‘ৰাজনীতি অসম’ অসমৰ প্ৰথম ৰাজনৈতিক ই-আলোচনীৰ প্ৰতিবেদন

---

ৰাজনীতি অসম’ (WWW.RAJNITIAXOM.COM) : দুই বছৰ – ১ লাখ ৬৯ হাজাৰ পঢ়ুৱৈ

---

অসমলৈ আহি প্ৰধানমন্ত্রী মোদীয়ে কৈছিল যে মাৰ্চৰ ৮ বা ১০ তাৰিখে নিৰ্বাচনৰ দিন ঘোষণা হ’ব পাৰে। লগে লগে সংবাদ মাধ্যমে প্ৰচাৰ ইয়াক প্ৰচাৰ কৰি দিলে। বিৰোধীয়ে প্ৰশ্ন কৰিলে_কেনেকৈ মোদীয়ে নিৰ্বাচনৰ দিন ঘোষণা কৰিব পাৰে? পৰিকল্পিত ভাবে মোদীয়ে নিজৰ এজেণ্ডাত সফল হ’ল। ভাষনত মোদীৰ disclaimer ক সংবাদ মাধ্যমে গুৰুত্ব নিদিলে যত তেখেতে কৈছিল যে এয়া তেখেতৰ অনুমানহে মাত্র। নিৰ্বাচনৰ দিন ঘোষণা কৰা নিৰ্বাচন আয়োগৰ কাম আৰু তেওঁলোকে নিজৰ কাম কৰি থাকিব। বিৰোধী দল আৰু ৰাইজক হতবাক কৰি নিৰ্বাচনী আয়গে ২৬ ফেব্ৰুৱাৰী তাৰিখে অসম তথা আন চাৰিখন ৰাজ্যৰ নিৰ্বাচনৰ দিন ঘোষণা কৰিলে। অসমত ২৭ মাৰ্চত হ’বলগীয়া প্ৰথম পৰ্য্যায়ৰ নিৰ্বাচনৰ বাবে মনোনয়ন পত্র দাখিলৰ শেষ দিন ৯ মাৰ্চ। অৰ্থাৎ নিৰ্বাচনৰ দিনাংক ঘোষণা কৰাৰ দিনৰ পৰা প্ৰথম পৰ্য্যায়ৰ নিৰ্বাচনৰ মনোনয়ন পত্র দাখিলৰ শেষ দিনলৈ মাত্র ১০ দিন সময় আছে। ইয়াৰ ফলত বিৰোধী দলবোৰৰ মাজত আৰম্ভ হৈছে হাহাকাৰ।  নিৰ্বাচনী আয়োগ এটা স্বতন্ত্র সংস্থা যদিও বিভিন্ন সময়ত ই কেন্দ্ৰীয় চৰকাৰৰ নিৰ্দেশ মৰ্মে কাম কৰে বুলি অভিযোগ উঠিছে। অসমৰ নিৰ্বাচনী সভাত উপস্থিত থকা সময়ত নৰেন্দ্ৰ মোদী যে নিৰ্বাচনৰ দিন সম্পৰ্কে জ্ঞাত নাছিল সেয়া বিশ্বাস কৰিবলৈ টান। তেন্তে মোদীয়ে কিয় মাৰ্চৰ ৮-১০ তাৰিখমানে নিৰ্বাচনৰ দিন ঘোষণা হ’ব পাৰে বুলি ক’লে? ইয়াক বুজিবলৈ নিৰ্বাচনৰ সুচীখন অধ্যয়ন কৰা প্ৰয়োজন।

অসমৰ বিধানসভা নিৰ্বাচন তিনিটা পৰ্য্যায়ত হ’ব। তেজপুৰ, কলিয়াবৰ, যোৰহাট, ডিব্ৰুগড় আৰু লখিমপুৰ লোকসভাৰ অন্তৰ্গত বিধানসভা সমষ্টিবোৰৰ নিৰ্বাচন হ’ব ২৭ মাৰ্চত। যোৱা লোকসভা নিৰ্বাচনত কলিয়াবৰৰ বাদে আন চাৰিটা লোকসভাত বিজেপি বিপুল ভোটত জয়ী হৈছিল। এই ৪৭ টা বিধানসভা সমষ্টিৰ পৰা বিজেপি মিত্রজোঁটৰ বিধায়ক ৩৬জন। এইবাৰ বিজেপিৰ টাৰ্গেট হ’ল ৪৪। বিজেপিয়ে ৩ টা সমষ্টি ধিং, ৰূপহীহাট আৰু চামগুৰি এৰি দিছে। যোৱাবাৰ পৰাজিত হোৱা সৰুপথাৰ, গোলাঘাট, তিতাবৰ, মৰিয়নি , শিৱসাগৰ, নাজিৰা, নাওবৈচা আৰু ডুমডুমা এইবাৰ বিজেপিৰ টাৰ্গেট। বিজেপিয়ে ইতিমধ্যে কেন্দ্ৰীয় নেতৃত্বৰ নিৰ্দেশত ইয়াত নিৰ্বাচনী প্ৰচাৰ যোৱা দুমাহ মানৰ পৰা চলাই আছে। মোদীও এই অঞ্চলটোলৈ তিনিবাৰকৈ আহিছে। আজমলৰ লগত মিত্রতা হোৱাৰ পিছত এই ৪৭টা সমষ্টিত বিজেপিৰ প্ৰধান প্ৰতিদ্বন্দ্বী হ’বলৈ গৈ আছিল জাতীয় পৰিষদ। কিন্তু আকস্মিকভাবে নিৰ্বাচনৰ দিন ঘোষণাৰ পিছত জাতীয় পৰিষদে কিমান প্ৰতিদ্বন্দ্বিতা আগবঢ়াব পাৰিব তাত সন্দেহ আছে। জাতীয় পৰিষদৰ নিৰ্বাচনী প্ৰতীকটোক ২৫ দিনত কিমান ৰাইজৰ মাজত লৈ যাব সেয়া সহজে অনুমেয়। জাতীয় পৰিষদক বেকফুটত ৰখাৰ উদ্দেশ্যৰে বিজেপিয়ে নিৰ্বাচন সোনকালে কৰিব বিচাৰিছে। ধনে জনে বিজেপি যিহেতু নিৰ্বাচৰ বাবে সম্পূৰ্ণ সাজু সেয়ে বিৰোধীক শলঠেকত পেলাই প্ৰথম পৰ্য্যায়ৰ ৪৪ টা সমষ্টি দখল কৰাৰ পৰিকল্পনা কৰিছে তেওঁলোকে। বিজেপি ইয়াত সফল হ’লে বিজেপিৰ সপক্ষে বতাহ অহা বুলি দ্বিতীয় আৰু তৃতীয় পৰ্য্যায়ৰ ভোটগ্ৰহণত প্ৰচাৰ চলাব।

  দ্বিতীয় পৰ্য্যায়ত ভোটগ্ৰহণ হ’ব ৩৯টা সমষ্টিত। এইকেইটা শিলচৰ, কৰিমগঞ্জ, ডিফু, মংগলদৈ আৰু নগাঁৱ লোকসভাৰ অন্তৰ্গত। নগাঁৱত কংগ্ৰেছৰ আৰু বাকী চাৰিটাত বিজেপিৰ সাংসদ আছে। এই ৩৯টাৰ ভিতৰত বিজেপি-অগপৰ বিধায়কৰ সংখ্যা   ২৫ জন। কংগ্ৰেছ-আজমৰ মিত্রতাৰ ফলত বিজেপিৰ সৰ্বাধিক ক্ষতি হ’ব বৰাকত। এইবাৰ বিজেপিয়ে বৰাকত চাৰিটাতকৈ বেছি সমষ্টি নাপায় বুলি অনুমান কৰিছে। সেয়েহে ইয়াৰ লোকচান পুৰণ কৰিবলৈ বিটিএদিৰ চাৰিটা সমষ্টি পানেৰী, মাজবাট, ওদালগুৰি আৰু মাজবাটক নিৰ্বাচন কৰিছে। কাৰ্বি পাহাৰৰ ৫ সমষ্টি তথা কমলপুৰ, নলবাৰী, ৰঙিয়া, জাগীৰোড, মৰিগাওঁ, বঢ়মপুৰ আৰু হোজাইকলৈ বিজেপি দল অত্যন্ত আত্মবিশ্বাসী। প্ৰথম পৰ্য্যায়ৰ ৪৪ তথা দ্বিতীয় পৰ্য্যায়ৰ ২২খন আসন দখল কৰি বিজেপিয়ে তৃতীয় পৰ্য্যায়লৈ যাব বিচাৰিছে। তেওঁলোকে ভালদৰে জানে যে গুৱাহাটীৰ বাদে তৃতীয় পৰ্য্যায়ত তেওঁলোকৰ পথ মসৃন নহয়। ৬ এপ্ৰিলত হ’বলগা তৃতীয় পৰ্য্যায়ৰ নিৰ্বাচনত আছে ধুবুৰী, বৰপেটা, কোকৰাঝাৰ আৰু গুৱাহাটী লোকসভা সমষ্টিৰ অন্তৰ্গত বিধানসভাৰ সমষ্টি সমূহ। ইয়াৰ পৰা বিজেপিৰ সাংসদ মাত্র এজন তথা ৪০ৰ ভিতৰত বিধায়ক মাত্র ১৬জন। কংগ্ৰেছ-আজমলৰ মিত্রতাৰ পিছত বিজেপি বিপদত পৰিছে গোলকগঞ্জ, সৰভোগ, বিলাসীপাৰা পূব, বৰপেটা আৰু বৰক্ষেত্রীত। ইয়াক পূৰণ কৰিবলৈ সাজু কৰিছে ভবানীপুৰ, তামুলপুৰ,বৰমা, চাপাগুৰি আৰু ছয়গাঁও জয়ৰ ব্লু প্ৰিন্ট।

প্ৰথম পৰ্য্যায়ৰ ৪৪, দ্বিতীয় পৰ্য্যায়ৰ ২২ আৰু তৃতীয় পৰ্য্যায়ৰ ১৬ ; মুঠ ৮২ খন বিধানসভা আসনৰ টাৰ্গেট বিজেপিৰ। কৰ্মকৰ্তা সকলৰ মনোবল বৃদ্ধি কৰিবলৈ ১০১+ ৰ কথা কৈ থাকে যদিও বিজেপি দলৰ আচল টাৰ্গেট ৮২। সততে আলোচনা হয় মোদী মেজিকৰ কথা। নিৰ্বাচনৰ দিন ঘোষণা কৰি বিৰোধীক ২৬ ফেব্ৰুৱাৰীত মোদীয়ে মেজিক দেখালে। ইয়ে বিজেপিক ৮২খন আসন দখল কৰাত সহায় কৰিবনে এয়া সময়তহে জনা যাব।

‘ৰাজনীতি অসম’ অসমৰ প্ৰথম ৰাজনৈতিক ই-আলোচনীৰ প্ৰতিবেদন

---

ৰাজনীতি অসম’ (WWW.RAJNITIAXOM.COM) : দুই বছৰ – ১ লাখ ৬৯ হাজাৰ পঢ়ুৱৈ

---

যোৱা সপ্তাহত কলিকতাত হোৱা এ.বি.পি নিউজৰ শিখৰ সন্মিলনত কেন্দ্ৰীয় গৃহমন্ত্রী অমিত শ্বাহক প্ৰশ্ন কৰা হৈছিল_ অসমত আপোনালোকৰ মুখ্যমন্ত্রী প্ৰাৰ্থী কোন? উত্তৰত শ্বাহে কৈছিল যে যথা সময়ত দলৰ শীৰ্ষ নেতৃত্বই মিলি এই বিষয়ত সিদ্ধান্ত ল’ব। সাধাৰণতে যিকোনো নিৰ্বাচনত বিৰোধী দলক প্ৰশ্ন কৰা হ’য় মুখ্যমন্ত্রী পদৰ প্ৰাৰ্থীৰ বিষয়ে। শাসক দলে নিজৰ ৰাজ্যৰ মুখ্যমন্ত্রীজনৰ নেতৃত্বতে নিৰ্বাচন খেলে আৰু সকলোৱে ধৰি লয় যে জিকিলে বৰ্তমানৰ মুখ্যমন্ত্রী জনেই পুনৰ চৰকাৰখনৰ নেতৃত্ব দিব। সেইবাবেই তৃণমূল কংগ্ৰেছক প্ৰশ্ন কৰা হোৱা নাই তেওঁলোক জিকিলে মুখ্যমন্ত্রী কোন হ’ব। এইটো সৰ্বজন বিদিত যে পশ্চিমবংগত তৃণমূল জিকিলে মমতা বেনাৰ্জীয়ে পুনৰ মুখ্যমন্ত্রী হ’ব। সেইফালৰ পৰা চাব গ’লে অমিত শ্বাহক কৰা প্ৰশ্নটো অলপ ব্যতিক্ৰমী ধৰণৰ। অমিত শ্বাহেও  নকলে যে সৰ্বানন্দ সোণোৱালৰ নেতৃত্বতে আমি নিৰ্বাচন খেলিম আৰু জয়ী হ’লে সোণোৱালে হ’ব আমাৰ মুখ্যমন্ত্রী। ইয়াৰ অৰ্থ হ’ল অমিত শ্বাহৰ হাতত প্লেন বি মজুত আছে আৰু সেয়া হ’ল ড° হিমন্ত বিশ্ব শৰ্মাক মুখ্যমন্ত্রী পদত অধিষ্ঠিত কৰা। আমি পোৱা খৱৰ অনুসৰি শৰ্মাই যেতিয়া ২০১৫ত বিজেপি যোগদান কৰিছিল তেতিয়াই তেওঁ এটা চৰ্ত দিছিল যে ২০১৬ত নহলেও ২০২১ত তেওঁক মুখ্যমন্ত্রীৰ পদ লাগিবই। এতিয়া কেন্দ্ৰীয় নেতৃত্বই সেই দিশত কাম কৰি আছে। নিৰ্বাচনৰ আগতে এই বিষয়ে ঘোষণা কৰি অসম বিজেপিৰ ভিতৰত থকা জাতীয়তাবাদী শিবিৰটোক নিৰাশ কৰিব খোজা নাই তেওঁলোকে। কিন্তু তেওঁলোকৰ কাম কাজত স্পষ্ট হৈছে নতুন সমীকৰণ। অসমৰ আকাশে বতাহে এতিয়া ‘সকলোৰে আনন্দ সৰ্বানন্দ’ চলা নাই। অসমত এতিয়া ভাইৰেল হৈছে ‘আহিছে আহিছে হিমন্ত আহিছে’ গান। নিৰ্বাচনী ৰণকৌশল যুগুত হৈছে শৰ্মাৰ নেতৃত্বত। ইস্তাহাৰৰ পৰা আৰম্ভ কৰি প্ৰাৰ্থী বাচনি সকলোৰে দায়িত্ব অমিত শ্বাহে ন্যস্ত কৰিছে হিমন্ত বিশ্ব শৰ্মাৰ ওপৰত। হিমন্ত বিশ্বই নিজৰ প্ৰচাৰ অভিযানক দুটা ভাগত বিভক্ত কৰিছে। প্ৰাৰ্থী ঘোষণা কৰাৰ আগত প্ৰতিজন সম্ভাব্য  প্ৰাৰ্থীৰ শক্তিৰ উমান লবলৈ শৰ্মাই সমষ্টিয়ে সমষ্টিয়ে চলাইছে চাইকেল আৰু পদযাত্রা। ৰাইজৰ লগত সংবাদৰ ওপৰত পোৱা তথ্য তথা সমৰ্থকৰ সংখ্যাৰ ওপৰতে নিৰ্ভৰ কৰিব টিকট পোৱা নোপোৱাৰ খেল। এবাৰ টিকট নিৰ্ধাৰণ হোৱাৰ পিছত পুনৰ ১০০ টা বিধানসভা সমষ্টিত কমেও দুখনকৈ নিৰ্বাচনী সভা পতাৰ লক্ষ্য শৰ্মাৰ।

ইতিমধ্যে বিভিন্ন আচনি যেনে অৰুণোদয়, স্বয়ম, স্কুটি আদিৰ জৰিয়তে অসমৰ ৰাজনীতিত জনপ্ৰিয়তাৰ শিখৰত উপনীত হৈছে। ৰাজনীতি অসমৰ অ’পিনিয়ন প’ল মতে অসমত মোদীতকৈও শৰ্মাৰ জনপ্ৰিয়তা অধিক। তেনে ক্ষেত্রত কেন্দ্ৰীয় নেতৃত্বয়ো  বুজি উঠিছে যে এইবাৰ তেওঁক ফুচুলোৱা কঠিন হ’ব। ২০১৫ত দিয়া কথা ৰখাৰ বাহিৰে গত্যন্তৰ নাই। গুৰুত্বপূৰ্ণ হ’ব নিৰ্বাচনৰ পিছত সৰ্বানন্দ সোণোৱালৰ ভূমিকা। সোণোৱালকো অসন্ত্তষ্ট কৰিব নিবিচাৰিব মোদী-শ্বাহ- নাদ্দাই। সোণোৱালে যদি কেন্দ্ৰলৈ যাব নিবিচাৰে তেন্তে ইয়াক সমাধান কৰাটো হ’ব বিজেপি নেতৃত্বৰ বাবে এক ডাঙৰ প্ৰত্যহ্বান।

মহাৰাষ্ট্ৰত ২০০৪ চনত সুশীল কুমাৰ সিন্ধে আছিল কংগ্ৰেছৰ মুখ্যমন্ত্রী। কিন্তু নিৰ্বাচনত জয়ী হোৱাৰ পিছত সিন্ধেৰ সলনি বিলাসৰাও দেশমুখক মুখ্যমন্ত্রী পাতে। অসমো এইবাৰ একে পথতে অগ্ৰসৰ হৈছে। ইয়াৰ বাহিৰে কোনো ৰাজ্যতে নিৰ্বাচনত জয়ী হোৱাৰ পিছত শাসক দলৰ মুখ্যমন্ত্রী সলনি কৰা আমি দেখা নাই।  হিমন্ত বিশ্ব শৰ্মাৰ প্ৰতিখন সভাৰ ভিৰ দেখি ৰাজনীতিৰ বিষয়ে সম্যক জ্ঞান থকা ব্যক্তিজনেও বুজি পাইছে ২০২১ত কাৰ চৰকাৰ হ’ব আৰু কাৰ বাবে চৰকাৰ হ’ব। ২০০১ চনত প্ৰথম বাৰৰ বাবে বিধানসভালৈ নিৰ্বাচিত হোৱা হিমন্ত বিশ্ব শৰ্মা আজি বহু বছৰ ধৰি অসমৰ CM in waiting  হৈ আছিল। ২০ বছৰীয়া দীঘলীয়া পৰিক্ৰমাৰ পিছত শৰ্মা আৰু মুখ্যমন্ত্রীৰ চকীৰ মাজৰ ব্যবধান মাত্র আঢ়ৈ মাহ।

২৭ মাৰ্চৰ পৰা ৬ এপ্ৰিললৈ চলিব অসমৰ বিধানসভাৰ নিৰ্বাচন। অহা এমাহত সকলো দলৰে বাঘা বাঘা ৰাজ্যিক তথা ৰাষ্ট্ৰীয় নেতাসকলৰ আপোনাৰ সমষ্টিলৈ আগমন ঘটিব পাৰে। তেওঁলোকে আপোনাক দিব অজস্ৰ প্ৰতিশ্ৰুতি। ২ মেৰ পিছত ১২৬ জন আইন প্ৰণয়নকৰ্তাই অসমৰ বিধানসভাত প্ৰবেশ কৰিব। আপোনালোকক দিয়া প্ৰতিশ্ৰুতিবোৰ তেওঁলোকে পালন কৰিব পাৰিবনে নোৱাৰে কোৱাটো কঠিন। কিন্তু অহা বিধানসভা নিৰ্বাচনৰ পুৰ্বানুমাণ কৰি আপুনি লাভ কৰিব পাৰে ১ লাখ টকাৰ নগদ ধন। অহা বিধানসভা নিৰ্বাচনত অসমৰ প্ৰধান দলসমূহে কিমানখনকৈ আসন পাব, সেইটো সঠিকভাবে ক’ব পাৰিলেই আপুনি পাই যাব পাৰে ১ লাখ টকা। আমাৰ অ’পিনিয়ন প’লত ভাগ ল’বলৈ তলত ক্লিক কৰক। অ’পিনিয়ন প’লত ভাগ লোৱাৰ শেষ তাৰিখ ৬ এপ্ৰিল ২০২১। অ’পিনিয়ন প’লৰ নিয়মসমূহ ভালদৰে পঢ়ি ল’ব।

হিমন্ত বিশ্ব শৰ্মাই তেওঁৰ গ্ৰন্থ এখন উন্মোচন কৰা কাৰ্য্যসূচীত অসমৰ ভৱিষ্যত সম্পৰ্কে বিভিন্ন মন্তব্য কৰিছে । প্ৰখ্যাত সাংবাদিক কৌশিক ডেকাই ‘কা’ আইনখনক বিৰোধীতা কৰি হিমন্ত বিশ্ব শৰ্মাৰ স্থিতিকো প্ৰশ্ন কৰিছিল । আনকি শিলচৰ ( কাচাৰ)ত অসমীয়া ভাষাক কিয় ৰাজ্যভাষাৰ স্থান দিব পৰা নাই তাকেলৈও খেদ ব্যক্ত কৰিছে । কৌশিক ডেকাৰ দৰে বিদগ্ধ সাংবাদিক এজনৰ বাবে বৰাক আৰু ব্ৰহ্মপুত্ৰ উপত্যকাৰ মাজৰ সম্পৰ্ক কেনেকৈ আৰম্ভ হৈছিল সেই কথা হয়তো জ্ঞাত নহয় । অসমীয়া ভাষী বা বঙালি ভাষী নতুন প্ৰজন্মই জনা আৱশ্যক  যে কাচাৰ , শিলচৰ ,চিলেট ( বৰ্তমান বাংলাদেশৰ অন্তৰ্গত) আদি অঞ্চল বৃটিছে দখল কৰাৰ আগৰ বিভিন্ন সময়ত বিভিন্ন ভাষা-ভাষী ৰজাই শাসন কৰিছিল । মনিপুৰী ৰজা , কোঁচ ৰজা , কছাৰী  ৰজা আদি বিভিন্ন জনে এই অঞ্চলটো ভিন্ন সময়ত নিজৰ দখলত ৰাখিছিল ।

অসম তথা ভাৰতৰ সাধাৰণ জনতাই কাচাৰৰ কথা অধিক জনাৰ পৰিবেশ কেতিয়াও পোৱা নাই আৰু সমান্তৰাল ভাবে ভাৰত বিভাজন বুলি ক’লেও সাধাৰণ মানুহৰ মনত  পঞ্জাৱৰ ছবিখনেই আহে । কিন্তু পঞ্জাৱ বা সিন্ধ প্ৰদেশৰ ছবিৰ লগতে ভাৰতৰ পুৱ প্ৰান্তৰ অসমৰ সংলগ্ন এক বৃহৎ অঞ্চলো যে বিভাজনৰ স্বীকাৰ হৈ পাকিস্তানত অন্তৰ্ভুক্ত হৈছিল সেই ছবিখন ভাৰতৰ সাধাৰণ জনতাৰ জ্ঞাত নহয় আৰু তাতকৈ ডাঙৰ কথা অসমৰ অধিকাংশ মানুহেই নাজানে । ৰাষ্ট্ৰবাদী ভাষণ দিয়া অসমৰ নেতাসকলে অসমখন  কাশ্মীৰ হ’ব বুলি দিয়া ভাষণতো স্থান নাপায় অসমৰ কিমান অংশ পাকিস্তানৰ অন্তৰ্ভুক্ত হৈছিল । ভাষাভিত্তিক জাতিবাদত লিপ্ত নেতাসকলে ৰাষ্ট্ৰবাদীক প্ৰত্যুত্তৰ দিয়া কথাত সংলগ্ন হয় যে অসমখন দৰাচলতে ত্ৰিপুৰাহে হ’ব ।  ত্ৰিপুৰা আৰু কাশ্মীৰতেই সীমাবদ্ধ আমাৰ সমাজ ।

২০২১ বিধান সভা নিৰ্বাচনৰ আগমুহুৰ্তত আগন্তুক নিৰ্বাচনৰ ৰূপৰেখা কি হ’ব সহজে অনুমান কৰিব পাৰি । এফালে বদৰুদ্দিন আজমল আৰু কংগ্ৰেছৰ মুক্ত মিত্ৰতা আৰু আনফালে বিজেপি । আইএমডিটি ৰ সমৰ্থক , সমষ্টি সংৰক্ষণ ব্যৱস্থাৰ বিৰোধী , ভগনীয়া হিন্দুক নাগৰিকত্ব প্ৰদানৰ বিৰোধী নীতিৰ সমৰ্থক ইউডিএফৰ লগত কংগ্ৰেছ দলে কৰা মিত্ৰতাই বিজেপিক বিপদত পেলাব বুলি মিত্ৰগোটৰ নেতাসকলে দাবী কৰিছে । হিমন্ত বিশ্ব শৰ্মাই পুৰ্ব বংগীয় মুছলমানৰ  ভোট বিজেপিক নালাগে বুলি কোৱাৰো কোনো অৰ্থ নাই । কাৰণ এইচাম ভোটাৰে বিজেপিক ভোট দিয়াৰ নজিৰ নাই । যোৱা লোকসভা নিৰ্বাচনত বৰপেটা লোকসভা সমষ্টিত কুমাৰ দীপক দাসে লাভ কৰা ভোটৰ বিন্যাসে সকলো প্ৰমাণ কৰিছে । অন্যহাতে খিলঞ্জীয়া মুছলমানৰ সুৰক্ষাৰ কথা কোৱা বিজেপিৰ কাৰণে বিচাৰ্য্য বিষয়টো হ’ল  অসমীয়াভাষী মুছলমান ভোটৰ প্ৰাসংগিকতাও খুব বেছি ৪-৫ টা সমষ্টিটেই সীমাবদ্ধ ।

চিলেট ___স্বাধীনতাৰ আগমুহুৰ্তলৈ অসমৰ এখন জিলা আছিল ; কামৰূপ ,শিবসাগৰ বা নগাঁৱৰ দৰে । দেশ বিভাজনৰ প্ৰাকমুহুৰ্তত অসমৰ চিলেটত গণভোটৰ সিদ্ধান্ত লোৱা হৈছিল । চিলেট অঞ্চলটোৰ জনগাঁঠনি কি আছিল ? বা একেলগে ভাৰতৰ স্বাধীনতা যুদ্ধত অংশ লোৱা মানুহখিনিৰ মাজত ভোটৰ জড়িয়তে ভৱিষ্যত নিৰ্ধাৰণ কৰা প্ৰক্ৰিয়াটোক কিয় বাস্তবিত কৰা হ’ল সেইয়া এতিয়া ইতিহাস ।  উত্তৰ চিলেট ( ৬৭% মুছলমান ),দক্ষিণ চিলেট(৩৯%মুছলমান ),চুনামগঞ্জ(৫৫%মুছলমান ),কৰিমগঞ্জ(৪৭% মুছলমান) । এনেকুৱা এটা জনগাঁঠনিৰ অঞ্চল চিলেটক পাকিস্তানত অন্তৰ্ভুক্ত কৰাত মহম্মদ আলি জিন্নাৰ অকণো অসুবিধা হোৱা নাছিল । ভোটদান হৈছিল দুটা দিনত । ১৯৪৭ চন ,জুলাইৰ ৬ তাৰিখ আৰু ৭ তাৰিখ আছিল ভোটগ্ৰহণৰ দিন । ব্যৱহাৰ হোৱা বেলটত দুটা চিহ্ন আছিল । ঘৰৰ ছবিয়ে ভাৰতত থকাৰ পক্ষক বুজাইছিল আৰু কুঠাৰৰ চিহ্নই পাকিস্তানৰ পক্ষক প্ৰতিনিধিত্ব কৰিছিল । জাতীয় কংগ্ৰেছৰ ভাৰতৰ সপক্ষে প্ৰচাৰ আৰু মুছলীম লীগৰ পাকিস্তানত অন্তৰ্ভুক্ত  কৰাৰ পক্ষত প্ৰচাৰে সমাজক লেতেৰা কৰাৰ আগতেই জিন্নাই মুছলমান মানুহৰ মনত ধৰ্মীয় ৰাজনৈতিক চেতনা জগাই তুলিছিল । জিন্নাই নিজৰ এজেণ্ডা চলাই নিয়াত সফল হয় আৰু ভাৰতৰ পক্ষত প্ৰচাৰ চলোৱা কংগ্ৰেছ দল পৰাজিত হয় । কংগ্ৰেছৰ পক্ষত থাকি জমিয়ত উলেমা ই  হিন্দৰ নেতাসকলে মুছলীম লীগক বিৰোধ কৰিছিল । কিন্তু ৰাজনৈতিক ভাবে বিচক্ষণ মুছলমান সমাজে জমিয়তক গুৰুত্ব দিয়া নাছিল।জমিয়তৰ ধৰ্মীয় নেতাৰ বিধৰ্মী ৰাজনীতিক মুছলমান সমাজে প্ৰত্যাখ্যান কৰিছিল আৰু জিন্নাৰ ধাৰ্মিক ৰাজনীতিক সমৰ্থন কৰি পাকিস্তানৰ পক্ষত ভোট দিছিল ।  বৃটিছে ছিলেট দখল কৰাৰ পিছত বিভিন্ন সময়ত ছিলেটৰ মুছলমান জনতাই অসমৰ লগত থকাৰ কাৰণে আগ্ৰহ ব্যক্ত  কৰিছিল  , আনহাতে ছিলেটৰ হিন্দু খিনিয়ে বংগৰ লগত থকাৰ আগ্ৰহ কৰিছিল । ছিলেটৰ মুছলমানৰ অধিকাংশই নিৰক্ষৰ আছিল যদিও ৰাজনৈতিক বিচক্ষণতা বহু প্ৰখৰ আছিল । ছিলেটৰ হিন্দু সকলে বঙালী ভাষী হিচাপে মুছলমান মানুহখিনিৰ লগত ভাষীক আবেগেৰে বান্ধ খাই আছিল । তৎস্বত্তেও ছিলেটীয়া মুছলমান মানুহখিনিয়ে অসমৰ অসমীয়া ভাষী আৰু জনজাতি মানুহৰ সংখ্যাগৰিষ্ঠ অসমত থকাৰ যুক্তিত অটল আছিল । অসমৰ লগত থকাৰ বিষয়টো অসমীয়া প্ৰেম নাছিল , ই আছিল এটা কেলকুলেতদ সিদ্ধান্ত , কাৰণ তেওঁলোকে জানিছিল যে অসমত তেওঁলোকৰ সংখ্যাৰ অনুপাত হিন্দুৰ তুলনাত সামান্যহে কম । সেয়ে মুছলমান আধিপত্য অসমত বেছি প্ৰাসংগিক হব বংগতকৈ । গণভোটৰ ১৫ দিন পিছত আকাশবানী( ৰেডিঅ) ত গণভোটৰ ফলাফল ঘোষণা হয় । ঘোষণাৰ পিছতেই  ছিলেটৰ পৰিবেশ সলনি হৈ যায় । দুই দিন আগলৈ বন্দে মাতৰম ধ্বনি মুখৰিত হৈ থকা কৰিমগঞ্জ , হবিগঞ্জ , খুলনাৰ ৰাস্তাবোৰত নাৰা ই টকবিৰ শ্লোগান শুণা গ’ল । বঙালী ভদ্ৰ লোক পৰিয়ালসকলে মহিলা আৰু শিশুক গুৱাহাটী আৰু শ্বিলংলৈ লৈ আহে । প্ৰথমতে ভাবিছিল যে পৰিস্থিতি শান্ত হলে নিজৰ নিজৰ ঘৰলৈ ঘুৰি যাব আকৌ । কিন্তু পৰিস্থিতি শান্ত কোনোদিনেই নহ’ল । বৰ্তমান  অসমৰ বৰাক উপত্যকাৰ ৰাতাবাৰী , কৰিমগঞ্জ , পাথাৰকান্দি আদি অঞ্চলত পাকিস্তানী পতাকা ঘৰে ঘৰে উৰুৱা হ’ল । ২১ জুলাইৰ  ফলাফল ঘোষণাৰ দিনটোত অধিকাংশ মানুহৰ বাবে ভৱিষ্যত পৰিস্থিতি কি হব ধাৰণা নাছিল ।  হিন্দুৰ পলায়ন আৰম্ভ হৈ গ’ল । মহিলাৰ ওপৰত অত্যাচাৰ , ঘৰ বাৰী দখল কৰা পৰিবেশ হিন্দু পৰিয়ালে দেখিছিল আৰু  সাম্প্ৰদায়িক সম্প্ৰীতিৰ মৰিচিকা উপলব্ধি কৰিছিল ।

মাউন্ট বেটেন আৰু কংগ্ৰেছৰ মাজত হোৱা আলোচনাত ১৫ আগষ্টৰ দিনটোক ক্ষমতা হস্তান্তৰ দিন হিচাপে বাচি লোৱা হৈছিল আৰু সেই মৰ্মে বৃটিছ বিষয়া ৰেদক্লিফে ভাৰতৰ  মানচিত্ৰ খন বনাই আছিল । ১৩ আগষ্টৰ দিনটোত পুনৰ চৰকাৰে ঘোষণা কৰে যে কৰিমগঞ্জ  ভাৰতৰ লগত থাকিব । কৰিমগঞ্জৰ পৰিবেশ পুনৰ সলনি হ’ল । পাকিস্তানৰ পতাকা গুছাই ভাৰতৰ পতাকা আঁৰি দিয়া হ’ল । আৰু তেতিয়াৰ পৰাই গণভোটত পাকিস্তানৰ পক্ষত ভোট দিয়া মুছলমান মানুহখিনিও ভাৰততে থাকি গ’ল ।

২০২১ ৰ নিৰ্বাচন সাধাৰণ বিধান সভাৰ নিৰ্বাচন হ’ব বুলি ধাৰণা কৰা নাযায় । কাৰণ পুৰ্ব বংগীয় মুছলমানৰ দল সংগঠন সমুহৰ লগত কংগ্ৰেছে মুক্ত মিত্ৰতা কৰিছে আৰু অসমীয়া ভাষী ছাত্ৰ সংগঠন কিছুমানে হিন্দু সংস্থাপনৰ সমৰ্থন থকা নাগৰিকত্ব আইনক বিৰোধীতা কৰি পুৰ্ব বংগীয় মুছলমানৰ দলবোৰক নৈতিক সমৰ্থন প্ৰদান কৰিছে । এনেকুৱা সন্ধিক্ষণৰ সময়ত  ৰাষ্ট্ৰবাদী ভোটাৰখিনিৰ কাৰণে বিজেপিয়ে কি স্থিতি লব আৰু কিছু দিন পিছতেই স্পষ্ট হব ।

‘ৰাজনীতি অসম’ অসমৰ প্ৰথম ৰাজনৈতিক ই-আলোচনীৰ প্ৰতিবেদন

---

ৰাজনীতি অসম’ (WWW.RAJNITIAXOM.COM) : দুই বছৰ – ১ লাখ ৬৯ হাজাৰ পঢ়ুৱৈ

---

অসম বিধানসভাৰ নিৰ্বাচন সমাগত। এতিয়া অসমৰ সকলোতে ৰাজনৈতিক নেতাৰ ভিৰ। গাতত লুকাই থকা বহু নেতা এতিয়া ৰাইজৰ মাজলৈ যাবলৈ বাধ্য হৈছে। দিল্লীৰ নেতাসকলেও অসমত খদম-দম লগাইছে। আমি যোৱা মাহৰ অ’পিনিয়ন প’লত ৰাইজলৈ প্ৰশ্ন কৰিছিলো যে কোনজন নেতাৰ কথাত ৰাইজে বিশ্বাস কৰিব ? ১ ফেব্ৰুৱাৰীৰ পৰা ২০ ফেব্ৰুৱাৰীলৈ চলা এই অ’পিনিয়ন প’ললৈ ৰাইজৰ পৰা আহিল ব্যাপক সহাৰি। এটা কথা স্পষ্ট হ’ল যে ৰাইজে দিল্লীৱালা নেতাসকলতকৈ অসমৰ নেতাসকলক প্ৰাধান্য দিয়ে। ২৭.৪% ভোট পাই শীৰ্ষত থাকে অসমৰ বিত্ত, স্বাস্থ্য, শিক্ষা আদি বিভাগৰ মন্ত্রী ড° হিমন্ত বিশ্ব শৰ্মা। দ্বিতীয় স্থানত থাকে জাতীয় পৰিষদৰ সভাপতি লুৰিণজ্যোতি গগৈ। তৃতীয় স্হান দখল কৰে অসমৰ মুখ্যমন্ত্রী সৰ্বানন্দ সোণোৱালে। প্ৰথম তিনিজন নেতাৰ ভোট লাভৰ শতাংশ আছিল এনে ধৰণৰঃ

চতুৰ্থ স্থান দখল কৰে ভাৰতৰ প্ৰধানমন্ত্রী নৰেন্দ্ৰ মোদীয়ে। অসম কংগ্ৰেছৰ নেতা তথা সাংসদ প্ৰদ্যুত বৰদলৈ থাকে পঞ্চম স্থানত। ষষ্ঠ স্থান যুতিয়া ভাবে লাভ কৰে ভাৰতৰ গৃহমন্ত্রী অমিত শ্বাহ আৰু কংগ্ৰেছ সাংসদ গৌৰৱ গগৈয়ে।

তালিকাৰ শেষত থাকে ৰাহুল গান্ধী, বদৰুদ্দিন আজমল, ৰিপুণ বৰা আৰু অখিল গগৈ। তেওঁলোকে লাভ কৰা ভোটৰ পৰিমাণ আছিল এনে ধৰণৰঃ

সামগ্ৰীক ভাৱে চাব গলে এই অপিনিয়ন প’লৰ পৰা তিনিটা কথা স্পষ্ট হ’ল। হিমন্ত বিশ্ব শৰ্মা এতিয়াও অসমৰ নিৰ্বাচনী ৰাজনীতিৰ অপ্ৰতিদ্বন্দী সেনাপতি। দ্বিতীয় কথাটো হ’ল দিল্লীৰ নেতাৰ সভাত ভিৰ হ’লেও ৰাইজৰ মনত বিধানসভাৰ নিৰ্বাচনত তেওঁলোকৰ গুৰুত্ব বেছি নাই। শেষত বিজেপিৰ নেতাসকলৰ জনপ্ৰিয়তা কংগ্ৰেছৰ নেতাসকলতকৈ বেছি। লুৰিণ জ্যোতি গগৈয়ে  কংগ্ৰেছৰ নেতাসকলক পিছ পেলোৱাটো তেওলোকৰ কাৰণে নিশ্চয় চিন্তাৰ কাৰণ।