৫২৭ গৰাকী বীৰ পুত্ৰৰ তেজে ধোৱা অপাৰেচন বিজয়

---

মুজাহিদীনৰ চোলা পিন্ধি সংগোপনে ভাৰতৰ ভুমিত প্ৰৱেশ কৰা পাকিস্তানৰ চকুত তেতিয়া দিবাস্বপ্ন৷ জেনেৰেল পাৰভেজ মুছাৰফে দেখিছিল সেই সপোন৷ যদিহে কাশ্মীৰ উপত্যকাত পৰোক্ষভাৱে “ডাঙৰ অঘটন” ঘটাই দিব পাৰি তেনেহ’লে বিষয়টো আন্তঃৰাষ্ট্ৰীয় মঞ্চত উত্থাপন হ’ব৷ সেই সুযোগ প্ৰত্যক্ষভাৱে ল’ব পাকিস্তানে৷ LOC পাৰ হৈ আহি মুজাহিদীনৰ সাজ পিন্ধা পাকিস্তানী সেনাই কাৰ্গিল, ড্ৰাছ, বাটালিকৰ কেইবাটাও স্থানত খুটি পুটিলে৷ আৰম্ভণিতে ভাৰতীয় সেনাই সেয়া সন্ত্ৰাসবাদীৰ চিৰচৰিত আক্ৰমণ বুলি প্ৰতিহত কৰিবলৈ ল’লে৷ এইখিনিতে ভুল হৈ গ’ল৷ সমুখত সেয়া কোনো বিক্ষিপ্ত আক্ৰমণ নাছিল, সেয়া আছিল এক সুচতুৰ সুসজ্জিত আক্ৰমন৷ যাৰ বাবে আৰম্ভণিৰ পৰ্যায়ত সাময়িক বিপৰ্যয়ৰ সম্মুখীন হৈছিল ভাৰতীয় সেনা৷ কিন্তু সুদক্ষ সেনাবাহিনীৰ চোৰাংচোৱাৰ এই কথা পোহৰলৈ আনিবলৈ বেছিদিন নালাগিল৷ এই যুদ্ধ পাকিস্তানৰ প্ৰত্যক্ষ আক্ৰমণ বুলি বহু তথ্য চোৰাংচোৱাই লাভ কৰিলে৷ আনহাতে যুদ্ধক্ষেত্ৰত উদ্ধাৰ হৈছিল পাকিস্তানৰ ফালৰ সুৰংগ, পাকিস্তানী ৱায়ালেছ, চিগাৰেটকে ধৰি বহু সামগ্ৰী৷ খবৰ দিল্লী পালে৷ দিল্লীত তেতিয়া ভাৰতীয় ৰাজনীতিৰ “ৰাইট মেন” অটল বিহাৰী বাজপেয়ী৷ ভাৰত মাতাৰ সীমা লংঘন! ৰণভেৰী বাজি উঠিল৷ ভাৰতে ঘোষণা কৰিলে পুৰ্ণ পৰ্যায়ৰ যুদ্ধ৷ যুদ্ধক্ষেত্ৰত নমোৱা হ’ল বলীয়া হাতী আখ্যা পোৱা বফ’ৰ্চ টেংক, যিয়ে মহতিয়াই লৈ যায় প্ৰতিপক্ষক৷ আকাশত ভাৰতীয় সেনাৰ শুকুলা ঘোঁৰা Indian Air Forceৰ বজ্ৰনিনাদ৷ সন্মিলিত আক্ৰমণত দিক্‌বিদিক হেৰুওৱা পাকিস্তানৰ বাবে এই যুদ্ধ ডিঙিৰ কাইট যেন হ’ল৷ না উলিয়াব পাৰে, না গিলিব পাৰে৷ কিয়নো ইতিমধ্যে সেয়া মুজাহিদিনৰ আক্ৰমণহে তাত পাকিস্তানৰ হাত নাই বুলি আন্তঃৰাষ্ট্ৰীয় পৰ্যায়ত বিবৃতি প্ৰকাশ কৰিছিল দেশখনে৷ যাৰ ফলত নিহত পাকিস্তানী সেনাক নিজৰ সেনা বুলি স্বীকৃতি দি শ্বহীদ ঘোষণা কৰিবলৈও সক্ষম নাছিল দেশখন৷ তাতোকৈ ডাঙৰ কথা, এই যুদ্ধ আছিল সেনাপ্ৰধান পাৰভেজ মুছাৰফৰ মানসপুত্ৰ৷ প্ৰধানমন্ত্ৰী নৱাজ শ্বৰীফে একো উমঘামেই পোৱা নাছিল৷ যেতিয়া গম পালে তেতিয়া দৌৰি গৈ ভৰিত পৰিল ৱিল ক্লিন্টনৰ৷ তেতিয়ালৈ পাৰ হৈ গৈছে প্ৰায় দুটা মাহ৷ যুঁজুধান ভাৰতীয় সেনাৰ প্ৰতাপত পিছ হুঁহুকিবলৈ বাধ্য হৈছে শতৰু৷ তাৰ পিছতেই পাকিস্তানৰ ফালৰ পৰা আহিল সেই বাৰ্তা৷ সন্ধিৰ বাবে সাজু পাকিস্তান৷ ৷ সীমান্তত তেতিয়া ছেদেলি-ভেদেলি পাকিস্তানী সেনা৷ কাৰ্গিল, ড্ৰাছ, বাটালিকত এখন এখনকৈ উৰিছে ভাৰতীয় ত্ৰিৰংগা৷

২৬জুলাই ১৯৯৯৷ এই যুদ্ধত আনুষ্ঠানিক জয় ঘোষনা ভাৰতৰ৷ সফল হ’ল ৫২৭গৰাকী ভাৰতমাতাৰ বীৰ পুত্ৰৰ তেজে ধোৱা অপাৰেচন বিজয়৷