অসমলৈ বহু দূৰ: আমেৰিকাৰ পৰা নৱজ্যোতি ডেকা

চাৰি বছৰ হ’ল। আমেৰিকাৰ বোষ্টন চহৰত আছো। নলবাৰীত মোৰ ঘৰ। বাংগালোৰত অভিযান্ত্রিক পৰীক্ষাত উত্তীৰ্ণ হৈ কিছু বছৰ চাকৰি কৰাৰ পিছত আমেৰিকা পালো। সৰু পৰিয়াল; মোৰ পত্নী আৰু ৩ বছৰীয়া কন্যা সন্তান। আমাৰ এপাৰ্টমেন্টত প্ৰায় ৫০টা মান ফ্লেট আছে। আজি ডেৰ মাহৰ পৰা কোনেও ওলোৱা নাই। চাৰিওফালে বিভিষিকা। আমেৰিকা বিশ্বৰ ভিতৰতে ক’ৰোনা আক্ৰান্তৰ ক্ষেত্রত নম্বৰ ১। সংখ্যা প্ৰায় ১০ লাখৰ ওচৰা ওচৰি। বাহিৰত ওলাই যোৱাৰ কোনো প্ৰশ্নই উঠিব নোৱাৰে।

বজাৰ-সমাৰ অ’নলাইনত কৰো। শ্লট পোৱা মুস্কিল, সেয়ে একেলগে বহুত অৰ্দাৰ কৰো। বস্তু অহাৰ পিছত গ্লোভছ পিন্ধি একাশৰীয়া কৰি তিনিদিন থৈ দিও। শুনিছো ক’ৰোনা ভাইৰাছ হেনো প্লাচটিকত তিনিদিনতকৈ বেছি নাথাকে। ততাতৈয়াকৈ কিবা ব্যবহাৰ কৰিব লাগিলে চেনিটাইজ কৰিহে ব্যবহাৰ কৰো। যোৱাকালি বিষ্কুটৰ পেকেটৰ বাহিৰটো চাবোনেৰে ধুলো তাৰ পিছতহে খুলিলো। উপায় নাই ছোৱালীজনীক লাগে।

 ঘৰৰ পৰাই কাম কৰি আছো। কনফাৰেঞ্চ ক’লবোৰৰ মাজতে কেতিয়াবা মেনেজাৰে মোৰ ছোৱালীজনীৰ থুনুক-থানাক  মাত শুনিব পায়। তায়ো আজিকালি ফূৰ্টিত থাকে। সপ্তাহত দুদিন ভালদৰে লগ পোৱা মানুহ জনৰ লগত সদায় থাকিব পাৰে। এনে পৰিস্হিতি আৰু কিমান দিন থাকে নাজানো। ভাৰতৰ তুলনাত ইয়াৰ লকডাউন অনেক শিথিল। কিছুমান মানুহে আকৌ লকডাউন মানিবলৈ অমান্তি হৈছে। ইয়ে হেনো ব্যক্তি স্বাধীনতাক আঘাত কৰে। চৰকাৰী তথ্য মতে নিউয়ৰ্ক চহৰত স্বাভাবিক অবস্থাত দৈনিক প্ৰায় ১৫ জন মানুহৰ মৃত্যু হয়। কিন্ত ক’ৰোনাৰ বাবে ইয়াত দৈনিক মৃত্যুৰ সংখ্যা প্ৰায় ১০০০ লৈ বৃদ্ধি পাইছিল। যোৱা দুদিনত অবশ্যে দৈনিক মৃত্যুৰ সংখ্যা কমি ৬০০ হৈছে। এনে পৰিস্হিতিত চৰকাৰে ১ জুনৰ পৰা কিছু স্হানত ল’কডাউন প্ৰত্যাহাৰ কৰাৰ সম্ভাবনা আছে।