দলে বদৰুদ্দিন আজমলৰ লগত মুক্ত মিত্ৰতা কৰিবলৈ বাধ্য হ’ল । এইবাৰৰ নিৰ্বাচনত এআই ইউদিএফ কণিষ্ঠ সহযোগী আছিল যদিও অচিৰেই সমীকৰণ সলনি হব । জম্মু-কাশ্মীৰত প্ৰথম অৱস্থাত কংগ্ৰেছ মুখ্য ৰাজনৈতিক দল আছিল । আৰু কালক্ৰমত হিন্দু প্ৰধান জম্মু আৰু লাডাখত বিজেপি শক্তিশালী হয় আৰু মুছলমান প্ৰধান কাশ্মীৰ উপত্যকাত ফাৰুক আব্দুল্লাৰ নেচনেল কনফাৰেঞ্চ আৰু মুফটি পৰিয়ালৰ পিদিপি দল শক্তিশালী হ’ল । কংগ্ৰছৰ নেতা আৰু ৰাজ্যৰ প্ৰাক্তণ মুখ্যমন্ত্ৰী গুলাম নবি আজাদে বছৰবছৰ ধৰি আন ৰাজ্যৰ পৰা ৰাজ্যসভাৰ টিকটত নিজৰ ৰাজনীতি কৰি থাকিবলৈ বাধ্য হ’ল । বিজেপিয়ে অসমত ৰাজনৈতিক ভাবে প্ৰাসংগিক হৈ থাকিবলৈ একমাত্ৰ উন্নয়নকেই পথ হিচাপে ল’লে ঠগ খাব । উন্নয়ণৰ সমান্তৰাল ভাবে অসমত বাস কৰা প্ৰতিটো ভাৰতীয় জনগোষ্ঠীৰ মাজত আত্মীয়তা গঢ়ি উঠাত মুখ্য গুৰুত্ব প্ৰদান কৰিব লাগিব ।
এই ক্ষেত্ৰত ৰাষ্ট্ৰীয় স্বয়ংসেৱক সংঘৰ ওপৰতো দৃষ্টি নিবদ্ধ থাকিব ভৱিষ্যত বুৰঞ্জীৰ । হাগ্ৰামা মহিলাৰী নেতৃত্বৰ বিপিএফ , প্ৰমোদ বড়ো নেতৃত্বৰ ইউপিপিএল , হীৰা শৰণীয়া নেতৃত্বৰ গণ মৰ্চা সকলোৱে এখন ৰাষ্ট্ৰবাদী মঞ্চত অৱস্থান লবলৈ বাধ্য । কাৰণ এই তিনিওটা দলেই পুৰ্ব বংগীয় ভোটাৰৰ একচেতীয়া ভোট পৃথক পৃথক সময়ত লাভ কৰিছে । ২০১৪ লোকসভা নিৰ্বাচনত হীৰা শৰণীয়াৰ জয়ৰ মুখ্য হোটা আছিল পুৰ্ব বংগীয় ভোটাৰ । যাৰ ফলত তেওঁ ৩ লাখৰ অধিক ভোটত জয়ী হৈছিল । হীৰা শৰণীয়াই নৰেন্দ্ৰ মোদীৰ বিৰুদ্ধে কঠোৰ স্থিতি নোলোৱা বাবে  বদৰুদ্দিন আজমলে ইউপিপিএলক সমৰ্থন দিলে । লগে লগে হীৰা শৰণীয়াৰ ভোটৰ মাৰ্জিন ৫০ হাজাৰলৈ কমি গ’ল আৰু কথমপি জয়ী হ’ল ২০১৯ ৰ লোকসভা নিৰ্বাচনত । ২০২১ ৰ নিৰ্বাচনত বিপিএফে বিজেপিৰ লগত মিত্ৰতা ভংগ কৰাৰ লগে লগে আজমলে বিপিএফক সমৰ্থন দিলে । তিনিটা সময়ত তিনিটা দলৰ কাষত পুৰ্ব বংগীয় সমাজ থিয় হৈছে । কিন্তু বিৰোধী দল এটাই ___বিজেপি । বিটিচিৰ পুৰ্ব বংগীয় সমাজে যিদৰে তিনিটা দলক তিনিটা পৃথক সময়ত সমৰ্থন দিছে , সেই একেদৰে বিটিচিৰ বাহিৰত তেওঁলোকৰ জনবসতি প্ৰধান সমষ্টিত এআইইউদিএফক সমৰ্থন দিছে ,আন্যহাতে যিবিলাক সমষ্টিত তেওঁলোক সংখ্যা গৰিষ্ঠ নহয় সেই সমুহ সমষ্টিত কংগ্ৰেছক সমৰ্থন দিছে । পুৰ্ব বংগীয় ভোটাৰৰ তুলনাত আন ভোটাৰ জনগোষ্ঠী সমুহ ৰাজনৈতিক ভাবে বিচক্ষণ নহয় । কাৰণ বটদ্ৰবা , থাওৰা , সৰভোগ , ভবানীপুৰ আদি সমষ্টিৰ পৰা কংগ্ৰেছ আৰু এআইইউদিএফৰ টিকটত খিলঞ্জীয়া প্ৰাৰ্থী জয়ী হৈছে । হীৰা শৰণীয়াই প্ৰমোদ বড়োৰ লগত কৰা মিত্ৰতা যিদৰে যুগান্তকাৰী বিবেচিত হ’ব সেই একেদৰে বিপিএফ দল পুনৰ বিজেপিৰ লগত আহি বিটিচি তথা অসমক সুৰক্ষিত কৰাৰ স্বাৰ্থত কাম কৰিব লাগিব । ৰূপজ্যোতি কুৰ্মী যদিও এজন শালীনতাহীন কংগ্ৰেছ নেতা তথাপি খিলঞ্জীয়া ভোটাৰে জয়ী কৰোৱা এজন বিধায়ক তেওঁ । ৰূপজ্যোতি কুৰ্মী , হাগ্ৰামা মহিলাৰী , হীৰা শৰণীয়া , প্ৰমোদ বড়ো , ভুবন পেগুৰ দৰে জনগোষ্ঠীয় নেতা সকল বিজেপিৰ ওচৰ চাপিছে । যিকাৰণতেই নহওক এই সকল ব্যক্তিয়ে এসময়ত অস্পৃশ্য বুলি প্ৰচাৰ কৰা  বিজেপি দলৰ লগ লাগিছে । এই সময়ছোৱাত বিজেপিৰ কাৰণে কাম কি ? বড়ো সমাজখন , অসমীয়া ভাষী বৰ্ণ হিন্দু সমাজখন , ৰাভা সমাজখন , ৰাজবংশী সমাজখন , বঙালী ভাষী সমাজখন, , তথাকথিত হিন্দী ভাষী সমাজ , কাৰ্বি, ডিমাচা , নেপালী আদি বিভিন্ন সমাজৰ মাজত সামাজিক আত্মীয়তা গঢ়ি তুলিবলৈ প্ৰয়াস কৰিব লাগিব বিজেপিয়ে । ৰাজনৈতিক ক্ষেত্ৰখনত অসমৰ ক্ষুদ্ৰ , ক্ষুদ্ৰ জাতি-জনগোষ্ঠী সমুহে বিজেপি দলৰ ছাতিৰ তলত এখন মঞ্চত অৱস্থান স্থায়ী হ’বলৈ আগন্তুক সময়ত মুখ্যমন্ত্ৰী হিমন্ত বিশ্ব শৰ্মা আৰু বিজেপিৰ সভাপতি ভৱেশ কলিতাই গুৰু দায়িত্ব পালন কৰিব লাগিব ।
এফালে হিন্দুত্বৰ আদৰ্শক  প্ৰতিটো সময়ত মনত পেলাই প্ৰতিটো জনগোষ্ঠীক হিন্দুত্বৰ ছত্ৰছায়াৰে উচিত মৰ্য্যদা দিব লাগিব আৰু প্ৰতিটো জনগোষ্ঠীৰ মাজত আত্মীয়তা গঢ়ি অৰাজনৈতিক ভাবে মিত্ৰতাৰ পৰিবেশ তৈয়াৰ কৰিব পাৰিব লাগিব ।  বংগ ভংগ আন্দোলনৰ পৰা আৰম্ভ হোৱা দ্বিজাতি ত্বত্তৰ সফল সমাপ্তি কৰা মুছলীম লীগে চকু মেল খুওৱা স্বত্তেও ভাৰতৰ ৰাজনেতা তথা ইতিহাসবিদ সকলে যোৱা সত্তৰ বছৰে ভাৰতীয় সকলৰ বাবে এক পৰিচয় উদ্ভাৱন কৰিব নোৱাৰিলে । আগন্তুক দিনত অকল অসমেই নহয় সমগ্ৰ ভাৰতবৰ্ষতেই দ্বীজাতি ত্বত্তই এক সংহাৰী ৰূপ লোৱাৰ পুৰ্ণ সম্ভাৱণা আছে । কাৰণ নাগৰিক হিচাপে একাংশ ভাৰতীয়ই যদি ঔৰংজেৱক আক্ৰমণকাৰী বুলি কব বিচাৰে , একেসময়ত আন একাংশৰ বাবে ঔৰংগজেৱক এজন ইচলাম প্ৰচাৰক হিচাপে সন্মান কৰে । নালন্দা ধ্বংস কৰা খিলজি , বিন কাচিম যদি কাৰোৱাৰ কাৰণে খলনায়ক আৰু আন কাৰোবাৰ বাবে নায়ক । নিজৰ মুখৰ ভাষাৰ পৰিচয় ( গুজৰাটী , বঙালি, পঞ্জাবী , মৰাঠী , অসমীয়া ইত্যাদি ) ক প্ৰথম স্থান দিয়া হিন্দু সকলেই বিচাৰে যে মুছলমান এজনে নিজৰ পৰিচয় ধৰ্মৰে দিয়া অনুচিত ।  এটা গ্ৰেণ্ড নেৰেটিভ সুত্ৰ তৈয়াৰ কৰিব নোৱাৰা ভাৰতৰ ৰাজনৈতিক আৰু সামাজিক স্থিতি লক্ষনীয় হ’ব যেতিয়া জনসংখ্যাৰ অনুপাত সমান সমান হ’ব ।

এতিয়ালৈকে নম্বৰ ১: ৰণোজ পেগু

‘ৰাজনীতি অসম’ অসমৰ প্ৰথম ৰাজনৈতিক ই-আলোচনীৰ প্ৰতিবেদন


ৰাজনীতি অসম’ (WWW.RAJNITIAXOM.COM) : তিনি বছৰ: ২ লাখ ১২ হাজাৰ পঢ়ুৱৈ


যোৱাবাৰৰ ৰাজনীতি অসমৰ অ’পিনিয়ন পোল আছিল অসম মন্ত্রীসভাৰ মন্ত্রীসকলৰ ওপৰত। আমাৰ প্ৰশ্ন আছিল_ কোনজন মন্ত্রীৰ পৰা প্ৰত্যাশা সৰ্বাধিক? ১ জুনৰ পৰা ২১জুনলৈ চলা আমাৰ অ’পিনিয়ন পোলত সৰ্বাধিক ২৭.৬% ভোট লাভ কৰে শিক্ষা মন্ত্রী ৰণোজ পেগুৱে। আমি ভাবো ইয়াৰ কাৰণ হ’ল তেখেতৰ ব্যক্তিত্ব। উচ্চ শিক্ষিত ৰণোজ পেগুৱে বিভিন্ন সাক্ষাৎকাৰত নিজৰ জ্ঞানৰ পৰিচয় দিছে। অবশ্যে শিক্ষা মন্ত্রী হিচাপে তেখেতৰ প্ৰথম পৰীক্ষা নিচেই সমাগত। মেট্ৰিক আৰু উচ্চতৰ মাধ্যমিকৰ পৰীক্ষাৰ ফলাফল তেখেতে কেনেকৈ নিৰ্ণয় কৰে তাৰ ওপৰতে নিৰ্ভৰ কৰিব তেখেতৰ পাৰদৰ্শিতা।
২০.৭% ভোটেৰে দ্বিতীয় স্থানত আছে বিত্তমন্ত্রী অজন্তা নেওগ। জুলাই মাহত অসম এটা ঐতিহাসিক ক্ষণৰ সাক্ষী হ’ব যেতিয়া এজন মহিলাই অসম বিধানসভাত বাজেট পৰিবেশন কৰিব। কেশব মহন্তই ১৭.২% ভোটেৰে তৃতীয় স্থানত আছে। সকলোৱে স্বীকাৰ কৰিবলৈ বাধ্য যে মহন্তই স্বাস্হ্য মন্ত্রী হিচাপে যঠেষ্ট কষ্ট কৰিছে। চতুৰ্থ আৰু পঞ্চম স্থানত আছে দুজন যুৱ মন্ত্রী ক্ৰমে বিমল বৰা আৰু পিযুষ হাজৰিকা। বিমল বৰাক ১৩.৮% আৰু পিযুষ হাজৰিকাক ১০.১% ৰাইজে ভোটদান কৰিছে। শক্তি বিভাগত বিমল বৰাৰ সংস্কাৰৰ প্ৰচেষ্টা যোৱা মাহৰ এটা উল্লেখযোগ্য খৱৰ। ঠিক তেনেকৈ জল সম্পদতো পিযুষে কিছু আশাৰ ৰেঙনি আনিছে। ষষ্ঠ স্থানত আছে কৃষি মন্ত্রী অতুল বৰা। বৰাই লাভ কৰে ৬.৯% ভোট। সপ্তম স্থানত থকা ৰঞ্জিত দাসে লাভ কৰে ৩.৪% ভোট। শৰ্মা মন্ত্রীসভাৰ অন্যতম জ্যেষ্ঠ মন্ত্রী চন্দ্ৰমোহন পাটোৱাৰীয়ে ৰাইজৰ কোনো সহাৰি লাভ নকৰিলে।

আমি  চাকৰি নাই নাই বুলি এনেই চিঞৰি ফুৰো

ড ০ সুশান্ত কুমাৰ কাশ্যপ

ৰাজনীতি অসম’ (WWW.RAJNITIAXOM.COM) : তিনি বছৰ: ২ লাখ ১২ হাজাৰ পঢ়ুৱৈ


১৯৯৬/৯৭ চন ৷ বিএছচি কমপ্লিট কৰি গুৱাহাটী বিশ্ববিদ্যালয়ত অৰ্থনীতি বিভাগৰ ছাত্ৰ হিচাপে নামভৰ্তি কৰি পঢ়ি থকাৰ সময়ৰ কথা ৷ চাকৰি কৰাৰ বিৰাট ইচ্ছা হল, কিমান আৰু ঘৰৰ খাম!  মুঠতে তামাম “চাকৰি কৰা” লাগিল মোৰ ৷ কি চাকৰি কৰিম এতিয়া? গুৱাহাটীৰ উজানবজাৰত এটা ভাড়া ঘৰ ললো লগৰ দুজনৰ সতে ৷ আবেলি সদাই হেন্দিক কলেজৰ কাষৰ নবীন চন্দ্ৰ বৰদলৈ পুথিভড়ালত এপাক মাৰো ৷ উদ্দেশ্য বাতৰি কাকত ঘাইকৈ এম্প্লইমেন্ট নিউজ,  আসাম ট্ৰিবিউন আদিত প্ৰকাশিত চাকৰিৰ বিজ্ঞাপন বোৰ চোৱা  আৰু এপ্লাই কৰা ৷
দুই এটা চাকৰি সংক্ৰান্তিয় পৰীক্ষা দি চাকৰি পোৱা কাৰবাৰটো যে যথেষ্ট টান সেয়া বুজিবলৈ বেছি সময় নালাগিল ৷ সেইসময়ত গুৱাহাটীত অসম জাতীয় বিদ্যালয়ৰ আৰম্ভণি হৈছিল ৷ তাত মেধা আৰু বৈদ্যায়তনিক অৰ্হতাৰ ভিত্তিত শিক্ষক নিযুক্তি দিছিল ৷ মেট্ৰিক, হায়াৰ চেকেণ্ডাৰীত প্ৰথম বিভাগ পাবই লাগিব আৰু স্নাতকত ৫০ নে ৫৫ শতাংশ  তেনেকুৱা নম্বৰ আৰু অসমীয়া মাধ্যমত শিক্ষাগ্ৰহণ – এনে ধৰণৰ চৰ্ত আছিল নিযুক্তিৰ ক্ষেত্ৰত ৷ আমাৰ লগৰ কেইজনমান তাত সোমাইছিল ৷ দৰমহা দুই হাজাৰ টকা আছিল ৷ সেই সময়ত সেয়া বহুত টকা ৷ মোকো কৈছিল এপ্লাই কৰিব ৷ কিন্তু মোৰ কৰা নহল ৷ তেনে সময়তে মেডিচিন কোম্পানী এটাই মেডিকেল ৰিপ্ৰেজেন্টেটিভ পদৰ বাবে বিজ্ঞাপন দিছিল, Walk in interview, হোটেল নন্দনত ৷ কোম্পানীটো খুউৱ সম্ভৱ Glaxo নে তেনেকুৱা ডাঙৰ কিবা এটা আছিল ৷ দিন, সময় ধৰি দিছিল ৷ শিক্ষাগত অৰ্হতা বিএছচি বিচাৰিছিল৷ ৷  নিৰ্দিষ্ট দিনত , যথা সময়ত গৈ উপস্হিত হৈছিলো নন্দন হোটেলত ৷ প্ৰায় চল্লিশজন মান লৰা গোট খাইছিল ৷ বেছিভাগেই বেলেগ কোম্পানীত চাকৰি কৰি থকা, কেইজনমানহে ফ্ৰেছ ৷ প্ৰথমে আমাৰ বায়’ডাটা বোৰ জমা ললে ৷ এঘন্টা/ডেৰঘন্টামান পিছত আমাৰ পোন্ধৰজনক বহিবলৈ দি বাকী সকলক বিদাই দিলে ৷  অপেক্ষাৰ সময়ত খোৱা বোৱা  মুঠতে সুন্দৰ আপ্যায়ন ৷ চাকৰি নাপালেও বেয়া নালাগিব,  ইমান সুন্দৰ খুৱাইছে- আমাৰ চবৰে কথা বতৰাত তেনেকুৱা ভাব ৷ ইন্টাৰভিউ আৰম্ভ হল ৷ প্ৰথমেই মোক মাতিলে ৷ অলপ ভয়ো লাগিল ৷ জীৱনৰ প্ৰথম  মুখামুখি  ইন্টাৰভিউ ৷ ইন্টাৰভিউ বোৰ্ডত চাৰিজন মানুহ, তাৰে এগৰাকী  মহিলা  ৷ এজনো   অসমীয়াভাষী নাই ৷ প্ৰথম প্ৰশ্নটো আছিল – Introduce yourself and why have you applied for the post?
উত্তৰ দিলোঁ। তাৰ পিছত সুধিলে, Physics, Chemistry নোহোৱাকৈ কেনেকৈ বিএছচি হলো মই, লগতে জনালে যে তেওঁলোক তেনেকুৱা বিএছচিহে বিচৰা বুলি। তেতিয়া মই বুজাই দিলোঁ Eco., Maths, Stats যিকোনো এটা বিষয়ত মেজৰ লৈ বাকী দুটা পাছ কৰ্চ ল’লে সেয়া বিএছচি হয় গুৱাহাটী বিশ্ববিদ্যালয়ত ।  যিহেতু বিজ্ঞাপনত কেনেকুৱা বিএছচি লাগিব উল্লেখ কৰা নাই, সেইবাবেই এপ্লাই কৰিছিলোঁ। তাৰ পিছত বহুত কথা পাতিলে “মাৰ্কেটিং ৰিলেটেড”, অৰ্থনীতি আদি বিষয়ক ।
দুদিনমান পিছত ফলাফল ওলাল । মই ছিলেক্ট হলো। ট্ৰেইনিংৰ বাবে বোম্বে যাব লাগে । দৰমহা মাহিলী ৩৫০০/-লগতে অন্যান্য বানছ । সেয়া সেইসময়ত লোভনীয় বুলিয়েই কব লাগিব, কাৰণ বহু চৰকাৰী চাকৰিত কৈ দৰমহা বেছি ।
কিন্তু মোৰ জইন কৰা নহ’ল । মোৰ লগতে একেলগে ইন্টাৰভিউ দিয়া আশীশ নামৰ  ল’ৰাজনে জইন কৰিলে।
আটাইতকৈ মনটোত বেয়া লাগিছিল যেতিয়া এম এছ চি পৰীক্ষা দি মই 500টকা দৰমহাত কলেজত পাৰ্টটাইম সোমাছিলো, এটা পূৰ্ণকালীন চাকৰিৰ বাবে সংগ্ৰাম আৰম্ভ কৰিছিলোঁ,  সি তেতিয়া মাৰুটিৰ আটাইতকৈ দামী মডেল  “মাৰুটি 1000” চলাইছিল। মোক বহুত কিবা কিবি গিফট্ দিছিল কোম্পানীৰ পৰা পোৱা ।‌ সি পিছলৈ বহুকেইটা কোম্পানী সলাইছিল । 2010চন মানত ভাৰতৰ বাহিৰৰ  মেডিচিন কোম্পানীত মেনেজাৰ হৈ গৈছিল । Export Import চাব লাগে বুলি  কৈছিল।  এতিয়াও কিজানি তেনেকুৱাতেই আছে ।
আমি  চাকৰি নাই নাই বুলি এনেই চিঞৰি ফুৰো । কষ্ট কৰিব নোখোজো। যোগ্যতা থাকিলে য’তে ত’তে উন্নতি কৰিব পাৰি । আচলতে আমি নিজৰ অৱস্হাৰ বাবে কম বেছি পৰিমাণে নিজেই জগৰীয়া।

চন্দ্ৰমোহন পাটোৱাৰীৰ পলিটিকেল কেৰিয়াৰ কোন দিশে ?

  • দেৱজিত দত্ত

ৰাজনীতি অসম’ (WWW.RAJNITIAXOM.COM) : তিনি বছৰ: ২ লাখ ১২ হাজাৰ পঢ়ুৱৈ


১৯৯৭ চন। তেতিয়া প্ৰফুল্ল কুমাৰ মহন্ত মন্ত্রীসভাৰ কৃষি মন্ত্রী চন্দ্ৰমোহন পাটোৱাৰী। সমষ্টিৰ এজন মানুহে বিশেষ কামত তেখেতক লগ ধৰিবলৈ গ’ল। ৰাতিপুৱা প্ৰায় ১১ বজাত পাটোৱাৰীৰ বাসভৱন পালে।ঘৰুৱা কাম-কাজত সহায়ৰ বাবে থকা  ল’ৰাজনে বহিবলৈ দি ক’লে যে ছাৰ শুই আছে। প্ৰায় এঘন্টা পিছত ছাৰ উঠিল। সমষ্টিৰ মানুহজনৰ লগত পাটোৱাৰীয়ে একেলগে একাপ ৰঙা চাহ খালে। সেইসময়ত চৰকাৰে সকলো নিয়োগ বন্ধ কৰি ৰাখিছিল। পাটোৱাৰীয়ে মানুহজনক বুজালে যে বৰ্তমান চৰকাৰখনে কৰিব পৰা বিশেষ কাম নাই।ল’ৰাজনে চাকৰিৰ বাবে কিছু অপেক্ষা কৰিব লাগিব। সেয়া আছিল আজিৰ পৰা ২৪ বছৰ আগৰ পাটোৱাৰী। সেই সময়তেই যদি মানুহ এজনে ৰাতিপুৱা ১১-১২ বজালৈ শুই থাকে সহজেই অনুমান কৰিব পাৰি আজি কি অৱস্থা হ’ব।  সোণোৱালৰ লগত থকা সুসম্পৰ্কৰ সুযোগতে বিশেষ কোনো কাম নকৰাকৈ মানুহজনে ৫ বছৰ কটাই দিলে। এজন অভিজ্ঞ মন্ত্রী হিচাপে মন্ত্রীসভাৰ আন সদস্যসকলক দিক নিৰ্দেশ দিয়াৰ সলনি তেওঁ ব্যস্ত থাকিল সোণোৱালৰ তোষামোদত। নমামী ব্ৰহ্মপুত্র কৰি তেওঁৰ বিভাগে কৌটি কৌটি টকা পানীত পেলালে। যোৱা ৫টা বছৰত উদ্যোগ আৰু পৰিবহণ বিভাগত কোনো উল্লেখযোগ্য কাম সাধন কৰিব নোৱাৰিলে। হিমন্ত বিশ্ব শৰ্মাৰ চৰকাৰ অহাৰ পিছতে খোল খাইছে চন্দ্ৰমোহনৰ বিভাগৰ আন এক দুৰ্নীতি।  ডিপো লিজত দিয়াত দুৰ্নীতি সংঘটিত হোৱা ঘটনাই ইতিমধ্যে ৰাজ্যৰ ৰাজনীতি জোকাৰি গৈছে। সকলোতকৈ আচৰিত কথা যে মন্ত্রীজনে ইয়াকলৈ কৰা মন্তব্য। কেনেকৈ এজন মন্ত্রীয়ে তেওঁৰ বিভাগত সংঘটিত হৈ থকা ইমান ডাঙৰ ঘটনা এটাৰ ভূ নোপোৱাকৈ থাকে? যদি সঁচাকৈ তেওঁ অজ্ঞ তেন্তে তেওঁৰ মন্ত্রী হোৱাৰ যোগ্যতাকলৈ প্ৰশ্ন উত্থাপন হ’ব। এতিয়াৰ পৰা কেবিনেটৰ সন্মতি নোলোৱাকৈ পৰিবহণ বৰ্ডে একো সিদ্ধান্ত ল’ব নোৱাৰিব। পৰিবহণ বিভাগৰ  বাবে ই চৰম লজ্জাৰ বিষয়। চন্দ্ৰমোহন পাটোৱাৰীয়ো ইয়াক লৈ যথেষ্ট চাপত আছে। আমি পোৱা খৱৰ অনুসৰি হিমন্ত বিশ্ব শৰ্মাই মন্ত্রীসভাত অন্তৰ্ভুক্ত কৰিব বিচৰা নাছিল চন্দ্ৰমোহন পাটোৱাৰীক। একমাত্র সৰ্বানন্দ সোণোৱালৰ হেঁচাত পৰিহে পাটোৱাৰীক মন্ত্রীত্ব দিছে। মুখ্যমন্ত্রীয়ে পাটোৱাৰীক এক বছৰৰ ভিতৰত উদ্যোগ আৰু পৰিবহণ বিভাগক গতিশীল কৰিবলৈ নিৰ্দেশ দিছে। নিজৰ প্ৰদৰ্শন উন্নত কৰিব নোৱাৰিলে পাটোৱাৰীয়ে হেৰাব পাৰে মন্ত্রীত্ব । হিমন্ত বিশ্ব শৰ্মাৰ পাটোৱাৰীৰ ওপৰত কিমান আস্থা আছে আমি নাজানো কিন্তু আমি আচৰিত হ’ম যদিহে পাটোৱাৰীয়ে ১ বছৰত কিবা চমৎকাৰ কৰিব পাৰে।সাধাৰণ মানুহটো দুৰৰ কথা চৰকাৰী বিষয়া এজনেও যদি ড্ৰাইভিং লাইচেঞ্চ বনাব লগা হয় তেন্তে দালালক নধৰি উপাই নোহোৱা অৱস্থা।১৯৮৫ চনৰ মন্ত্ৰীসভাৰ স্বাস্থ্য মন্ত্ৰী , ১৯৯৬ চনৰ মন্ত্ৰী সভাৰ কৃষি মন্ত্ৰী আৰু যোৱা কাৰ্য্যকালৰ উদ্যোগ মন্ত্ৰী এজনৰ সমষ্টিত কিমানটা উদ্যোগ হ’ল বা কিমানখন চিকিৎসা মহাবিদ্যালয় হ’ল সেই তথ্য অসমৰ ৰাইজে জানে । তেওঁৰ মন্ত্ৰীত্বৰ কাৰ্য্যকাল বিচাৰ কৰিলে ধৰ্মপুৰ সমষ্টিৰ উন্নয়ন কোনো গুণে জালুকবাৰীৰ সমষ্টিৰ তুলনাত কম হ’ব নালাগে । কিন্তু বাস্তৱ ছবিখন সম্পুৰ্ণ ওলোটা । জালুকাবৰীত কৈ মানব সম্পদত বহু গুণে চহকী অঞ্চল ধৰ্মপুৰত মানবসম্পদ গঢ়াৰ ক্ষেত্ৰত উল্লেখযোগ্য সাফল্য বুলি ক’লে কিছু সংখ্যক শিক্ষকৰ চাকৰি কথা ক’বই লাগিব । লগতে এই কথাও উচ্চাৰণ হয় যে শিক্ষক নিযুক্তিত চলা অবাধ দুৰ্নীতিৰ বাবেই আজি চৰকাৰী স্কুলত দিনক দিনে ছাত্ৰৰ সংখ্যা কমি গৈছে । অৱসৰ লোৱা সময় নিৰ্ধাৰণত ভুল হ’লে মানুহ এলাগী হয় । সেইয়া ক্ৰীড়া,  ৰাজনীতি যিয়েই নহওক ।