অসমৰ ৰাইজে সৰ্বানন্দ সোণোৱাল আৰু  হিমন্ত বিশ্ব শৰ্মাৰ ভাষণ শুনি বিজেপিক   ভোট দিয়া নাছিল । এই কথাষাৰ কোৱাৰ অৰ্থ এইটো নেকি যে বুদ্ধিজীবী সকলে  জনতাৰ মন যেনেকৈ পঢ়িব পাৰে বুলি দাবী কৰে তেনেকৈ আমিও জনতাৰ মন পঢ়িব পাৰিছো দাবী কৰিছোঁ । মুঠেই নহয় । বুদ্ধিজীবী সকলে জনতাৰ মনটোক  পঢ়াৰ চেষ্টা নকৰে , তেওঁলোকে জনতাৰ ওপৰত প্ৰভাব পেলাব হে বিচাৰে ।  বুদ্ধিজীবী সকলে জনতাৰ মন পঢ়িব আগতেও পৰা নাছিল আৰু এতিয়াও নোৱাৰে। তেওঁলোকে মাত্ৰ চেষ্টা কৰে কেনেকৈ জনতাৰ চিন্তা শক্তিত বিচ্ছিন্নতাবাদ আদৰ্শ সোমাই দিব পৰা যায় ।  আমি কোৱা কথাষাৰ কল্পনা নহয় , ই তথ্য  ভিত্তিক । সৰ্বানন্দ সোণোৱাল অগপৰ পৰা সাংসদ হৈছিল , জাতীয় নায়ক উপাধি এটাও আছে , তেনেস্থলত নায়কে কিন্তু দলত্যাগ কৰিব লগা হৈছিল।  দলৰ লগতে সংসদীয় সমষ্টিও সলনি কৰি বিজেপিৰ চিহ্নত সাংসদ হৈছিল । কংগ্ৰেছ আমোলৰ প্ৰবল প্ৰতাপী আৰু জনতাৰ হাৰ্টথ্ৰোব নেতা হিমন্ত বিশ্ব শৰ্মাই ২০১৬ নিৰ্বাচনৰ আগত কংগ্ৰেছ দল ত্যাগ কৰি বিজেপিত যোগ দিলে । পুৰ্বতে সাম্প্ৰদায়িক বুলি কটাক্ষ কৰা বা নৰেন্দ্ৰ মোদীক গুজৰাট কাণ্ডৰ কাৰণে সমালোচনা কৰা ব্যক্তিজনে বিজেপিক বাচি ল’লে । ৰাজনীতিৰ চানক্য জনৰ কাৰণে যদি সকলো সম্ভৱ তেন্তে অসম গণ পৰিষদত যোগদান কৰি চানক্য নীতিৰে নিৰ্বাচন জয়ী কৰায় অনাটো সাধাৰণ কথা আছিল  বা মহাভাৰতৰ যুদ্ধত কৃষ্ণ- অৰ্জুনৰ দৰে সৰ্বা- হিমন্ত হৈ নতুন দল জন্ম দি অসমত চৰকাৰ গঠন কৰিবলৈ কিয় চেষ্টা নকৰিলে ?  তৰুণ গগৈ চৰকাৰৰ পোন্ধৰ বছৰীয়া কাৰ্যকালত গুপ্ত হত্যা বন্ধ হৈছিল  ,  তৰুণ গগৈৰ পৰিয়ালত ফেচিষ্ট আচৰণ ৰাইজে এবাৰো অনুভৱ নকৰিলে । কংগ্ৰেছৰ দিনত ধৰ্মীয় সংখ্যালঘু মুছলমান তোষামোদ যিখিনি হয় সেই খিনিৰ কাৰণে অকল কংগ্ৰেছ দায়ী নহয় । এইক্ষেত্ৰত সংখ্যাগৰিষ্ঠ ভোটাৰো সমানে দায়ী । যিখিনি দুৰ্নীতি গগৈৰ দিনত হৈছিল সেই একে দুৰ্নীতিৰ অভিযোগ এতিয়াও উঠিছে । আগৰবাৰ যদি  এপিএছ চি কেলেংকাৰী  এইবাৰ আকৌ পিএনআৰডি । ৰাজনৈতিক দলত বিসম্বাদ সাধাৰণ কথা , বিসম্বাদ নথকাটোহে আচৰিত । কংগ্ৰেছৰ পোন্ধৰ বছৰীয়া কাৰ্য্যকালত বিসম্বাদ আছিল কিন্তু কেন্দ্ৰত ক্ষমতাত থকা কংগ্ৰেছ হাইকামাণ্ডে অতি সহজে বিসম্বাদ নিয়ন্ত্ৰণ কৰিব পাৰিছিল ।  তৰুণ গগৈৰ তৃতীয় কাৰ্যকালৰ শেষৰ সময়ছোৱাত  বিসম্বাদে ডাঙৰ ৰূপ লৈছিল কাৰণ ২০১৪ ত কংগ্ৰেছ ক্ষমতাচ্চ্যুত হয় আৰু নৰেন্দ্ৰ মোদী প্ৰধানমন্ত্ৰী হয় ।  বিসম্বাদ দুৰ কৰাৰ বাবে চানক্য মষ্টিষ্কৰ প্ৰয়োজনো নাই । কাৰণ প্ৰতিটো বিসম্বাদৰ প্ৰধান কাৰণ ব্যক্তিগত স্বাৰ্থ , বিসম্বাদত ৰাষ্ট্ৰ ধৰ্ম বা অসম প্ৰেম মাত্ৰ লেবেল সদৃশ ।  কংগ্ৰেছৰ গছ ডাল হালিল আৰু হলা গছত বাগী কুঠাৰ মাৰে । একেই ঘটনা অসমত ঘটিল । একে ৰাতিত বহু চিণ্ডিকেট সম্ৰাটে খাকী হাফপেন্ট পিন্ধিলে ।  ছোনীয়া মাতা ধ্বনী দিয়া বহুতেই ভাৰত মাতা ধ্বনী দিলে । মুঠৰ ওপৰত মৌলবাদ আৰু বিচ্ছিন্নতাবাদৰ কাপোৰ সলায় ৰাষ্ট্ৰীয়তাবাদৰ পোচাক পিন্ধিলে । ২০১৬ ত প্ৰথমবাৰৰ বাবে চৰকাৰ গঠন কৰা দলটোত আৰম্ভ হয় পুৰণি কৰ্মী আৰু নতুন কৰ্মীৰ মাজত শীতল যুদ্ধ । সাগৰ মন্থনৰ দৰে সম্পদ আৰু ধন মন্থনৰ এই প্ৰতিযোগীতা খনে এবছৰ পিছতেই ৰূপ সলনি কৰে । নতুন আৰু পুৰণিৰ ধাৰণা সলনি  হয় । চৰকাৰ গঠনৰ এবছৰ পিছতেই আৰম্ভ হয়  পাৰ্চেন্টেজৰ অংক ।  কংগ্ৰেছত যিমান জন মন্ত্ৰী সিমানটা ল’বি থাকে , তাতে আকৌ কোনোবা মন্ত্ৰী যদি ৰাহুল গান্ধীৰ ঘনিষ্ঠ তেন্তে আনজন আকৌ ছোনিয়া গান্ধীৰ ঘনিষ্ঠ । বিজেপিত স্পষ্ট ৰূপত লবি ৰাজনীতি দেখা দিছে সদ্য গঠন হোৱা জিলা সমিতি সমুহৰ পুনৰ গঠন হোৱাৰ পিছত । এতিয়া লবিৰ সংখ্যা মাত্ৰ দুটা । এটা লবি দাদা ব্ৰিগেদৰ আৰু আনটো নায়ক ব্ৰিগেদৰ । টিকট বিতৰণ , বিধায়ক নিৰ্বাচন ,সম্পদ আহৰণ আৰু মুখ্যমন্ত্ৰীত্ব __এই চাৰিটা ফেক্টৰে নিৰ্ধাৰণ কৰে লবিৰ ৰণকৌশল । কিন্তু ২০২১ ত ভোটাৰ ৰণকৌশলত লবি , মন্ত্ৰীত্ব ,মুখ্যমন্ত্ৰীত্ব এইবিলাক গুৰুত্বহীন ।  যোৱাবাৰৰ বিজেপি মিত্ৰজোঁটৰ ভোটাৰ খিনিয়ে  চাব যে নৰেন্দ্ৰ মোদীয়ে ২০১৬ ৰ নিৰ্বাচনী সভাত দিয়া প্ৰতিশ্ৰুতি সমুহ অসম চৰকাৰ খনে কিমান বাস্তৱৰূপ দিব পাৰিছে ; আনহাতে যোৱাবাৰৰ মোদী  বতাহ স্বত্তেও বিজেপিৰ বিৰুদ্ধে ভোট দিয়া ভোটাৰ খিনি এইবাৰ একত্ৰিত হৈ ইভিএমত যুদ্ধ দিব । ইভিএমৰ এটা চুইচে প্ৰতিনিধিত্ব কৰিব ধাৰা ৩৭০ প্ৰেম আৰু আন এটাই  প্ৰতিনিধিত্ব কৰিব অসম চৰকাৰৰ মন্ত্ৰী- বিধায়কৰ স্বজন তোষণৰ মাত্ৰা ।

‘ৰাজনীতি অসম’ অসমৰ প্ৰথম ৰাজনৈতিক ই-আলোচনীৰ প্ৰতিবেদন

ৰাজনীতি অসম’ (WWW.RAJNITIAXOM.COM) : দুই বছৰ – ১ লাখ ৬৯ হাজাৰ পঢ়ুৱৈ

এটা ব্যক্তিগত টি.ভি চেনেলত অসমৰ প্ৰাক্তন মুখ্যমন্ত্রী তৰুণ গগৈয়ে আগন্তুক বিধানসভা নিৰ্বাচনত আজমলেৰে হাত মিলোৱাৰ পোষকতা কৰে। এসময়ত “হু ইজ বদৰুদ্দিন ” বুলি কৈ অসমৰ মুলসুতিৰ মানুহৰ সমৰ্থন আদায় কৰা তৰুণ গগৈয়ে পৰিবৰ্তিত ৰাজনৈতিক পৰিবেশত আজমলৰ লগত মিত্রতা কৰাটো একো অস্বাভাবিক নহয়। ৰাজনীতিত শত্ৰুৰ শত্ৰুক সদায় মিত্র বুলি গণ্য কৰা হয়। গগৈ আৰু আজমলৰ দুয়োজনৰে যিহেতু প্ৰধান শত্ৰু  বিজেপি সেয়ে এই মিত্রতা দেখাত খুবেই স্বাভাবিক। কিন্তু প্ৰশ্ন হয় এই মিত্রতাৰ ফলত কোন লাভবান হ’ব? এই মিত্রতাই সকলোতকৈ বেছি লাভ দিব আজমলক। আজমলে হয়টো প্ৰতিদ্বন্দ্বিতা কৰিবলৈ ২০-৩০ টা সমষ্টি পাব আৰু ৯০% সমষ্টিত তেওঁলোক জয়ী হ’ব। কিন্তু ইয়াৰ বাবে চিৰকাললৈ অসমত ক্ষতিগ্ৰস্হ হ’ব কংগ্ৰেছ দল। এই দাগ মছিবলৈ  কংগ্ৰেছ দলক বহু বছৰ লাগি যাব। এই চেগতে বিজেপিয়ে অসমত মেৰু বিভাজন কৰিবলৈ সক্ষম হ’ব। ইতিমধ্যে বিজেপিয়ে চ’চিয়েল মিডিয়াত কংগ্ৰেছক ঘেৰাৰ ব্যাপক  পৰিকল্পনা কৰিছে। ফেচবুক -হোৱাটছাপত কংগ্ৰেছ নেতাক আজমলৰ লগত মিত্রতাৰ বাবে কৰিব তীব্ৰ আক্ৰমন।। একেদৰে আজমলক গৃহমন্ত্রী দি বাংলাদেশী অনাৰ চেষ্টা চলিব বুলিও প্ৰচাৰ কৰিব বুলি জনা গৈছে। । কংগ্ৰেছ- অজমলৰ মিত্রতাৰ ফলত হ’বলগীয়া মেৰুকৰণৰ সুফল ভোগ কৰিব বিজেপিয়ে। যেতিয়াই কোনো নিৰ্বাচনত মেৰুকৰণ হয় তেতিয়াই লাভান্নিত হয় বিজেপি।সেয়েহে আজমলৰ লগত মুকলি মিত্রতাতকৈ গোপন মিত্রতা কংগ্ৰেছৰ বাবে লাভজনক। ৰাইজক দেখাকৈ আজমলক গালি পাৰি তলে তলে মিত্রতা কৰিলেহে কংগ্ৰেছৰ কিছু আশা আছে। আসন এৰি দিয়াতকৈ দুৰ্বল প্ৰাৰ্থী দি কংগ্ৰেছে ২০২১ত বৈতৰণী পাৰ হোৱাৰ চেষ্টা কৰিব পাৰে।