অসমত মৃতদেহৰ ৰাজনীতি

• ৰজত হালৈ

কৰ’না মহামাৰীয়ে গোটেই বিশ্বতেই সন্ত্ৰাসৰ সৃষ্টি কৰিলে । আমেৰিকা , লণ্ডন , ফ্ৰান্স , ইটালী সকলোতে এই বেমাৰ বিধে হাজাৰ হাজৰ মানুহৰ জীৱন কাঢ়ি নিলে আৰু লগতে জীৱিকা । কৰ’নাই অলিম্পিক খেল পিছুৱাই দিলে , ক্ৰিকেটৰ টুৱেন্টি টুৱেন্টি বিশ্বকাপ ৰদ কৰা হ’ল , লণ্ডনৰ সন্মানীয় উমৱলদন টেনিছ প্ৰতিযোগীতা ৰদ কৰা হ’ল ইত্যাদি । ইছলাম ধৰ্মৰ পৱিত্ৰ হজ চৌদি আৰৱে বন্ধ কৰি দিলে , ভাৰতত হিন্দুৰ অমৰনাথ যাত্ৰা বন্ধ হ’ল । ইমানৰ পিছতো অসমত কোনোবা সত্যকাম ফুকন নামৰ ডাক্তৰ এজনৰ বক্তব্যৰ আলমত কংগ্ৰেছ দলৰ নেতা -কৰ্মী সকলে চৰকাৰৰ স্বাস্থ্য বিভাগক কটাক্ষ কৰিলে আৰু বেমাৰটোক লৈ কিছুমান সন্দেহজনক কথা প্ৰচাৰ কৰাত ব্যস্ত হ’ল । আন পিনে গণতন্ত্ৰৰ চতুৰ্থ স্তম্ভ বাতৰি কাকতে স্বাস্থ্য মন্ত্ৰী হিমন্ত বিশ্ব শৰ্মাৰ ভাতৃ এজনৰ কৰ’না সম্পৰ্কীয় বাৰ্তা এটাক বিকৃত কৰি প্ৰচাৰ কৰিলে ।চ’চিয়েল মিডিয়াত বাতৰিটোৰ ব্যাপক প্ৰচাৰ কৰাৰ দায়িত্ব ল’লে ক্ষমতা লোভী এচাম ব্যক্তিয়ে । এনেকুৱা ব্যাপক প্ৰচাৰৰ ফলত এশ জন মানুহৰ  ভিতৰত দহ জনে মুখত মাস্ক খন পিন্ধিবলৈ এৰি দিলে । মাস্ক নিপিন্ধিলে সংক্ৰমণ বৃদ্ধি পাব আৰু সংক্ৰমণ বৃদ্ধি মানেই ৰাজ্যত বৃদ্ধ মানুহ খিনি কৰ’নাত আক্ৰান্ত হোৱাৰ সম্ভাৱনা বৃদ্ধি পালে । এনেকুৱা মিছা প্ৰচাৰে অসমত মানুহৰ মৃত্যুৰ সংখ্যা বৃদ্ধি কৰিব পাৰে আৰু বেছিকৈ মানুহ মৃত্যুমুখত পৰা মানেই ২০২১ চনৰ নিৰ্বাচনত শাসনাধিষ্ঠ দলটোৱে আসন্ন পৰাজয়ৰ সন্মুখিন হ’ব ।
কৰ’নাৰ প্ৰায় এবছৰ আগৰ পৰা আৰম্ভ হোৱা নাগৰিকত্ব বিধেয়ক সংশোধনী আইন বিৰোধী আন্দোলন আৰম্ভ হৈছিল । প্ৰচাৰ চলোৱা হৈছিল ২ কৌটি হিন্দু বঙালী বাংলাদেশৰ পৰা অসমত আহিব । অসমীয়া অসমতে ভগনীয়া হ’ব । আছু, আমছু , বাওঁপন্থী দল , কংগ্ৰেছ , কৃষক মুক্তি আদি সংগঠনৰ দ্বাৰা গোটেই ব্ৰহ্মপুত্ৰ উপত্যকা ( বিটিচি ক বাদ দি) ত আন্দোলন চলিল । গুৱাহটীত আন্দোলনৰ নামত কম বয়সীয়া যুবকৰ মৃত্যু হ’ল , ব্যৱসায়ী সকলে লোকচান ভৰিলে ।
এই আন্দোলনৰ মাজৰ পৰা নিউজ চেনেলৰ সম্পাদক ৰূপান্তৰ  হৈ ৰাজ্যসভাৰ সাংসদ হ’ল । গণতন্ত্ৰৰ চতুৰ্থ স্তম্ভৰ পৰা গণতন্ত্ৰৰ আন এক সৌন্দৰ্য্য উচ্চ সদন লৈ গ’ল । আনহাতে আন্দোলনৰ নামত সাধাৰণ পৰিয়ালৰ যুবকে নিজৰ পৰিয়ালক এৰি থৈ বৈকুন্ঠ গমন কৰিলে । কেবৰ সময়ত পাঁচ -ছয়টা মৃতদেহে এজন সাংসদ বনাব পাৰিছিল , তেনেস্থলত এক লাখ মৃতদেহে চৰকাৰ সলনি কৰিব নোৱাৰিব নে ?